ଭବାନୀପାଟଣା,୭।୯(ଡି.ଏନ୍.ଏ.): କଳାହାଣ୍ଡି ଜିଲା ଭବାନୀପାଟଣା ଟାଉନ ଥାନା ପୋଲିସ ଚୋରି ମାମଲାରେ ଥାନା ଅଞ୍ଚଳର ଲୋକଙ୍କ ଘରେ ପସି ମୋବାଇଲ, ସୁନା ଅଳଙ୍କାର ଏବଂ ଅନ୍ୟାନ୍ୟ ସାମଗ୍ରୀ ଜବତ କରିବା ସହ ଚୋରଙ୍କୁ ଗିରଫ କରିଛି। ଏହା ସହ ଚୋରି ସାମଗ୍ରୀ କିଣିଥିବା ୫ ଜଣଙ୍କୁ ଗିରଫ କରି ସୋମବାର କୋର୍ଟଚାଲାଣ କରିଛି। ଗିରଫ ମୁଖ୍ୟ ଅଭିଯୁକ୍ତ ହେଲେ ଭବାନୀପାଟଣା କୁକୁଡା ଫାର୍ମ ଅଞ୍ଚଳରେ ରହୁଥିବା ଦେପୁର ଗ୍ରାମର ନୂତନ କିଶୋର ବାଣୁଆ (୩୦)।
ସୂଚନାଯୋଗ୍ୟ, ଭବାନୀପାଟଣା ସହର, ସଦର ଥାନା ଅଞ୍ଚଳ ସମେତ ଅନ୍ୟାନ୍ୟ ଅଞ୍ଚଳରେ ମୋବାଇଲ, ସୁନା ଅଳଙ୍କାର ଓ ଅନ୍ୟାନ୍ୟ ସାମଗ୍ରୀ ଲଗାତାର ଚୋରି ହେଉଥିଲା। ଏ ସଂପର୍କରେ ଭବାନୀପାଟଣା ଟାଉନ ଥାନା କେସ୍ ନଂ ୧୮୨/୨୦ରେ ମାମଲା ରୁଜୁ କରାଯିବା ସହିତ ଆଇଆଇସି ସତ୍ୟ କୁମାର ନନ୍ଦ ଓ ଅଧିକାରୀମାନେ ତଦନ୍ତ କରରୁଥିଲେ। ତେବେ ବାଣୁଆଙ୍କୁ ଗିରଫ ପରେ ଚୋରି କରିଥିବା ମୋବାଇଲ, ସୁନା ଅଳଙ୍କାର ଓ ଅନ୍ୟାନ୍ୟ ସାମଗ୍ରୀ ଜୁନାଗଡ ସହରର ମାରୱାଡି ପଡାର ଅଙ୍କିତ ଅଗ୍ରୱାଲ (୨୩), ଗୋଲାମୁଣ୍ଡା ବ୍ଲକର ଫରଙ୍ଗ ନିକଟସ୍ଥ ଫୁଣ୍ଡା ଗ୍ରାମର ଶେଷଦେବ ଭୋଇ (୩୭), ଭବାନୀପାଟଣାର ନୂଆପଡା ନିବାସୀ ଏନ୍. ଶିବା ରାଓ (୨୩), ଦର୍ପଣ ସାଗର ପଡାର ଭାରତୀ ପ୍ରଧାନ ଏବଂ ଶ୍ରୀପୁର ଗ୍ରାମର ଦଣ୍ଡ ଗଉଡକୁ ବିକ୍ରି କରିଥିବା ପୋଲିସକୁ ଜଣାଇଥିଲେ। ତେବେ ସେମାନଙ୍କ ଘରେ ଆଇଆଇସି ଚଢାଉ କରି ଚୋରି ଜିନିଷ ଜବତ କରିଛନ୍ତି।