ମେଲବୋର୍ନ,୨୩।୧୨ (ପି.ଟି.): ଅଷ୍ଟ୍ରେଲିଆ ଟେଷ୍ଟ ଅଧିନାୟକ ପଦରେ ପୁଣି ଥରେ ବ୍ୟାଟିଂ ସୁପରଷ୍ଟାର ଷ୍ଟିଭ୍ ସ୍ମିଥ୍ଙ୍କୁ ନିଯୁକ୍ତି ଦେବା ନେଇ ଚର୍ଚ୍ଚା ଆରମ୍ଭ ହୋଇଛି। ତେବେ କ୍ରିକେଟ ଅଷ୍ଟ୍ରେଲିଆ (ସିଏ) ଏ ନେଇ ଭିନ୍ନ ମନ୍ତବ୍ୟ ଦେଇଛି। ନେତୃତ୍ୱ ନେବା ପାଇଁ ସ୍ମିଥ୍ଙ୍କ ସମେତ ଏକାଧିକ ମହାନ ଯୁବ ଖେଳାଳି ପ୍ରସ୍ତୁତ ଅଛନ୍ତି ବୋଲି ସିଏ ତରଫରୁ କୁହାଯାଇଛି। ୨୦୧୮ ବଲ୍ ଟ୍ୟାମ୍ପରିଂ ମାମଲାରେ ଧରାପଡିବା ପରେ ସ୍ମିଥ୍ଙ୍କୁ ଟେଷ୍ଟ ଅଧିନାୟକ ପଦରୁ ବହିଷ୍କାର କରାଯାଇଥିଲା ଓ ଟିମ୍ ପେନ୍ଙ୍କୁ ନେତୃତ୍ୱ ପ୍ରଦାନ କରାଯାଇଥିଲା। କିନ୍ତୁ ଏବେ ପୁଣି ସ୍ମିଥ୍ଙ୍କୁ ନେତୃତ୍ୱ ଦେବା ନେଇ ଆକଳନ ଆରମ୍ଭ ହୋଇଛି। ତେବେ ନେତୃତ୍ୱ ନେବା ପାଇଁ ଆମ ପାଖରେ ମେଗ, ଆରୋନ ଫିଞ୍ଚ୍ ଓ ଟିମ୍ ପେନ୍କ ଭଳି ବହୁତ ଭଲ ଯୁବ ଖେଳାଳି ରହିଛନ୍ତି ବୋଲି ସିଏ ଅଧ୍ୟକ୍ଷ ଅର୍ଲ ଏଡିଙ୍ଗ୍ସ କହିଛନ୍ତି। ଅଧିନାୟକ ପଦ ଦୌଡ଼ରେ ଆହୁରି କେତେକ ଯୁବ ଖେଳାଳି ମଧ୍ୟ ରହିଛନ୍ତି। କେବଳ ସ୍ମିଥ୍ ଏହି ହାଇପ୍ରୋଫାଇଲ ପଦ ଦୌଡ଼ରେ ନାହାନ୍ତି। ଜଣେ ଶ୍ରେଷ୍ଠ ଲିଡରଙ୍କୁ ଆମେ ବାଛିବୁ ବୋଲି ସେ ସ୍ପଷ୍ଟ କରିଛନ୍ତି। ତେବେ ସ୍ମିଥ୍ ଜଣେ ମହାନ୍ ଯୁବ ଖେଳାଳି ଓ ଜଣେ ଭଲ ଅଧିନାୟକ ବୋଲି ସେ ସ୍ବୀକାର କରିଛନ୍ତି। ନୂଆ ନେତୃତ୍ୱ ନେଇ ଯୋଜନା ଆରମ୍ଭ ହୋଇଛି। କିନ୍ତୁ ଏ ନେଇ କୌଣସି ବିଧିବଦ୍ଧ ଆଲୋଚନା ହୋଇନାହିଁ ବୋଲି ସେ କହିଛନ୍ତି।
ଭିନ୍ନ ଭିନ୍ନ ସମୟରେ ଏକାଧିକ ଯୁବ ଖେଳାଳିଙ୍କୁ ଉପଅଧିନାୟକ ଭାବେ ଦାୟିତ୍ୱ ସମ୍ଭାଳିବାକୁ ସୁଯୋଗ ଦିଆଯାଇଛି। ଚୟନକର୍ତ୍ତାଙ୍କ ସୁପାରିସ କ୍ରମେ ଏ ସଂକ୍ରାନ୍ତରେ ଅନ୍ତିମ ନିଷ୍ପତ୍ତି ନିଆଯିବ ବୋଲି ଏଡିଙ୍ଗ୍ସ କହିଛନ୍ତି। ମାଥ୍ୟୁ ଓ୍ବେଡ୍ ଉପଅଧିନାୟକ ଭାବେ କାର୍ଯ୍ୟ କରିଛନ୍ତି। ସେହିପରି ପେନ୍ ଓ ଫିଞ୍ଚ୍ ଯଥାକ୍ରମେ ଟେଷ୍ଟ ଓ ଦିନିକିଆରେ ନେତୃତ୍ୱ ନେଉଛନ୍ତି। ସେହିପରି ସିଏର ମୁଖ୍ୟ କାର୍ଯ୍ୟନିର୍ବାହୀ ପଦରେ ଜଣେ ଯୋଗ୍ୟ ବ୍ୟକ୍ତିଙ୍କୁ ନିଯୁକ୍ତି ଦିଆଯିବା ନେଇ ମଧ୍ୟ ମନ୍ତ୍ରଣା ଆରମ୍ଭ ହୋଇଛି। ତେଣୁ ସବୁ ଦୃଷ୍ଟିକୋଣରୁ ବିଚାର କରି ଅନ୍ତିମ ନିଷ୍ପତ୍ତି ନିଆଯିବ ବୋଲି ଏଡିଙ୍ଗ୍ସ କହିଛନ୍ତି।