ରାୟଗଡ଼ା,୧୦ା୩(ସ୍ବ.ପ୍ର.): ରାୟଗଡ଼ା ଜିଲା ସଦର ମହକୁମାରେ ପାନୀୟ ଜଳର ଅଭାବ ଦେଖାଦେଉଛି। ରାୟଗଡ଼ା ପରିପାର୍ଶ୍ୱରେ ନାଗାବଳୀ ଓ ଝଞ୍ଜାବତୀ ଦୁଇଟି ନଦୀ ପ୍ରବାହିତ ହୋଉଥିଲେ ମଧ୍ୟ ସହରବାସୀଙ୍କୁ ଉପଯୁ୍କ୍ତ ପରିମାଣର ପାଣି ମିଳୁନି। ଗ୍ରୀଷ୍ମ ଆରମ୍ଭ ପୂର୍ବରୁ ପିଇବା ପାଣି ସମସ୍ୟା ଦେଖାଦେଲାଣି। ସହରର ୨୪ଟି ୱାର୍ଡ଼ ମଧ୍ୟରୁ ୧୦ଟି ୱାର୍ଡ଼ର ବିଭିନ୍ନ ସାହିିରେ ଏହି ସମସ୍ୟା ଉତ୍କଟ। ଆଶ୍ଚର୍ଯ୍ୟର କଥା, ଏକାଧିକ ସାହିରେ ଜନସ୍ବାସ୍ଥ୍ୟ ବିଭାଗର ନଳକୂପ ଗୁଡିକରୁ ପାଣି ବାହାରୁନାହିଁ। ଅନ୍ୟପଟେ ଘରୋଇ ଭାବେ ଖନନ ହୋଇଥିବା ନଳକୂପ ଠିକ କାର୍ଯ୍ୟ କରୁଛି। ସରକାରୀ ନଳକୂପଗୁଡିକରେ ଗଭୀରକୁ ପାଇପ ଯାଇ ନ ଥିବାରୁ ପାଣି ବାହାରୁ ନ ଥିବା ସ୍ବେଚ୍ଛାସେବୀମାନେ ପ୍ରକାଶ କରିଛନ୍ତି। ନାମକୁ ମାତ୍ର ଖନନ କରି ଠିକାଦାର କାମ ସାରି ଦେଇଛନ୍ତି।
ସହରରେ ଶତାଧିକ ଅଚଳ ନଳକୂପ ରହିଛି। ଗାନ୍ଧୀନଗର ଠାରୁ ଆରମ୍ଭ କରି ଇନ୍ଦିରା ନଗର, ଗୋପୀନାଥ ନଗର, ଅଶୋକ ନଗର, ସାଇପ୍ରିୟା ନଗର, ରୟତ କଲୋନୀ, ଶାସ୍ତ୍ରୀନଗର, ଆଞ୍ଜେୟାପେଟା, ମାଙ୍କଡଝୋଲା ଅଞ୍ଚଳରେ ପାଣିର ଉତ୍କଟ ସମସ୍ୟା ଦେଖାଦେଉଛି। ପାଇପ ଜଳଯୋଗାଣ ବ୍ୟବସ୍ଥା ଠପ୍ ହୋଇଥିବା ନଜରକୁ ଆସିଛି। ଜନସ୍ବାସ୍ଥ୍ୟ ବିଭାଗ ପକ୍ଷରୁ ଘରକୁ ସଂଯୋଗ ହୋଇଥିବା ପାଇପ ଏବଂ ସାହିଗୁଡିକରେ ବସିଥିବା ଷ୍ଟାଣ୍ଡପୋଷ୍ଟରେ ପାଣି ଆସୁନି। ଏ ନେଇ ବାରମ୍ବାର ଜନସ୍ବାସ୍ଥ୍ୟ ବିଭାଗ କାର୍ଯ୍ୟାଳୟରେ ଅଭିଯୋଗ କଲେ କୌଣସି ସୁଫଳ ମିଳୁନାହିଁ। କେବଳ ଟ୍ୟାଙ୍କର ଯୋଗେ ଜଳ ଯୋଗାଣ କରି ବିଭାଗ ନିଜ ଦାୟିତ୍ୱ ସାରି ଦେଉଛି। ପ୍ରତିବର୍ଷ ଏହି ସମସ୍ୟା ଦେଖା ଦେଉଥିଲେ ମଧ୍ୟ ସ୍ଥାୟୀ ସମାଧାନ ପାଇଁ ପଦକ୍ଷେପ ଗ୍ରହଣ ହେଉ ନ ଥିବା ଗାନ୍ଧୀନଗର ୩ୟ ଗଳିର ବାସିନ୍ଦା ତଥା ବରିଷ୍ଠ ଆଇନଜୀବୀ ନବ କୁମାର କଣ୍ଟା କହିଛନ୍ତି। ପ୍ରତିବର୍ଷ ଲକ୍ଷାଧିକ ଟଙ୍କା ବ୍ୟୟରେ ବିଭାଗ ବିଭିନ୍ନ ମରାମତି କରୁଥିଲେ ବି କୌଣସି ସ୍ଥାୟୀ ସମାଧାନ ହେଉନାହିଁ। ୨୦୧୪ ପର୍ଯ୍ୟନ୍ତ ସହରରେ ଜଳଯୋଗାଣ ଠିକ ରହିଥିବା ବେଳେ ଏହା ପରଠାରୁ ସମସ୍ୟା ସୃଷ୍ଟି ହୋଇଛି। ତେବେ କେଉଁ କାରଣରୁ ଜଳଯୋଗାଣ ସମସ୍ୟା ସୃଷ୍ଟି ହୋଇଛି ତାହା ଠାବ କରିପାରୁନାହାଁନ୍ତି ଜନସ୍ବାସ୍ଥ୍ୟ ବିଭାଗର ଯନ୍ତ୍ରୀମାନେ। ବର୍ତ୍ତମାନ ମାର୍ଚ୍ଚ ମାସ ପାଇଁ କେବଳ ଠିକାଦାରଙ୍କ ବିଲ୍ କରିବାରେ ଯନ୍ତ୍ରୀମାନେ ବ୍ୟସ୍ତ ରହୁଥିବା ସାଧାାରଣରେ ଅଭିଯୋଗ ହୋଇଛି। ଏନେଇ ଜନସ୍ବାସ୍ଥ୍ୟ ବିଭାଗ ରାୟଗଡ଼ା ଉପଖଣ୍ଡ ନିର୍ବାହୀ ଯନ୍ତ୍ରୀ ସହଦେବ କିସାନଙ୍କୁ ପଚାରିବାରୁ ସେ ରାୟଗଡ଼ାକୁ ନୂଆ ଆସିଛନ୍ତି, ଯଦି ସମସ୍ୟା ରହିଛି ତାହାର ଯଥାଶୀଘ୍ର ସମାଧାନ କରାଯିବ ବୋଲି କହିଛନ୍ତି। ଆଶ୍ଚର୍ଯ୍ୟର କଥା ହେଉଛି ବିଭାଗୀୟ ଅଧିକାରୀଙ୍କ ପାଖରେ ସହରର କେଉଁ ଅଞ୍ଚଳରେ ପାନୀୟ ଜଳ ସମସ୍ୟା ରହୁଛି ତାହାର କୌଣସି ଖବର ନାହିଁ। ତେଣୁ ଏନେଇ ବିଶେଷ ଦୃଷ୍ଟି ଦେଇ ସମସ୍ୟାର ସମାଧାନ କରିବାକୁ ଅଞ୍ଚଳବାସୀ ଦାବି କରିଛନ୍ତି।