ଆଠମଲ୍ଲିକ, ୨୧ା୩ (ଡି.ଏନ.ଏ.): ଅନୁଗୋଳ ଜିଲା ଆଠମଲ୍ଲିକ ଉପଖଣ୍ଡର ଅନେକ ସରକାରୀ କାର୍ଯ୍ୟାଳୟରେ ନାହାନ୍ତି ମୁଖ୍ୟ ଅଧିକାରୀ। ଏଠାରେ ଦୀର୍ଘବର୍ଷ ହେଲା ଅନ୍ୟ ଅଧିକାରୀ ଭାରପ୍ରାପ୍ତ ଭାବେ ମୁଖ୍ୟ ଦାୟିତ୍ୱ ସମ୍ଭାଳୁଛନ୍ତି। ଉପଖଣ୍ଡ ପ୍ରତି ସରକାରଙ୍କ ଏପରି ଅବହେଳାରୁ ବାଦ୍ ପଡ଼ିନି ସ୍କୁଲ କି କଲେଜ। ଆଠମଲ୍ଲିକ କଲେଜରେ ଦୀର୍ଘ ୧୩ ବର୍ଷ ହେବ ଅଧ୍ୟକ୍ଷ ପଦବୀ ଖାଲି ପଡ଼ିଥିବା ବେଳେ ଜଣେ ଅଧ୍ୟାପକଙ୍କୁ ଭାରପ୍ରାପ୍ତ ଅଧ୍ୟକ୍ଷ ଭାବେ ଦାୟିତ୍ୱ ଅର୍ପଣ କରାଯାଇଛି।
ପ୍ରକାଶ ଯେ, ଆଠମଲ୍ଲିକ ଉପଖଣ୍ଡ ମୁଖ୍ୟ ଡାକ୍ତରଖାନାରେ ୩ ବର୍ଷରୁ ଅଧିକ ହେବ ଉପଖଣ୍ଡ ଚିକିତ୍ସା ଅଧିକାରୀ ପଦବୀ ଖାଲି ପଡିଛି। ନୂଆ ଅଧ୍ୟକ୍ଷ ନିଯୁକ୍ତି ଦିଆ ନ ଯାଇ ଶିଶୁ ରୋଗ ବିଶେଷଜ୍ଞଙ୍କୁ ଏହି ଅତିରିକ୍ତ ଦାୟିତ୍ୱ ପ୍ରଦାନ କରାଯାଇଛି। ସେହିପରି ଆଠମଲ୍ଲିକ ମହାବିଦ୍ୟାଳୟରେ ୨୦୧୦ ମସିହାରୁ ଅଧ୍ୟକ୍ଷ ପଦବୀ ଖାଲି ପଡିଥିବା ବେଳେ ଭାରପ୍ରାପ୍ତ ଅଧ୍ୟକ୍ଷ ଦାୟିତ୍ୱ ଜଣେ ଅଧ୍ୟାପକ ସମ୍ଭାଳି ଆସୁଛନ୍ତି। କଲେଜରେ କର୍ତ୍ତବ୍ୟରତ ଅଧ୍ୟାପକମାନଙ୍କ ଭିତରୁ ବରିଷ୍ଠତା ଭିତ୍ତିରେ ଜଣେ ଅଧ୍ୟାପକଙ୍କୁ ଭାରପ୍ରାପ୍ତ ଅଧ୍ୟକ୍ଷ ଭାବରେ ନିଯୁକ୍ତି ମିଳୁଥିବା ବହୁ ବର୍ଷ ହେଲା ଦେଖାଯାଉଛି। ଉପଖଣ୍ଡ ସୂଚନା ଓ ଲୋକ ସମ୍ପର୍କ ଅଧିକାରୀ ପଦବୀରେ ୧୩ ବର୍ଷ ହେଲା କୌଣସି ଅଧିକାରୀଙ୍କୁ ନିଯୁକ୍ତି ଦିଆଯାଇ ନାହଁ। ଦୀର୍ଘବର୍ଷ ଧରି ଏହି ଦାୟିତ୍ୱ ଗ୍ରନ୍ଥାଗାରିକ ତୁଲାଇ ଆସୁଥିଲେ। ହେଲେ ବର୍ଷେ ତଳୁ ସେ ଅବସର ଗ୍ରହଣ କରିଥିବାରୁ ଉକ୍ତ ପଦବୀ ଖାଲି ପଡ଼ିଥିଲା। ହେଲେ କିଛି ଦିନ ହେଲା ସହକାରୀ ଜିଲାପାଳ ଅତିରିକ୍ତ ଭାବେ ସୂଚନା ଓ ଲୋକ ସମ୍ପର୍କ ଦାୟିତ୍ୱ ତୁଲାଉଛନ୍ତି। ଉପଖଣ୍ଡର ପ୍ରମୁଖ ଶିକ୍ଷାନୁଷ୍ଠାନ ମହେନ୍ଦ୍ର ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷକ ଗତ ଏପ୍ରିଲ ମାସରୁ ଅବସର ଗ୍ରହଣ କଲାପରେ ଅଦ୍ୟାବଧି କାହାରିକୁ ନିଯୁକ୍ତି ଦିଆଯାଉନାହିଁ। ବିଦ୍ୟାଳୟର ଇଂଲିଶ ଶିକ୍ଷକ ଏକବର୍ଷ ହେଲା ଭାରପ୍ରାପ୍ତ ପ୍ରଧାନ ଶିକ୍ଷକ ଭାବରେ ଦାୟିତ୍ୱ ତୁଲାଇ ଆସୁଛନ୍ତି। ବାରମ୍ବାର ଦାବି ସତ୍ତ୍ୱେ ସରକାର ସ୍ଥାୟୀ ଭାବେ ଅଧ୍ୟକ୍ଷ ପଦବୀ ପୂରଣ କରୁ ନ ଥିବାରୁ ସାଧାରଣରେ ଅସନ୍ତୋଷ ସୃଷ୍ଟି ହୋଇଛି।
ସରକାର ଯତ୍ନବାନ ହୁଅନ୍ତୁ
ଜନସାଧାରଣଙ୍କୁ ଉନ୍ନତ ସେବା ଯୋଗାଇ ଦେବା ଉପରେ ରାଜ୍ୟ ସରକାର ଗୁରତ୍ୱାରୋପ କରୁଛନ୍ତି। ତେଣୁ ଆଠମଲ୍ଲିକ ଉପଖଣ୍ଡର ବିଭିନ୍ନ ବିଭାଗରେ ଖାଲିଥିବା ମୁଖ୍ୟ ଅଧିକାରୀ ପଦବୀ ପୂରଣ କରିବା ଦିଗରେ ସରକାର ଯତ୍ନବାନ ହେବା ଆବଶ୍ୟକ।
-ବିନୟ କୁମାର ପଟ୍ଟନାୟକ, ସାମାଜିକ କର୍ମୀ
ଡାକ୍ତରଖାନା ଓ ଶିକ୍ଷାନୁଷ୍ଠାନକୁ ଗୁରୁତ୍ୱ ଦିଆଯାଉ
ବିଭାଗୀୟ କାର୍ଯ୍ୟକ୍ରମକୁ ଗତିଶୀଳ କରିବା ପାଇଁ ଖାଲିଥିବା ମୁଖ୍ୟ ଅଧିକାରୀ ପଦବୀ ଅତିଶୀଘ୍ର ପୂରଣ କରାଯିବା ଆବଶ୍ୟକ। ବିଶେଷକରି ଡାକ୍ତରଖାନା ଓ ଶିକ୍ଷାନୁଷ୍ଠାନକୁ ଗୁରୁତ୍ୱ ଦେବା ଦରକାର।
-ଦୀନେଶ କୁମାର ସିଂ, ଆଇନଜୀବୀ
ଜିଲାପାଳଙ୍କ ଦୃଷ୍ଟି ଆକର୍ଷଣ କରାଯିବ
ଉପଖଣ୍ଡସ୍ତରୀୟ ବିଭିନ୍ନ ବିଭାଗର ମୁଖ୍ୟ ଅଧିକାରୀ ଓ ଆଠମଲ୍ଲିକ ମହାବିଦ୍ୟାଳୟରେ ଖାଲି ରହିଥିବା ଅଧ୍ୟକ୍ଷ ପଦବୀ ପୂରଣ କରିବା ଦିଗରେ ଆବଶ୍ୟକ ପଦକ୍ଷେପ ନେବାକୁ ଜିଲାପାଳଙ୍କ ଦୃଷ୍ଟି ଆକର୍ଷଣ କରାଯିବ।
-ଆଶା କୁମାରୀ ସାହୁ, ଅଧ୍ୟକ୍ଷା, ଆଠମଲ୍ଲିକ ଏନ୍ଏସି