ଅମରପାଲି,୩ା୯(ପୀତାମ୍ବର ସାହୁ)ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଅନ୍ତର୍ଗତ ସୁବଳୟା ଏକ ସଂସ୍କୃତି ସଂପନ୍ନ ଅଞ୍ଚଳ। ଏହି ଅଞ୍ଚଳର ବିଭିନ୍ନ ଗ୍ରାମରେ ବାର ମାସରେ ତେର ପର୍ବ ପାଳନ କରାଯାଇଥାଏ। ଏହାସହିତ ବର୍ଷର ବିଭିନ୍ନ ସମୟରେ ଯାନିଯାତ୍ରା ଆୟୋଜନ କରାଯାଇଥାଏ। ଉକ୍ତ ଯାନିଯାତ୍ରାରେ ହଜାର ହଜାର ଦର୍ଶକଙ୍କ ସମାଗମ ହୋଇଥାଏ। ଏହାକୁ ଦୃଷ୍ଟିରେ ରଖି କେତେଜଣ ବ୍ୟକ୍ତି ଓ କେତେକ ଅନୁଷ୍ଠାନ ଘୁଡଘୁଡ଼ିପଟି (ଜୁଆ ଖେଳ) ଆୟୋଜନ କରୁଛନ୍ତି। ସ୍ଥାନୀୟ ପୋଲିସ ସହିତ ସଲାସୁତୁରା କରି ବେଫିକର ଭାବେ ଜୁଆଖେଳ କରୁଥିବା ଦେଖିବାକୁ ମିଳୁଛି। ଗତ ୨୭ ତାରିଖରୁ ସୁବର୍ଣ୍ଣପୁର ଜିଲାର ସୁବଳୟାରେ ଆରମ୍ଭ ହୋଇଥିଲା ଝୁଲଣ ଯାତ୍ରା l ପାଞ୍ଚ ଦିନ ଧରି ହୋଇଥିବା ଉକ୍ତ ମେଳାରେ ପ୍ରତ୍ୟହ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରଯାଇଥିଲା। ଏହା ଦେଖିବାକୁ ବହୁ ସଂଖ୍ୟାରେ ଶ୍ରଦ୍ଧାଳୁଙ୍କ ସମାଗମ ହେଉଥିଲା। ମାତ୍ର ସୁବଳୟାରେ ମେଳା ଅବସରରେ ଖୁଲାମଖୁଲା ଘୁଡଘୁଡ଼ି ପଟି (ଜୁଆ ଖେଳ) କରାଯାଉଥିଲା। ଏଥିପାଇଁ କୌଣସି ଅନୁମତି ପ୍ରଶାସନ ଦେଇ ନ ଥିଲା। ଝୁଲଣ ଯାତ୍ରାରେ ଶାନ୍ତିଶୃଙ୍ଖଳା ରକ୍ଷା ପାଇଁ ବ୍ୟାପକ ପୋଲିସ ମୁତୟନ କରାଯାଇଥିଲା। ତଥାପି ଦିନରାତି ଜୁଆ ଖେଳ ହେଉଥିଲା। ପୋଲିସ ସବୁ ଦେଖି ନୀରବଦ୍ରଷ୍ଟା ସାଜିଥିଲା। ଫଳରେ ପୋଲିସର ଭୂମିକାକୁ ନେଇ ସାଧାରଣରେ ନା ନା ପ୍ରଶ୍ନବାଚୀ ସୃଷ୍ଟି ହୋଇଛି। ଅପରପକ୍ଷରେ ମେଳାରେ ଜୁଆଖେଳକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ଏନେଇ ସୁବଳୟା ଥାନା ଅଧିକାରୀ ସୁଶାନ୍ତ କୁମାର ପ୍ରଧାନଙ୍କୁ ପଚାରିବାରେ, ସେମିତି କୌଣସି ସୂଚନା ମିଳିନାହିଁ। ତେବେ କୌଣସି ସ୍ଥାନରେ ଜୁଆଖେଳକୁ ପ୍ରଶୟ ଦିଆଯିବ ନାହିଁ ବୋଲି ସେ ପ୍ରକାଶ କରିଛନ୍ତି। ଯଥାଶୀଘ୍ର ଅଞ୍ଚଳରେ ହେଉଥିବା ଜୁଆ ଖେଳ ଉପରେ ନଜର ରଖି ବିହିତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାକୁ ସାଧାରଣରେ ଦାବି ହେଉଛି।