ଆଳି,୨୮ା୪(ବନମାଳୀ ସେନାପତି)ଦୀର୍ଘ ଦଶନ୍ଧି ଧରି କଟକ-ଚାନ୍ଦବାଲି ରାଜ୍ୟ ରାଜପଥ ଦେଇ ଆଳିରୁ ଦୈନିକ ୫୦ରୁ ଊର୍ଦ୍ଧ୍ୱ ଘରୋଇ ବସ୍ କଟକ ଭୁବନେଶ୍ୱର ଯାତାୟାତ କରୁଛି। ବସ୍ରେ ଯିବା ନିମନ୍ତେ ଯାତ୍ରୀମାନେ ଆଳି ଅନ୍ନପୂର୍ଣ୍ଣା ପଡ଼ିଆ ସମେତ ବିଭିନ୍ନ ଛକରେ ବସ୍କୁ ଅପେକ୍ଷା କରିଥାନ୍ତି। ବସ୍ଗୁଡ଼ିକ ରାଜ୍ୟ ରାଜପଥ ଉପରେ ଠିଆ ହୋଇ ଯାତ୍ରୀମାନଙ୍କୁ ଗନ୍ତବ୍ୟସ୍ଥଳକୁ ନେବା ଆଣିବା କରିଥାନ୍ତି। ଯାତ୍ରୀମାନେ ଯେଉଁଠି ବସ୍ ଚଢିଥାନ୍ତି ସେଠାରେ ଆଶ୍ରୟସ୍ଥଳୀର ବ୍ୟବସ୍ଥା ନ ଥିବାରୁ ଯାତ୍ରୀମାନେ ଖରା,ବର୍ଷା ଓ ଶୀତରେ ବହୁ କଷ୍ଟରେ ଯାତାୟାତ କରିଥାନ୍ତି। ଏହାକୁ ଲକ୍ଷ୍ୟ କରି ଆଳିର କେତେଜଣ ବୁଦ୍ଧିଜୀବୀ ସ୍ଥାନୀୟ ଅଞ୍ଚଳରେଏକ ସ୍ଥାୟୀ ବସ୍ଷ୍ଟାଣ୍ଡ, ଯାତ୍ରୀ ଆଶ୍ରୟସ୍ଥଳୀ ନିର୍ମାଣ ନିମନ୍ତେ ଦାବି କରିଆସୁଥିଲେ । ଏହାକୁ ଲକ୍ଷ୍ୟ କରି ରାଜ୍ୟ ସରକାର କଟକ-ଚାନ୍ଦବାଲି ମୁଖ୍ୟ ରାସ୍ତାର ଆଳି ଗୌଡ଼ପାଟଣା ନିକଟରେ ଏକ ଅତ୍ୟାଧୁନିକ ବସ୍ଷ୍ଟାଣ୍ଡ ନିର୍ମାଣ କରିବା ସହିତ ଯାତ୍ରୀମାନଙ୍କ ନିମନ୍ତେ ସମସ୍ତ ପ୍ରକାର ବ୍ୟବସ୍ଥା କରିଛନ୍ତି । ପୁରୁଷ ଓ ମହିଳା ଯାତ୍ରୀମାନଙ୍କ ନିମନ୍ତେ ଶୌଚାଳୟ ସମେତ ସ୍ବଚ୍ଛ ପାନୀୟ ଜଳ ଓ ବସ୍କୁ ଅପେକ୍ଷା କରିବା ନିମନ୍ତେ ଅପେକ୍ଷାସ୍ଥଳୀ ନିର୍ମାଣ କରାଯାଇଛି। ହେଲେ ଏ ସବୁ ସୁବିଧା ଯାତ୍ରୀମାନଙ୍କ କାମରେ ଲାଗୁନି ।
ଆଳିରୁ ଜିଲା ବାହାରକୁ ଦୈନିକ ୫୦ରୁ ଊର୍ଦ୍ଧ୍ୱ ବସ୍ କଟକ, ଭୁବନେଶ୍ୱର ଯାଉଥିବା ବେଳେ ସେଗୁଡିକ କେବଳ ବସ୍ଷ୍ଟାଣ୍ଡକୁ ଗୋଟିଏ ପଟେ ପ୍ରବେଶ କରି ଅନ୍ୟ ପଟେ ନିଜ ଗନ୍ତବ୍ୟସ୍ଥଳକୁ ବାହାରି ଯାଉଛନ୍ତି । କିନ୍ତୁ ଦୀର୍ଘ ବର୍ଷ ହେବ ଯେଉଁଭଳି ଭାବେ ଆଳି ନୂଆବଜାର ଅନ୍ନପୂର୍ଣ୍ଣା ପଡ଼ିଆ ନିକଟରେ ରାଜ୍ୟ ରାଜପଥ ଉପରୁ ବିପଦସଙ୍କୁଳ ଅବସ୍ଥାରେ ଯାତ୍ରୀମାନେ ବସ୍କୁ ଅପେକ୍ଷା କରୁଥିଲେ ଏବେ ବି ସେହି ଭଳି ରାସ୍ତା କଡ଼ରେ ନଚେତ୍ କେଉଁ ଦୋକାନ ପିଣ୍ଡାରେ ଠିଆ ହୋଇ ଅପେକ୍ଷା କରୁଛନ୍ତି। ବୁଦ୍ଧିଜୀବୀମାନଙ୍କ କହିବା କଥା ଯଦି ବସ୍ଗୁଡ଼ିକ ନୂଆ ବସ୍ଷ୍ଟାଣ୍ଡରେ କିଛି ସମୟ ଅଟକି ରୁହନ୍ତା ତେବେ ଯାତ୍ରୀମାନେ ସେଠାରେ ଅପେକ୍ଷା କରନ୍ତେ। ହେଲେ ସେଥିପାଇଁ କୌଣସି ନିୟମ ଲାଗୁ କରାଯାଇ ନାହିଁ। ଅପରପକ୍ଷେ ଦିନକୁ ଦିନ ଗ୍ରୀଷ୍ମପ୍ରବାହ ବୃଦ୍ଧି ପାଉଥିବା ବେଳେ ଲୋକମାନେ ଅସ୍ତବ୍ୟସ୍ତ ହେଉଛନ୍ତି। ଦିନ ୧୧ଟା ପରେ ଅତି ଜରୁରୀ କାମ ନ ଥିଲେ ଘରୁ ବାହାରିବା ଉପରେ ସରକାର ରୋକ୍ ଲଗାଇଛନ୍ତି। ହେଲେ ସେହି ସମୟରେ ଯାତ୍ରୀବାହୀ ବସ୍ଗୁଡ଼ିକ ବିନା ବାଧାରେ ଯାତାୟାତ କରୁଛି ା ଏହା ଉପରେ ରୋକ୍ ଲଗାଇବାକୁ ସାଧାରଣରେ ଦାବି ହୋଇଛି।
