ଟୋକିଓ, ୫ା୧ (ଏପି): ଟୋକିଓ ଅଲିମ୍ପିକ୍ସର କାଉଣ୍ଟ ଡାଉନ୍ ଘଣ୍ଟା ହେଉଛିି ଟିକ୍-ଟକ୍-ଟିକ୍। ଗେମ୍ସ ଆୟୋଜନ ପାଇଁ ସୋମବାରଠାରୁ ଆହୁରି ୨୦୦ଦିନ ବାକି ରହିଥିବା ଏହା ସୂଚାଇ ଦେଉଛି। ଟୋକିଓ ସହର ଓ ଏହାର ଆଖପାଖ ଅଞ୍ଚଳରେ କିଛି ଦିନ ହେଲା ନୂଆ କରୋନା ସଂକ୍ରମିତ ଦେଖିବାକୁ ମିଳୁଥିବାରୁ ଜାପାନ ପ୍ରଧାନମନ୍ତ୍ରୀ ୟୋଶିଦେ ସୁଗା ପ୍ରଦେଶରେ ଜରୁରିକାଳୀନ ପରିସ୍ଥିତି ଜାରି କରିବା ଲାଗି ବିଚାର କରୁଛନ୍ତି। କୋଭିଡ ପାଇଁ ଜାପାନରେ ଏପର୍ଯ୍ୟନ୍ତ ଥରେ ହେଲେ ଲକ୍ଡାଉନ୍ ହୋଇନାହିଁ। ଜାପାନକୁ ୧୫,୦୦୦ ଅଲିମ୍ପିକ ଓ ପାରାଅଲିମ୍ପିକ ଆଥଲେଟ୍ ଆସିବେ। ଆଥଲେଟ୍ସ ଭିଲେଜରେ ସେମାନଙ୍କୁ କିପରି ସୁରକ୍ଷିତ ଭାବେ ରଖାଯାଇ ପାରିବ ସେ ନେଇ ପ୍ରସ୍ତୁତ ଯୋଜନା ସମ୍ପର୍କରେ ନୂଆବର୍ଷରେ ଘୋଷଣା କରାଯିବ ବୋଲି ଅଫିସିଆଲମାନେ ପ୍ରତିଶ୍ରୁତି ଦେଇଥିଲେ। ଗେମ୍ସ ପାଇଁ ହଜାର ହଜାର ସଂଖ୍ୟାରେ ଖେଳପ୍ରେମୀ, ମିଡିଆ, ଜଜ୍, ଅଫିସିଆଲ, ବ୍ରଡକାଷ୍ଟର ଏବଂ ଭିଆଇପିଙ୍କର ମଧ୍ୟ ସମାଗମ ହେବ। ନୂଆବର୍ଷର ଆଗମନ ହୋଇଛି। ପୁନଃ ନିର୍ଦ୍ଧାରିତ କାର୍ଯ୍ୟସୂଚୀ ଅନୁସାରେ ଜୁଲାଇ ୨୩ରୁ ଅଲିମ୍ପିକ୍ସ ଆୟୋଜନ ହେବ ବୋଲି ସୁଗା ପୁନର୍ବାର ଦୋହରାଇ କହିଛନ୍ତି। ଇତିମଧ୍ୟରେ ଭାକ୍ସିନ ଅନୁମୋଦନ ଲାଭ କରସାରିଥିବାରୁ ମାର୍ଚ୍ଚ ପରିବର୍ତ୍ତେ ଫେବୃୟାରୀରେ ଏହାର ବ୍ୟବହାର ଆରମ୍ଭ ହୋଇଯିବ। ଅନ୍ୟ ଦେଶ ତୁଳନାରେ ଜାପାନରେ କରୋନା ସେତେ କ୍ଷତି କରିପାରିନାହିଁ। କୋଭିଡ୍ରେ ଏହି ଦେଶରେ ପ୍ରାୟ ୩,୪୦୦ଜଣଙ୍କର ମୃତ୍ୟୁ ଘଟିଛି। ଗତ ମାସରେ ଜାତୀୟ ବ୍ରଡ୍କାଷ୍ଟର ଏନ୍ଏଚ୍କେ ପକ୍ଷରୁ ଏକ ଜନମତ ସର୍ଭେ କରାଯାଇଥିଲା। ସେମାନଙ୍କ ମଧ୍ୟରୁ ୬୩ ପ୍ରତିଶତ ଅଲିମ୍ପିକ୍ସକୁ ସ୍ଥଗିତ କିମ୍ବା ବାତିଲ କରିଦେବା ସପକ୍ଷରେ ମତ ଦେଇଥିଲେ।