ବିଞ୍ଝାରପୁର,୨୦ା୩(ଡି.ଏନ.ଏ.): ବିଞ୍ଝାରପୁର ବ୍ଲକ ଅଧୀନ ଉତ୍ତରକୂଳ ପଞ୍ଚାୟତ ପାରିପଦା ଗ୍ରାମରେ ଜଳ ସଙ୍କଟ ଦେଖାଦେଇଛି। ଉକ୍ତ ପଞ୍ଚାୟତରେ ବସୁଧା ପାନୀୟ ଜଳ ପ୍ରକଳ୍ପ ଅଛି, ହେଲେ ଗ୍ରାମବାସୀଙ୍କୁ ପାଣି ମିଳୁନି। ଫଳରେ ଗ୍ରାମରେ ଥିବା ଗୋଟିଏ ନଳକୂଅ ଉପରେ ୧୩୦ ପରିବାର ନିର୍ଭର କରୁଛନ୍ତି। ରାତି ପାହିଲେ ନଳକୂଅ ପାଖରେ ମହିଳାଙ୍କ ଭିଡ଼ ଦେଖିବାକୁ ମିଳୁଛି। ଗୋଟିଏ ନଳକୂଅ ଉପରେ ଶତାଧିକ ପରିବାର ନିର୍ଭର କରୁଥିବାରୁ କୌଣସି କାରଣରୁ ବେଳେବେଳେ ନଳକୂଅ ଅଚଳ ହୋଇଗଲେ ଗ୍ରାମବାସୀ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି, ଯାହାକୁ ନେଇ ଅନେକ ସମୟରେ ସେମାନଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଉଛି। ଅନ୍ୟପଟେ ଜଳସ୍ତର କମିବା ଦ୍ୱାରା ଗ୍ରାମରେ ଥିବା ଅନ୍ୟ ୨ଟି ନଳକୂଅ ମଧ୍ୟ ଅଚଳ ହୋଇପଡିଛି।
ପଞ୍ଚାୟତବାସୀଙ୍କ ଜଳ ସମସ୍ୟା ଦୂର କରିବାକୁ ସରକାରଙ୍କ ପକ୍ଷରୁ ୨୦୧୮ରେ ୬୫ ଲକ୍ଷ ଟଙ୍କା ବ୍ୟୟ କରାଯାଇ ପଞ୍ଚାୟତରେ ୧ ଲକ୍ଷ ଲିଟର କ୍ଷମତା ବିଶିଷ୍ଟ ଏକ ବସୁଧା ପ୍ରକଳ୍ପ ନିର୍ମାଣ କରାଯାଇଥିଲା। ଏହି ପ୍ରକଳ୍ପରୁ ପଞ୍ଚାୟତର ବିଭିନ୍ନ ଗାଁକୁ ପାଇପ୍ ସଂଯୋଗ କରାଯାଇ ଜଳ ଯୋଗାଣ କରାଯାଇଥିଲା। ମାତ୍ର ଅଳ୍ପ କେଇଟା ଦିନପରେ ପାରିପଦା ଗ୍ରାମକୁ ଜଳ ଯୋଗାଣ ବନ୍ଦ ହୋଇଯାଇଛି। ଏ ନେଇ ଗ୍ରାମବାସୀ ବାରମ୍ବାର ବିଭାଗୀୟ ଅଧିକାରୀଙ୍କ ନିକଟରେ ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳି ନ ଥିବା ଗ୍ରାମର ତ୍ରିଲୋଚନ ମଲିକ, ସର୍ବେଶ୍ୱର ମଲିକ, ଜିତେନ୍ଦ୍ର ମଲିକ, ପ୍ରମିଳା ମଲିକ, ଜାନକୀ ମଲିକ, ରୀନାରାଣୀ ମଲିକ, ମନୋରମା ମଲିକ ଓ ଧ୍ରୁବଚରଣ ମଲିକ ପ୍ରମୁଖ ଅଭିଯୋଗ କରିଛନ୍ତି। ଏ ସମ୍ପର୍କରେ ଗ୍ରାମ୍ୟ ପାନୀୟ ଜଳ ଯୋଗାଣ କନିଷ୍ଠ ଯନ୍ତ୍ରୀ ତୃପ୍ତାଞ୍ଜଳି ରଥଙ୍କୁ ପଚାରିବାରୁ ପଞ୍ଚାୟତର ବିଭିନ୍ନ ଗ୍ରାମର ଲୋକ ମୋଟର ଲଗାଇ ନିଜନିଜ ଘରର ଟାଙ୍କିକୁ ପାଣି ଉଠାଉଛନ୍ତି, ଫଳରେ ପାରିପଦା ଗ୍ରାମକୁ ପାଣି ଯାଇପାରୁନି ବୋଲି ସେ ପ୍ରକାଶ କରିଛନ୍ତି। ଅନ୍ୟପକ୍ଷରେ ବ୍ଲକ୍ ଅଞ୍ଚଳର ବହୁ ଗାଁରେ ନଳକୂଅ ଅଚଳ ହେଉଥିବା ଦେଖିବାକୁ ମିଳିଛି, ଯାହାକୁ ନେଇ ଅଞ୍ଚଳବାସୀ ଚିନ୍ତା ପ୍ରକଟ କରିଛନ୍ତି। ଏଥିପ୍ରତି ବିଭାଗୀୟ ଉଚ୍ଚ କର୍ତ୍ତୃପକ୍ଷ ଦୃଷ୍ଟିଦେବାକୁ ଦାବି ହୋଇଛି।