ଦଶମନ୍ତପୁର,୨୮ା୮ (ଅରବିନ୍ଦ ନାୟକ ): ସ୍ବାଧୀନତାର ଦୀର୍ଘ ବର୍ଷ ବିତିଯାଇଥିଲେ ମଧ୍ୟ ଆଦିବାସୀ ଅଧ୍ୟୁଷିତ କୋରାପୁଟ ଜିଲାରେ ଏପରି ଅନେକ ଗ୍ରାମ ରହିଛି ଯେଉଁଠି ଗ୍ରାମବାସୀଙ୍କୁ ଏଯାଏ ମୌଳିକ ସୁବିଧା ସୁଯୋଗ ମିଳିନାହିଁ। ସରକାରଙ୍କ କାର୍ଯ୍ୟକାରୀ ହେଉଥିବା ବିଭିନ୍ନ ଯୋଜନାର ସୁଫଳ ସେମାନଙ୍କ ପାଇଁ ସ୍ବପ୍ନ ପାଲଟିଛି। ଜିଲାର ଏପରି ଏକ ଗ୍ରାମ ହେଉଛି ଦଶମନ୍ତପୁର ବ୍ଲକ ପିଣ୍ଡାପଦର ପଞ୍ଚାୟତର ଲୋରେଶ ଗ୍ରାମ।
ବ୍ଲକରୁ ୯ କି.ମି. ଦୂରରେ ଥିବା ଲୋରେସ ଗ୍ରାମକୁ ଚାରିପଟୁ ପାହାଡ, ପର୍ବତ, ନଦୀ ଓ ଘାଟି ଘେରି ରହିଛି। ୫ କିମି ଦୂରରେ ଥିବା ମରିଚଗୁଡ଼ା ଗ୍ରାମ ନିକଟରେ ପ୍ରବାହିତ ହେଉଛି ଅନ୍ଧରୀ ଗାଡ଼ ନଦୀ। ୩୫ ପରିବାର ବସବାସ କରୁଥିବା ଆମ ଗ୍ରାମରେ ଗମନାଗମନ, ଶିକ୍ଷା, ପାନୀୟ ଜଳ ଏବଂ ବିଦ୍ୟୁତ ସମସ୍ୟା ରହିଛି ବୋଲି କହନ୍ତି ଗ୍ରାମର ଧନୁର୍ଜୟ କମାର, ରାଜୀବ ଜମ୍ବେକା, ଜୁନେଶ ସାଉଁନ୍ତା, ଲବି ସାଉଁନ୍ତା। ଗ୍ରାମକୁ ଆଜିଯାଏ ରାସ୍ତା ନ ଥିବାରୁ ଆମେ ଆମ ମୌଳିକ ସୁବିଧାରୁ ବଞ୍ଚତ୍ତ ହେଉଛୁ ବୋଲି କହିଛନ୍ତି ଏହି ଗ୍ରାମବାସୀ। ଟୋଙ୍ଗା ଚୁଆ ଓ ପାଖବେଡ଼ା ନାଳ ପାଣି ସେମାନଙ୍କ ଦୈନନ୍ଦିନ ଚଳଣି ଲାଗି ଭରସା। ରାସ୍ତା ନ ଥିବା ହେତୁ କୌଣସି ଅସୁସ୍ଥ ରୋଗୀଙ୍କୁ ଡାକ୍ତରଖାନା ନେବାକୁ ହେଲେ ଭାର କରି ମରିଚଗୁଡାଯାଏ ନେଇଥାନ୍ତି ଗ୍ରାମବାସୀ। ସେଠାରୁ ଆମ୍ବୁଲାନସ ଅବା ଅନ୍ୟ ଗାଡିରେ ଦଶମନ୍ତପୁର ଡାକ୍ତରଖାନା ନିଅନ୍ତି। ଏଯାଏ କୌଣସି ପ୍ରଶାସନିକ ଅଧିକାରୀ କିମ୍ବା ରାଜନୈତିକ ଦଳର ନେତାଙ୍କ ପାଦ ଆମ ଗ୍ରାମରେ ପଡି ନ ଥିବା ଗ୍ରାମର ସନାରୀ ଜାନୀ, ଦୁଲା କୁଲିଶିକା, ଧୋବା ସାଉଁନ୍ତା, ପ୍ରତାପ ସାଉଁନ୍ତା, ରଞ୍ଜ ମିଣିଆକା, ଉଦ୍ଧବ ସାଉଁନ୍ତା, ଚନ୍ଦ୍ର ପାଇକ, କାଳିଆ ଜାନୀ, ଲୋଚ ସାଉଁନ୍ତା ପ୍ରମୁଖ କହିଛନ୍ତି। ଆଗାମୀ ନିର୍ବାଚନରେ ଆମେ ଭୋଟ ବର୍ଜନ କରିବୁ ବୋଲି ଚେତାବନୀ ଦେଇଛନ୍ତି ଗ୍ରାମବାସୀ। ଏସମ୍ପର୍କରେ ବିଡିଓ ଡମ୍ବରୁଧର ମଲ୍ଲିକଙ୍କୁ ପଚାରିବାରୁ ସେ କହିଲେ, ଉକ୍ତ ଗ୍ରାମର ସମସ୍ୟା ଅନୁଧ୍ୟାନ କରି ଗ୍ରାମକୁ ରାସ୍ତା ବ୍ୟବସ୍ଥା କରିବାକୁ ଜିଲାପାଳଙ୍କୁ ଜଣାଇବେ।