ବଲିଉଡ୍ ଅଭିନେତ୍ରୀ ରିଚା ଚଢାଙ୍କ ଆଗାମୀ ଫିଲ୍ମ ‘ମ୍ୟାଡାମ୍ ଚିଫ୍ ମିନିଷ୍ଟର’ର ଟ୍ରେଲର ରିଲିଜ ହୋଇଛି। ଯାହାକୁ ନେଇ ହଙ୍ଗାମା ସୃଷ୍ଟି ହୋଇଛି। ରିଚାଙ୍କ ଅଭିନୟଠାରୁ ଆରମ୍ଭ କରି ଫିଲ୍ମର କାହାଣୀ ପର୍ଯ୍ୟନ୍ତ ପ୍ରତ୍ୟେକ ଦିଗ ଉପରେ ଅନେକ ଆଲୋଚନା ହେଉଛି। କିନ୍ତୁ ‘ମ୍ୟାଡାମ୍ ଚିଫ୍ ମିନିଷ୍ଟର’ ଟ୍ରେଲରକୁ ନେଇ ରାଜନୈତିକ କରିଡରରେ ଉତ୍ତେଜନା ତୀବ୍ର ହୋଇଛି। କୁହାଯାଉଛି ଯେ ‘ମ୍ୟାଡାମ୍ ଚିଫ୍ ମିନିଷ୍ଟର’ ବିଏସପି ମୁଖ୍ୟ ମାୟାବତୀଙ୍କ ଜୀବନରୁ ଅନୁପ୍ରାଣିତ।ଏଥି ସହିତ ସୌରଭ ଶୁକ୍ଲାଙ୍କ ଚରିତ୍ର କାଶିରାମଙ୍କ ଦ୍ୱାରା ଅନୁପ୍ରାଣିତ ହୋଇ ନିର୍ମାଣ କରାଯାଇଛି। ଉଭୟ ବିଏସପି ଏବଂ ଏସପି କର୍ମୀ ଏହି ଫିଲ୍ମକୁ ବିରୋଧ କରିବାକୁ ପ୍ରସ୍ତୁତ ହେଉଛନ୍ତି। ଗୋଟିଏ ପଟେ ବିଏସପି ଫିଲ୍ମରେ ଅନେକ ତଥ୍ୟ ଠିକ ନାହିଁ ବୋଲି କହୁଥିବାବେଳେ ଯାଦବଙ୍କ ଭାବମୂର୍ତ୍ତିକୁ କ୍ଷୁର୍ଣ୍ଣ କରିବାକୁ ଚେଷ୍ଟା କରାଯାଉଛି ବୋଲି ଏସପି ଯୁକ୍ତି କରୁଛନ୍ତି। ଏହି ବିବାଦ ଯୋଗୁ ‘ମ୍ୟାଡାମ୍ ଚିଫ୍ ମିନିଷ୍ଟର’ ଏବେ ଚର୍ଚ୍ଚାରେ ଅଛି। ଏକ ସାକ୍ଷାତକାରରେ ଫିଲ୍ମ ନିର୍ମାତା ଏହା ସ୍ପଷ୍ଟ କରିଛନ୍ତି ଯେ ‘ମ୍ୟାଡାମ୍ ଚିଫ୍ ମିନିଷ୍ଟର’ଏକ କାଳ୍ପନିକ କାହାଣୀ, ଏହାର କାହା ସହିତ କୌଣସି ସମ୍ପର୍କ ନାହିଁ। ସୁଭାଷ କପୁର ଏହି ଫିଲ୍ମର ନିର୍ଦ୍ଦେଶନା ଦେଉଛନ୍ତି। ଏହା ପୂର୍ବରୁ ସେ ଜଲି ଏଲଏଲବି ଭଳି ଏକ ପ୍ରସିଦ୍ଧ ଚଳଚ୍ଚିତ୍ରର ନିର୍ଦ୍ଦେଶନା ଦେଇଛନ୍ତି। ଜାନୁଆରୀ ୨୨ରେ ‘ମ୍ୟାଡାମ୍ ଚିଫ୍ ମିନିଷ୍ଟର’ ପ୍ରେକ୍ଷାଳୟରେ ମୁକ୍ତିଲାଭ କରିବାକୁ ଯାଉଛନ୍ତି। ରିଚା ଏବଂ ସୌରଭଙ୍କ ବ୍ୟତୀତ ମାନଭ କୌଲ ମଧ୍ୟ ଏହି ଚଳଚ୍ଚିତ୍ରରେ ଏକ ଗୁରୁତ୍ୱପୂର୍ଣ୍ଣ ଭୂମିକାରେ ନଜର ଆସିବେ।
