ଝୁମ୍ପୁରା, ୧୦।୧୨(ଡି.ଏନ.ଏ.)-କେନ୍ଦୁଝର ଜିଲା ବାଲିବନ୍ଧ ଫରେଷ୍ଟ, ଲକ୍ଷ୍ମୀପଶି ବିଟ ଅନ୍ତର୍ଗତ ଅଶୁକୀ ଜଙ୍ଗଲରେ ଦୁଇ ଦିନ ହେବ ମୟୂରଭଞ୍ଜ ଅଞ୍ଚଳରୁ ଚାଲି ଆସିଥିବା ୨୨ଟିକିଆ ହାତୀପଲ ରହୁଛନ୍ତି। ଅଶୁକୀ ଜଙ୍ଗଲ ପାର୍ଶ୍ୱରେ ଅରଡେଇ ନଦୀ ବୋହି ଯାଉଥିବା ବେଳେ, ଖାଦ୍ୟ ଓ ପାନୀୟ ମିଳି ଯାଉଥିବାରୁ ହାତୀ ପଲ ଯାଇପାରୁ ନାହାନ୍ତି ବୋଲି ବନ ବିଭାଗ ସୂତ୍ରରୁ ଜଣା ପଡିଛି। ଏହି ୨୨ ଟିକିଆ ହାତୀ ପଲରେ ୫ଟି ଛୁଆ ହାତୀ ରହିଥିବା ଫରେଷ୍ଟର ଖଗେଶ୍ୱର ବାରିକ ସୂଚନା ଦେଇଛନ୍ତି। ୨ଦିନରେ ହାତୀ ପଲ ଏହି ଜଙ୍ଗଲ ପାଖ ବଳଭଦ୍ରପୁରରେ ୪ଟି ଘର ଭାଙ୍ଗିଥିବା ବେଳେ, ନଦୀକୂଳରେ ଥିବା ଗ୍ରାମବାସୀଙ୍କର ପନିପରିବା ଚାଷ ସମ୍ପୂର୍ଣ୍ଣ ଉଜାଡି ଦେଇଛନ୍ତି। ସେହିପରି ନିକଟସ୍ଥ ପାର୍ବତୀପୁରରେ ଦାଶରଥି ମୁଣ୍ଡାଙ୍କର ଘର ମଧ୍ୟ ଭାଙ୍ଗି ଦେଇଛନ୍ତି। ବଳଭଦ୍ରପୁରରେ ଘର ଭାଙ୍ଗିବା ନେଇ କ୍ଷତିଗ୍ରସ୍ତ ଖଗେଶ୍ୱର ତନ୍ତୀ, ଲକ୍ଷ୍ମୀଧର ମାଝୀ, ଗଣେଶ ମାଝୀ, ଜିତୁ ମାଝୀ ଅଭିଯୋଗ କରିଛନ୍ତି। ଜଙ୍ଗଲ ପାଶର୍ବରେ ଗ୍ରାମବାସୀଙ୍କର ଗହଳି ଲାଗିଥିବାରୁ ଓ ପାଟିତୁଣ୍ଡ କରୁଥିବାରୁ ଜଙ୍ଗଲ ଭିତରେ ହାତୀପଲ ଏଣେତେଣେ ବୁଲୁଥିବା ଦେଖାଯାଇଛି। ଜଙ୍ଗଲ ବିଭାଗର କର୍ମଚାରୀମାନେ ହାତୀପଲଙ୍କୁ ଜଗି ରହିଛନ୍ତି।