ନୂଆଦିଲ୍ଲୀ, ୧୧।୮: ମିଜୋରାମ ସରକାର ମଙ୍ଗଳବାର ପ୍ରତି ଯାନ ପାଇଁ ଇନ୍ଧନ ପରିମାଣ ସ୍ଥିର କରିଛନ୍ତି। ବର୍ତ୍ତମାନ ମିଜୋରମରେ ସ୍କୁଟର ପ୍ରତି ୩ ଲିଟର, ଅନ୍ୟ ଦୁଇ ଚକିଆ ଯାନ ଲାଗି ୫ ଲିଟର ଏବଂ କାର୍ ପାଇଁ ୧୦ ଲିଟର ପର୍ଯ୍ୟନ୍ତ ତେଲ ଭରିବା ଲାଗି ନିର୍ଦ୍ଦେଶନାମା ଜାରି କରିଛନ୍ତି। କରୋନା ଭାଇରସ୍ ଲାଗି ଦେଶର ବିଭିନ୍ନ ସ୍ଥାନରେ କଟକଣା ଜାରି ରହିଛି। ଯାହା ଫଳରେ ତେଲ ଟାଙ୍କି ଗାଡ଼ି ଠିକ୍ ସମୟରେ ପହଞ୍ଚି ପାରୁନାହିଁ। ଯେଉଁଥି ପାଇଁ ରାଜ୍ୟରେ ପେଟ୍ରୋଲ ଓ ଡିଜେଲ ଷ୍ଟକର ଅଭାବ ଦେଖାଦେଇଛି। ଏଭଳି ପରିସ୍ଥିତିରେ ସରକାର ଇନ୍ଧନ ରାସନ କରିବାକୁ ନିଷ୍ପତ୍ତି ନେଇଛନ୍ତି। ସରକାରଙ୍କ ନିର୍ଦ୍ଦେଶନାମା ଅନୁଯାୟୀ, ସ୍କୁଟରକୁ ୩ ଲିଟର, ଅନ୍ୟ ଦୁଇ ଚକିଆ ଯାନ ପାଇଁ ୫ ଲିଟର, ହାଲ୍କା ମୋଟରଯାନ ଅର୍ଥାତ୍ କାର ପାଇଁ ୧୦ ଲିଟର, ମିନି ଟ୍ରକ୍ ପାଇଁ ୨୦ ଲିଟର ପର୍ଯ୍ୟନ୍ତ ତେଲ ପକାଇପାରିବେ। ସେହିଭଳି ଟ୍ରକ୍ ଓ ବସ୍ଗୁଡ଼ିକ ୧୦୦ ଲିଟର ପର୍ଯ୍ୟନ୍ତ ତେଲ ଥରକେ ଭରିବେ। ଏହାଠାରୁ ଅଧିକ ପରିମାଣର ତେଲ ନ ଦେବା ଲାଗି ସରକାର ଟାଙ୍କିଗୁଡ଼ିକୁ ନିର୍ଦ୍ଦେଶ ଦେଇଛନ୍ତି। ତେଲ ଟାଙ୍କିଗୁଡ଼ିକରେ ମଧ୍ୟ ଗ୍ୟାଲେନ୍ କିମ୍ବା ଅନ୍ୟକୌଣସି ଡବା ସାହାଯ୍ୟରେ ତେଲ ନ ଦେବାକୁ କୁହାଯାଇଛି। ତେବେ ଚାଉଳ ଏବଂ ଅନ୍ୟାନ୍ୟ ଅତ୍ୟାବଶକୀୟ ସାମଗ୍ରୀ ପରିବହନ କରୁଥିବା ଯାନକୁ ଯିବା-ଆସିବା ପାଇଁ ପର୍ଯ୍ୟାପ୍ତ ତେଲ ଭରିବାକୁ ଅନୁମତି ଦିଆଯାଇଛି। ସରକାରଙ୍କ ଏହି ନିଷ୍ପତ୍ତି ଫଳରେ ମଙ୍ଗଳବାର ଅପରାହ୍ନ ସୁଦ୍ଧା ଅଧିକାଂଶ ପେଟ୍ରୋଲ ପମ୍ପରେ ତେଲ ଶେଷ ହୋଇଯାଇଛି।