ରାଉରକେଲା,୩୦ା୬(ଦିନେଶ ମିଶ୍ର): ହକି ବିଶ୍ୱକପ୍ ପୂର୍ବରୁ ରାଉରକେଲା ସହର ରାସ୍ତାକଡ଼ ଓ ଫୁଟପାଥ୍ ବ୍ୟବସାୟୀଙ୍କୁ କିଭଳି ଥଇଥାନ କରିହେବ ସେ ନେଇ ବିଭିନ୍ନ ସ୍ଥାନରେ ଆର୍ଏମ୍ସି ଓ ସ୍ଥାନୀୟ ପ୍ରଶାସନ ପକ୍ଷରୁ ଭେଣ୍ଡିଂ ଜୋନ କରାଯାଇଥିଲା। ତେବେ ଭେଣ୍ଡିଂ ଜୋନ୍ ନିର୍ମାଣ କରାଯାଇଥିଲେ ମଧ୍ୟ ଏଯାଏ କୌଣସି ରାସ୍ତାକଡ଼ ବ୍ୟବସାୟୀଙ୍କୁ ଦିଆଯାଇନାହିଁ। ଫଳରେ ସେମାନେ ପୂର୍ବଭଳି ରାସ୍ତାକଡରେ ବେପାର କରୁଥିବାରୁ ଟ୍ରାଫିକ୍ ସମସ୍ୟା ଉପୁଜୁଛି।
ହକି ବିଶ୍ୱକପ୍ ପୂର୍ବରୁ ଆର୍ଏମ୍ସି ପକ୍ଷରୁ ଫୁଟ୍ପାଥ୍ ଓ ରାସ୍ତାକଡ଼ ବ୍ୟବସାୟୀଙ୍କୁ ଥଇଥାନ କରିବା ପାଇଁ ରାଉରକେଲାର ଏସ୍ଟିଆଇ, ଡିଏଭି, ପାୱାରହାଉସ୍ ରୋଡ୍, ରଘୁନାଥପାଲି, ପାନପୋଷ, ଛେଣ୍ଡ, ଗୋପବନ୍ଧୁପାଲି ଆଦି ଅଞ୍ଚଳରେ ଭେଣ୍ଡିଂ ଜୋନ ଦୋକାନ ନିର୍ମାଣ କରାଯାଇଥିଲା। ଦୋକାନ ନିର୍ମାଣ ହେବାର ପ୍ରାୟ ୩ ମାସରୁ ଊର୍ଦ୍ଧ୍ୱ ବିତିଯାଇଥିଲେ ମଧ୍ୟ ଆଜିଯାଏ କୌଣସି ଫୁଟପାଥ ଓ ରାସ୍ତାକଡ଼ ବ୍ୟବସାୟୀ ସେଠାରେ ବ୍ୟବସାୟ କରୁଥିବା ଦେଖିବାକୁ ମିଳିନାହିଁ। ଡିଏଭି ଛକ ଜେଲ୍ ରୋଡ୍ ରାସ୍ତାକଡ଼ରେ ତିଆରି ହୋଇଥିବା ଭେଣ୍ଡିଂ ଜୋନରେ ୪୦ରୁ ଊର୍ଦ୍ଧ୍ୱ ଦୋକାନ ତାଲା ପଡ଼ିଥିବାବେଳେ ରଘୁନାଥପାଲି ପୋଷ୍ଟ ଅଫିସ କଡରେ ୫୦ରୁ ଊର୍ଦ୍ଧ୍ୱ ଦୋକାନ ଖୋଲିନାହିଁ। ସହରର ବିଭିନ୍ନ ସ୍ଥାନରେ ଏକାଧିକ ଭେଣ୍ଡିଂ ଜୋନ୍ରେ ତାଲା ପଡ଼ିଥିବାରୁ ଏହି ବ୍ୟବସାୟୀମାନେ ବାଧ୍ୟ ହୋଇ ସହରର ମୁଖ୍ୟ ରାସ୍ତାକଡ଼ ନଚେତ ଫୁଟ୍ପାଥକୁ କବ୍ଜ୍ଜା କରି ନିଜ ବ୍ୟବସାୟ କରୁଛନ୍ତି। ଫଳରେ ରାସ୍ତା ଅଣଓସାରିଆ ହେବା ସାଙ୍ଗକୁ ଟ୍ରାଫିକ ସମସ୍ୟା ଉପୁଜୁଛି।
ସହରର ଏସ୍ଟିଆଇ ଛକ ଏକ ଜନଗହଳି ଛକ ହୋଇଥିବାବେଳେ ଏଠାରେ ଫୁଟପାଥ ବ୍ୟବସାୟୀ ଭେଣ୍ଡିଂ ଜୋନରେ ଦୋକାନ ନ ପାଇ ପାଦଚଲା ରାସ୍ତାକୁ କବ୍ଜ୍ଜା କରି ନିଜ ପସରା ମେଲାଇଛନ୍ତି। ଏହି ଫୁଟପାଥ ଦେଇ ରାଉରକେଲା ସରକାରୀ ପଶୁ ଡାକ୍ତରଖାନା ଓ ଆର୍ଜିଏଚ୍କୁ ଯିବାକୁ ପଡ଼ିଥାଏ। ଫଳରେ ଲୋକେ ଅସୁବିଧାର ସମ୍ମୁଖୀନ ହେଉଛନ୍ତି। ସେହିପରି ଡିଏଭି ଛକ ରାସ୍ତାକଡ଼ ଫୁଟ୍ପାଥ୍କୁ ଫଳ ଓ ମାଛ ବ୍ୟବସାୟୀ ଦଖଲ କରି ରଖିଛନ୍ତି। ଦୈନିକ ମାର୍କେଟ ଅଞ୍ଚଳର ପାଦଚଲା ରାସ୍ତା ଉପରେ ବ୍ୟବସାୟୀ ନିଜର ଠେଲା ଲଗାଇ ବେପାର କରୁଛନ୍ତି। ବର୍ଷାଦିନ ଯୋଗୁ ବ୍ୟବସାୟୀମାନେ ପଲିଥିନ ବାନ୍ଧି ରାସ୍ତାକଡରେ ପଚାପରିବା, ଆଳୁପିଆଜ ଚୋପା, ଅଇଁଠା ପତ୍ର ପକାଇ ରାସ୍ତାକୁ ଅପରିଷ୍କାର କରୁଥିବା ଦେଖିବାକୁ ମିଳୁଛି। ଏ ସମ୍ପର୍କରେ ଏସ୍ଟିଆଇ ଛକର ଫୁଟପାଥ ବ୍ୟବସାୟୀ ଭରନ ମୋହନ ସାହୁ କୁହନ୍ତି, ଦୀର୍ଘ ୨୦ ବର୍ଷ ଧରି ଏହି ଫୁଟ୍ପାଥ ଉପରେ ଆଳୁ, ପିଆଜ ବିକ୍ରି କରୁଛି। ହକି ବିଶ୍ୱକପ ପୂର୍ବରୁ ଆରଏମ୍ସି ପକ୍ଷରୁ ଭେଣ୍ଡିଂ ଜୋନରେ ଦୋକାନ ମିଳିବ ବୋଲି କୁହାଗଲା। ମାତ୍ର ଏଯାଏ ମିଳିନାହିଁ। ଯେଉଁଦିନ ଆମକୁ ଦୋକାନ ମିଳିବ ସେଦିନ ଆମେ ଫୁଟ୍ପାଥରେ ବ୍ୟବସାୟ କରିବା ଛାଡ଼ିଦେବୁ ବୋଲି ସେ କହିଥିଲେ।