ଭୁବନେଶ୍ୱର,୧୩।୩(ବ୍ୟୁରୋ):ଆସନ୍ତା ୨୪ ତାରିଖରେ ପୌର ନିର୍ବାଚନ। ଚଳିତ ବର୍ଷ ପ୍ରଥମଥର ପାଇଁ ଭୋଟରମାନେ ମେୟରଙ୍କୁ ସିଧାସଳଖ ବାଛିବେ। ତେଣୁ ମେୟର ପଦ ଏବେ ସବୁଦଳ ପାଇଁ ବେଶ୍ ଗୁରୁତ୍ୱ ବହନ କରୁଥିବାବେଳେ ଭୁବନେଶ୍ୱର ମହାନଗର ନିଗମ (ବିଏମ୍ସି) ଉପରେ ଏବେ ସମସ୍ତଙ୍କ ନଜର ରହିଛି। ମେୟର ପଦ ପାଇଁ ୧୨ ଦଳ ପ୍ରାର୍ଥୀ ଦେଇଥିବାବେଳେ କିଏ ଭୁବନେଶ୍ୱର ମେୟର ପଦ ହାତେଇବ ତାହାକୁ ନେଇ ଚର୍ଚ୍ଚା ଜୋର୍ ଧରିଛି। ବିଶେଷକରି ମେୟର ଭୋଟ ଦଳୀୟ ପ୍ରସ୍ତୁତି ଓ କର୍ପୋରେଟରଙ୍କ ଉପରେ ଅଧିକ ନିର୍ଭରଶୀଳ। ଭାଜପା ଓ ବିଜେଡି ସମସ୍ତ ୬୭ ଓ୍ବାର୍ଡରେ କର୍ପୋରେଟର ପ୍ରାର୍ଥୀ ଦେଇ ମେୟର ପଦବୀ ପାଇଁ ଆଶା ରଖିଥିବାବେଳେ କଂଗ୍ରେସ ମାତ୍ର ୪୨ ଓ୍ବାର୍ଡରେ ପ୍ରାର୍ଥୀ ଦେବାରେ ସକ୍ଷମ ହୋଇଛି। ଆହୁରି ୨୫ ଓ୍ବାର୍ଡରେ ପ୍ରାର୍ଥୀ ନ ଥିବାରୁ କଂଗ୍ରେସର ମେୟର ପଦ ଆଶା କ୍ଷୀଣ ବୋଲି ରାଜନୈତିକ ବିଶ୍ଳେଷକମାନେ କହୁଛନ୍ତି।
ଗତ ୪ ତାରିଖରେ କଂଗ୍ରେସ ପ୍ରଥମ ଦଳ ଭାବେ ମେୟର ପ୍ରାର୍ଥୀଙ୍କ ନାମ ଘୋଷଣା କରିଥିଲା। ସେହିଦିନ ଅପରାହ୍ନରେ ୩୦ ୱାର୍ଡ ପାଇଁ ପ୍ରଥମ ପର୍ଯ୍ୟାୟ ଚୂଡାନ୍ତ କର୍ପୋରେଟର ପ୍ରାର୍ଥୀ ତାଲିକା ପ୍ରକାଶ କରିଥିଲା। ୭ ତାରିଖ ସୋମବାର ନାମାଙ୍କନପତ୍ର ଦାଖଲର ଶେଷ ସୁଦ୍ଧା କଂଗ୍ରେସ ଆଉ ୧୩ ୱାର୍ଡ଼ ପାଇଁ ପ୍ରାର୍ଥୀ ଦେଇଥିଲା। ପୂର୍ବତନ କର୍ପୋରେଟର ଦମ୍ପତି ପ୍ରତାପ ରାଉତରାୟ ଓ ତାଙ୍କ ସ୍ତ୍ରୀ ଜ୍ୟୋତ୍ସ୍ନାମୟୀ ବିଜେଡି ଛାଡ଼ି କଂଗ୍ରେସରେ ଯୋଗଦେବା ସହ ଜ୍ୟୋତ୍ସ୍ନାମୟୀ ୧୯ନଂ. ୱାର୍ଡ ପାଇଁ ନାମାଙ୍କନ ଦାଖଲ କରିଥିଲେ। ହେଲେ ଶୁକ୍ରବାର ସେ ତାଙ୍କ ପ୍ରାର୍ଥତ୍ପତ୍ର ପ୍ରତ୍ୟାହାର କରିଥିବାରୁ ବର୍ତ୍ତମାନ କଂଗ୍ରେସର କର୍ପୋରେଟର ପ୍ରାର୍ଥୀଙ୍କ ସଂଖ୍ୟା ୪୨କୁ ଖସି ଆସିଛି।
ଅନ୍ୟପକ୍ଷରେ ପଞ୍ଚାୟତ ନିର୍ବାଚନରେ ସଂଖ୍ୟା ଗରିଷ୍ଠତା ହାସଲ କରିବା ସହ ୭୬୫ ଜିଲା ପରିଷଦ ଆସନ ହାତେଇ ଥିବା ଶାସକ ବିଜେଡି ମେୟର ପଦ ଅକ୍ତିଆର କରିବା ପାଇଁ ଦମ୍ଭ ଦେଖାଇଛି। ବିଜେଡିର ବହୁ ଅସନ୍ତୁଷ୍ଟ ନେତା ସ୍ବାଧୀନ ପ୍ରାର୍ଥୀ ଭାବେ ନିର୍ବାଚନ ରଣାଙ୍ଗନକୁ ଓହ୍ଲାଇଥିବାରୁ ଫାଇଦା ନେବାକୁ ଚାହିଁ ବସିଛି ଭାଜପା। ସେହିପରି ଯେଉଁ ଓ୍ବାର୍ଡରେ କଂଗ୍ରେସ ପ୍ରାର୍ଥୀ ଦେଇନାହିଁ, ସେଠାରୁ କଂଗ୍ରେସ ଭୋଟ ପାଇବାକୁ ସବୁ ପ୍ରାର୍ଥୀମାନେ ଉଦ୍ୟମ ଆରମ୍ଭ କରିଛନ୍ତି।
କଂଗ୍ରେସର ମେୟର ପ୍ରାର୍ଥୀ ମଧୁସ୍ମିତା ଆଚାର୍ଯ୍ୟ କହିଛନ୍ତି, ମେୟର ପଦ ପାଇଁ ପ୍ରତ୍ୟକ୍ଷ ନିର୍ବାଚନ ହେବ ଓ ଭୋଟର ନିଜ ଇଚ୍ଛା ଅନୁସାରେ ଭୋଟ ଦେବେ। ଯେଉଁ ୱାର୍ଡରେ ଦଳ ପ୍ରାର୍ଥୀ ଦେଇ ନାହିଁ, ଆବଶ୍ୟକ ପଡିଲେ ସେଠାରେ ଲୋକଙ୍କ ପାଇଁ କାର୍ଯ୍ୟ କରିବାକୁ ଆଗେଇ ଆସିଥିବା ସ୍ବାଧୀନ କର୍ପୋରେଟର ପ୍ରାର୍ଥୀଙ୍କୁ କଂଗ୍ରେସ ସମର୍ଥନ ଜଣାଇବ ବୋଲି ମଧୁସ୍ମିତା କହିଛନ୍ତି। ଏଥିରୁ ଦଳୀୟ ଭୋଟ ସହ ସ୍ବାଧୀନ ପ୍ରାର୍ଥୀଙ୍କଠାରୁ ମେୟର ଭୋଟ ପାଇବାକୁ କଂଗ୍ରେସ ଆଶା ରଖିଥିବା ସ୍ପଷ୍ଟ ହେଉଛି।