ଭଞ୍ଜନଗର, ୧।୧୧(ବାବୁଲା ପ୍ରଧାନ): ଭଞ୍ଜନଗର ଉତ୍ତର ଘୁମୁସର ବନଖଣ୍ଡରେ ଦ୍ୱିତୀୟ ପର୍ଯ୍ୟାୟ ବାଘ ଗଣନା ବୁଧବାର ଠାରୁ ଆରମ୍ଭ ହେବ। ବାଘ ଚଳପ୍ରଚଳ କରୁଥିବା ଅଞ୍ଚଳରେ ଟ୍ରାପ କ୍ୟାମେରା ଲଗାଯିବ। ଏଥିପାଇଁ ବିଭାଗ ପକ୍ଷରୁ କ୍ୟାମେରା ପ୍ରସ୍ତୁତ କରି ରଖାଯାଇଛି। ଏହି ପ୍ରକ୍ରିୟା ଜାନୁଆରୀ ୧୫ ତାରିଖ ପର୍ଯ୍ୟନ୍ତ ପର୍ଯ୍ୟାୟ କ୍ରମେ ଚାଲିବ। ଏହାପରେ ଜାନୁଆରୀ ୧୬ରୁ ୩୧ ମଧ୍ୟରେ ସମସ୍ତ ରିପୋର୍ଟ ଯାଞ୍ଚ କରି ଚୂଡାନ୍ତ ରିପୋର୍ଟ ପ୍ରକାଶିତ ହେବ। ପୂର୍ବରୁ ପ୍ରଥମ ପର୍ଯ୍ୟାୟରେ ପିଆଇପି ମାଧ୍ୟମରେ ବାଘର ସ୍ଥିତି ଜାଣିବା ପାଇଁ ଅକ୍ଟୋବର ୧୫ରୁ ୨୦ ପର୍ଯ୍ୟନ୍ତ ବାଘ ଗଣନା ହୋଇଥିଲା। ଏହି ସମୟରେ ୫ଟି ସ୍ଥାନରେ ବାଘର ପାଦ ଚିହ୍ନ ମିଳିଥିବା ବେଳେ ଆଉ ଗୋଟିଏ ସ୍ଥାନରେ ତାହା ପୁନରାବୃତ୍ତି ହୋଇଥିବା ଆଶଙ୍କା କରାଯାଉଛି। ତେଣୁ ବନଖଣ୍ଡରେ ୫ ଟି କଲରାପତରିଆ ବାଘ ଥିବା ଅନୁମାନ କରାଯାଉଛି। ଏହାକୁ ଦୃଢ଼ ନିଶ୍ଚିତ କରିବା ପାଇଁ ବୁଧବାରଠାରୁ ଟ୍ରାପ କ୍ୟାମେରା ଲାଗିବା ବ୍ୟବସ୍ଥା କରାଯାଇଛି। ସେହିପରି ମୁଜାଗଡ ରେଞ୍ଜରେ ଦୁଇମାସ ପୂର୍ବେ ଗୋଟିଏ କଲରାପତ୍ରିଆ ବାଘ ଦୁର୍ଘଟଣା ରେ ମୃତ୍ୟୁବରଣ କରିଥିଲା। ବର୍ତ୍ତମାନ ପିଆଇପି ମାଧ୍ୟମରେ ଗଣନା ସମୟରେ କୌଣସି ପାଦ ଚିହ୍ନ ମିଳିନାହିଁ। ତେଣୁ ଏହି ରେଞ୍ଜରେ ବର୍ତ୍ତମାନ ସୁଦ୍ଧା ବାଘ ଥିବାର କୌଣସି ପ୍ରମାଣ ମିଳିନାହିଁ। ତଥାପି ଟ୍ରାପ କ୍ୟାମେରା ରିପୋର୍ଟ ଆସିବା ପରେ ଜଣାପଡିବ ଏହି ବନଖଣ୍ଡ ରେ କେତେ ବାଘ ଅଛି। ଦକ୍ଷିଣ ଘୁମୁସର ବନଖଣ୍ଡ ରେ ମଧ୍ୟ ଏକାଧିକ ସ୍ଥାନରେ ବାଘର ପାଦ ଚିହ୍ନ ମିଳିଛି। କିନ୍ତୁ ଉଭୟ ବନଖଣ୍ଡର ଅଧିକାରୀମାନେ ବାଘ ଗଣନା ଏବଂ ବର୍ତ୍ତମାନ କେତେ ପାଦ ଚିହ୍ନ ମିଳିଛି ସେନେଇ କିଛି କହୁନାହାନ୍ତି।
ସୂଚନାଯୋଗ୍ୟ ଯେ ୨୦୨୨ ବାଘ ଗଣନା ଅନୁସାରେ ରାଜ୍ୟରେ ୨୦ଟି ମହାବଳବାଘ ଏବଂ ୭୬୦ କଲରାପତରିଆ ବାଘ ଥିବା କେନ୍ଦ୍ର ସରକାର କିଛିମାସ ପୂର୍ବେ ଘୋଷଣା କରିଥିଲେ। ରାଜ୍ୟର ୮ ଟି ସର୍କଲର ୪୨ଟି ବନଖଣ୍ଡରେ ବାଘ ଗଣନା ପାଇଁ ୯୨ ଲକ୍ଷ ଟଙ୍କା ଖର୍ଚ୍ଚ କରିବା ଲକ୍ଷ୍ୟ ରଖାଯାଇଛି। ସେଥିମଧ୍ୟରେ ପ୍ରତି ବନଖଣ୍ଡକୁ ପିଆଇପି ୧୦ ହଜାର ଟଙ୍କା ଏବଂ ସର୍କଲସ୍ତରରେ ତାଲିମ ପାଇଁ ୩୦ ହଜାର ଟଙ୍କା ଏବଂ ଯେଉଁଠି ଟ୍ରାପ କ୍ୟାମେରା ଖରାପ ଅଛି ସେଠି କ୍ୟାମେରା କିଣିବା ପାଇଁ ସର୍କଲସ୍ତରରେ ୧୦ ଲକ୍ଷ ଟଙ୍କା ଲେଖାଏଁ ଦେବା ବ୍ୟବସ୍ଥା କରାଯାଇଛି। କିନ୍ତୁ ଭଞ୍ଜନଗର ଉତ୍ତର ଘୁମୁସର ବନଖଣ୍ଡରେ ବିନା ଟଙ୍କାରେ ବାଘ ଗଣନା ଚାଲିଛି। ତଳିଆ କର୍ମଚାରୀମାନେ ହାତରୁ ଟଙ୍କା ଖର୍ଚ୍ଚ କରି ଆବଶ୍ୟକ ଜିନିଷ କିଣିବା ସହ ଶ୍ରମିକ ନିୟୋଜିତ କରୁଛନ୍ତି। ଦ୍ୱିତୀୟ ପର୍ଯ୍ୟାୟରେ ଟ୍ରାପ କ୍ୟାମେରା ଲାଗିବ। କ୍ୟାମେରା ବ୍ୟାଟେରୀ କିଣିବା ପାଇଁ ଟଙ୍କା ମଧ୍ୟ ଦିଆଯାଇନାହିଁ, ଯାହାକୁ ନେଇ କିଛି କର୍ମଚାରୀ ଅସନ୍ତୋଷ ବ୍ୟକ୍ତ କରିଛନ୍ତି।