ବ୍ରହ୍ମପୁର ଅଫିସ,୧୨ା୮- ଗଞ୍ଜାମ ଜିଲାରେ କରୋନା ଭୟାଭୟ ସ୍ଥିତିରେ ପହଞ୍ଚିଛି। ଅଗଷ୍ଟରେ ମଧ୍ୟ ଏଭଳି ସ୍ଥିତି ଜାରି ରହିଛି। ଏହିଧାରାରେ ବ୍ରହ୍ମପୁର ପୋଲିସ ଜିଲାରେ କରୋନା ଯୋଦ୍ଧା ଭାବେ ପରିଚିତ ପୋଲିସ ଅଧିକାରୀ ଓ କର୍ମଚାରୀମାନେ ସଂକ୍ରମିତ ହୋଇଛନ୍ତି। ବ୍ରହ୍ମପୁର ପୋଲିସ ଜିଲାରେ ଜୁନ ୨୬ରେ ସଦର ଥାନାର ତତ୍କାଳୀନ ଏସ୍ଆଇ ବିଭୂତି ଭୂଷଣ ସେଠୀ ପ୍ରଥମେ ଆକ୍ରାନ୍ତ ହୋଇଥିଲେ। ଏଯାବତ୍ ଜିଲାର ୧୧୬ପୋଲିସ କର୍ମଚାରୀ ଓ ଅଧିକାରୀ ସଂକ୍ରମିତ ହୋଇଥିବା ବେଳେ ସେମାନଙ୍କ ମଧ୍ୟରୁ ୩ ଜଣ ଆକ୍ରାନ୍ତ ହୋଇ ମୃତ୍ୟୁବରଣ କରିଛନ୍ତି।
ଦିଗପହଣ୍ଡି ଥାନାରେ ଗୃହରକ୍ଷୀ ଭାବେ କାର୍ଯ୍ୟରତ ଏସ୍ଆଇ ନରସିଂହ ଦାସ, ଟ୍ରାଫିକ ଥାନାରେ କାର୍ଯ୍ୟରତ ଏଏସ୍ଆଇ କୃଷ୍ଣଚନ୍ଦ୍ର ମଣ୍ଡଳ ଓ ସୋମବାର ରାତିରେ ବଡବଜାର ଥାନାରେ କାର୍ଯ୍ୟରତ କନଷ୍ଟେବଳ ଜିତେନ୍ଦ୍ର ପ୍ରଧାନଙ୍କର ମୃତ୍ୟୁ ଘଟିଥିବା ପୋଲିସ ପାଇଁ ନୋଡାଲ ଅଫିସର ତଥା ଟ୍ରାଫିକ ଡିଏସ୍ପି ସାର୍ଥକ ରାୟ ସୂଚନା ଦେଇଛନ୍ତି। କନଷ୍ଟେବଳ ଜିତେନ୍ଦ୍ରଙ୍କୁ ମଙ୍ଗଳବାର ଏମ୍କେସିଜି ମେଡିକାଲ ମୃତଦେହ ସଂରକ୍ଷଣ ଗୃହ ନିକଟରେ ରାଷ୍ଟ୍ରୀୟ ମର୍ଯ୍ୟାଦା ଦିଆଯାଇଥିଲା। ସେଠାରେ ବ୍ରହ୍ମପୁର ଏସ୍ପି ପିନାକ ମିଶ୍ର, ଏଏସ୍ପି ପ୍ରଭାତ ରାଉତରାୟ, ଏଏସ୍ପି ପ୍ରଶାନ୍ତ କୁମାର ମିଶ୍ର, ବ୍ରହ୍ମପୁର ଏସ୍ଡିପିଓ ବିଷ୍ଣୁପ୍ରସାଦ ପତି ଓ ଟ୍ରାଫିକ ଡିଏସ୍ପି ସାର୍ଥକ ରାୟ ପ୍ରମୁଖ ଉପସ୍ଥିତ ଥିଲେ।
