ବ୍ରହ୍ମପୁର ଅଫିସ,୨୬।୧ – ବ୍ରହ୍ମପୁର ସହରର ପ୍ରାଣ କେନ୍ଦ୍ର ବଡ଼ବଜାର। ନିୟମିତ ଗଞ୍ଜାମ ଜିଲା ସମେତ ଅନ୍ୟ ସ୍ଥାନରୁ ବହୁ ବ୍ୟବସାୟୀ ଓ ଗ୍ରାହକଙ୍କ ଭିଡ଼ ଏଠାରେ ଲାଗିରହିଥାଏ। କିନ୍ତୁ ଦୀର୍ଘବର୍ଷଧରି ବଡ଼ବଜାରର ଶୌଚାଳୟ ସମସ୍ୟା ଦୂରହୋଇ ପାରିନାହିଁ। ଫଳରେ ଦୂରସ୍ଥାନରୁ ଆସୁଥିବା ମହିଳାମାନେ ବହୁ ହଇରାଣ ହେଉଛନ୍ତି। ବଡ଼ବଜାରରେ ମୁଖ୍ୟ ରାସ୍ତାରେ ପାଖାପାଖି ୧୫୦ରୁ ଊର୍ଦ୍ଧ୍ୱ ସୁନା ଓ ଲୁଗା ଦୋକାନ ରହିଛି। ସେହିପରି ବଜାର ଭିତରେ ହୋଲସେଲ ମାର୍କେଟ ଆଦି ରହିଛି। ବାଚୁୱାରିସାହି, ଦେଶୀ ବେହେରାସାହି, ଚନ୍ଦ୍ରମାସାହି, ଇଲୁୱାରିସାହି, ନଡ଼ିଆବଜାର, ରାଜା ଗୁଜୁରି, ମାର୍ଥା ପେଟାସାହି, ଜଙ୍ଗମବାଡ଼ିସାହି ଆଦି ପାଖାପାଖି ୧୦ରୁ ଊର୍ଦ୍ଧ୍ୱ ସାହି ଲାଗି ମାତ୍ର ଗୋଟିଏ ସୁଲଭ ଶୌଚାଳୟ ରହିିଛି। ଯାହା ବ୍ୟବହାର ନିମନ୍ତେ ପର୍ଯ୍ୟାପ୍ତ ନୁହେଁ। ଏହି କାରଣରୁ ୨୦୧୬ରେ ବଡ଼ବଜାର ଦେଶୀ ବେହେରାସାହିରେ ଦୁଇଟି ମୋବାଇଲ ୟୁରିନାଲ ବିଏମ୍ସି ପକ୍ଷରୁ କରାଯାଇଥିଲା। ମାତ୍ର ଅଳ୍ପଦିନରେ ଏହା ସମ୍ପୂର୍ଣ୍ଣ ଅଚଳ ହୋଇଯାଇଛି। ଏହା ୨୦୧୮ରେ ପୁନଃବ୍ୟବହାରକ୍ଷମ କରାଯାଇଥିଲେ ମଧ୍ୟ ବର୍ତ୍ତମାନ ନଷ୍ଟ ହୋଇଯାଇଛି। ଯାହାଦ୍ୱାରା ବଡ଼ବଜାର ଶୌଚାଳୟ ସମସ୍ୟା ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇରହିଛି। ଏହି କାରଣରୁ ବ୍ୟବସାୟୀମାନେ ରାସ୍ତା ପାର୍ଶ୍ୱକୁ ଶୌଚାଳୟ ଭଳି ବ୍ୟବହାର କରୁଛନ୍ତି। ବାହାରୁ ଆସୁଥିବା ମହିଳାମାନେ ବିଶେଷ ଭାବେ ଅସୁବିଧାର ସମ୍ମୁଖୀନ ହୋଇଥାନ୍ତି। ଏ ସମସ୍ତ ଅଞ୍ଚଳ ୮ ନମ୍ବର ୱାର୍ଡ ଅଧୀନରେ ଆସଛି। ସେଠାକାର ପୂର୍ବତନ କର୍ପୋରେଟର ପି. ଆଶାରାଣୀଙ୍କ କହିବା ଅନୁଯାୟୀ, ବଡ଼ ବଜାର ଅଞ୍ଚଳର ଶୌଚାଳୟ ସମସ୍ୟା ନେଇ ବହୁବାର ବିଏମ୍ସି କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିଥିଲେ ସୁଦ୍ଧା ବଡ଼ବଜାର ଅଞ୍ଚଳରେ ସ୍ଥାନ ଅଭାବ ଯୋଗୁ କାର୍ଯ୍ୟ ଆଗେଇ ପାରୁନାହିଁ।
