ମାଧପୁର, ୨୭।୨:ଅନୁଗୋଳ ଜିଲା ଆଠମଲ୍ଲିକ ବ୍ଲକ ମାଧପୁର ପଞ୍ଚାୟତର ତିତିରିକାଟା ଗ୍ରାମ ଏବଂ ଏହାର ଆଖପାଖ ଅଞ୍ଚଳରେ ଡାଳୁଅ ଧାନରେ ରୋଗପୋକ ପ୍ରାଦୁର୍ଭାବ ଦେଖାଦେଇଛି। ଫଳରେ ଏକର ଏକର ଚାଷ ଜମିରେ ଧାନ ଫସଲ ଉଜୁଡ଼ିଯିବା ଆଶଙ୍କା ସୃଷ୍ଟିହୋଇଛି। କୃଷି ବିଭାଗ ପକ୍ଷରୁ ଚାଷୀଙ୍କୁ ସଚେତନ କରାଯାଉ ନ ଥିବାରୁ ଏଭଳି ସମସ୍ୟା ଉପୁଜିଥିବା ଅଭିଯୋଗ ହୋଇଛି। ଅନ୍ୟପଟେ କୃଷି ବିଭାଗ ସଚିବଙ୍କ ନିର୍ଦ୍ଦେଶରେ ରବିବାର କୃଷି ବିଶେଷଜ୍ଞମାନେ ପ୍ରଭାବିତ ଅଞ୍ଚଳ ପରିଦର୍ଶନ କରି ସ୍ଥିତି ଯାଞ୍ଚ କରିଛନ୍ତି।
ଜଳସେଚନ ସୁବିଧା ଥିବା ସମ୍ପୃକ୍ତ ଅଞ୍ଚଳର ବହୁ ଚାଷୀ ଖରାଦିନିଆ ଡାଳୁଅ ଧାନ ଚାଷ କରିଛନ୍ତି। ହେଲେ ତଳି ରୋଇବାର କିଛି ଦିନ ପରେ ରୋଗପୋକ ପ୍ରାଦୁର୍ଭାବ ଦେଖାଦେଇଛି। ଧାନଗଛ ଯେଉଁ ଭାବେ ବଢ଼ିବା କଥା, ସେପରି ବଢୁନାହିଁ। ତଳମୁହଁା ହୋଇ ମୂଳରୁ ଅଗଯାଏ ନାଲି ପଡ଼ିଯାଉଛି ଏବଂ ମରିଯାଉଛି। ସମସ୍ୟା ବିଷୟରେ ନାରୀନେତ୍ରୀ ଇଂ. ପ୍ରିୟଦର୍ଶିନୀ ସ୍ବାଇଁ ଜାଣିବା ପରେ ଏହାର ସମାଧାନ ଲାଗି କୃଷି ବିଭାଗ ସଚିବ ଅରବିନ୍ଦ ପାଢ଼ୀଙ୍କୁ ଅବଗତ କରାଇଥିଲେ। ସଚିବଙ୍କ ନିର୍ଦ୍ଦେଶରେ ଜିଲା କୃଷି ଅଧିକାରୀ ଦିଲେଶ୍ୱର ସାହୁ, ସହକାରୀ କୃଷି ଅଧିକାରୀ ଚଣ୍ଡୀ ପ୍ରସାଦ ମହାଳିକ ଶନିବାର ଉପଦ୍ରୁତ ଅଞ୍ଚଳ ପରିଦର୍ଶନ କରିଥିଲେ। ରବିବାର ଭୁବନେଶ୍ୱର କୃଷି ବିଜ୍ଞାନ କେନ୍ଦ୍ରର ବୈଜ୍ଞାନିକ ଦେବାଶିଷ ମିଶ୍ର, ମୁଖ୍ୟ ଜିଲା କୃଷି ଅଧିକାରୀ ପ୍ରମିଲ୍ କୁମାର ସ୍ବାଇଁ, କୃଷି ଅଧିଦର୍ଶକ ସୁନୀଲ କୁମାର ଶତପଥୀ ପ୍ରମୁଖ ଚାଷଜମି ପରିଦର୍ଶନ କରିଛନ୍ତି। ପ୍ରଭାବିତ ଚାଷୀଙ୍କୁ ସବ୍ସିଡି ମାଧ୍ୟମରେ କୀଟନାଶକ ଯୋଗାଇ ଦିଆଯିବ ବୋଲି ସହକାରୀ କୃଷି ଅଧିକାରୀ ଚଣ୍ଡୀ ପ୍ରସାଦ ମହାଳିକ ସୂଚନା ଦେଇଛନ୍ତି। ଅଧିକାରୀଙ୍କ ପରିଦର୍ଶନ ବେଳେ କୃଷିମିତ୍ର ଚିତ୍ତରଞ୍ଜନ ବିଶ୍ୱାଳ ଉପସ୍ଥିତ ଥିଲେ।
