ନୟାଗଡ଼ ଅଫିସ,୧୮ା୧୨(ଲୋକନାଥ ମିଶ୍ର): ନୟାଗଡ଼ ଜିଲାର ଧାନ ଜମିରେ ଗୋଖାଦ୍ୟ ପାଳ ଓ ନଡ଼ାକୁ ଏବେ କିଛି ବର୍ଷ ହେଲା ପୋଡ଼ା ଚାଲିଛି। ପାଳ ନଡା ପରି ଗୋଖାଦ୍ୟ ବିଲରେ ପୋଡ଼ାଯିବା ଯୋଗୁ ପରିବେଶ ପ୍ରଦୂଷଣ ବଢ଼ିବାରେ ଲାଗିଛି। ନଡ଼ା ଓ ପାଳ ପୋଡିର କୁପ୍ରଭାବ ନେଇ ଚାଷୀଙ୍କୁ ସଚେତନତା କରାଯାଉ ନ ଥିବାରୁ ଏହା ଅବାଧରେ ଚାଲିଛି। ଏଭଳିସ୍ଥିତି ଲାଗି ରହିଲେ ଆଉ କିଛି ବର୍ଷ ପରେ ଦିଲ୍ଲୀ ପରି ଅସୁବିଧା ନୟାଗଡ଼ ଜିଲାର ଗାଁ ଗହଳିର ଲୋକଙ୍କୁ ଭୋଗିବାକୁ ପଡିବ ବୋଲି ମତ ପ୍ରକାଶ ପାଇଛି। ତେବେ ଗାଈଗୋରୁ ଓ ଚାଳଘର ହ୍ରାସ କାରଣରୁ ଚାଷୀ ଖର୍ଚ୍ଚାନ୍ତ ହୋଇ ଆଉ ନଡା ଓ ପାଳ ଘରକୁ ନେଉ ନାହିଁ। ବରଂ ବିଲରେ ପାଳ ଓ ନଡା ପୋଡିବାକୁ ପରିସ୍ଥିତି ବାଧ୍ୟ କରୁଛି ବୋଲି ଅଭିଯୋଗ ଉଠିଛି।
ଏନେଇ ନୟାଗଡ ବ୍ଲକ ବାଲୁଗାଁର ଚାଷୀ ରଣଜିତ୍ ଦଳବେହେରା କୁହନ୍ତି, ଗାଁ ଗହଳିରେ ଗାଈ, ବଳଦ,ପୋଢ଼ ଓ ମଇଁଷ ଦେଖିବାକୁ ମିଳୁନାହାନ୍ତି। ଚାଷରେ ଯନ୍ତ୍ରର ବ୍ୟବହାର ବଢ଼ିବାପରେ ଏମାନଙ୍କର ସଂଖ୍ୟା ହ୍ରାସ ପାଇଲା। ଗାଈଗୋରୁଙ୍କ ପରି ଗୃହପାଳିତ ପ୍ରାଣୀଙ୍କ ସଂଖ୍ୟା ହ୍ରାସ ପାଇବାପରେ ଗୋଖାଦ୍ୟ ନଡା ଓ ପାଳ ଅଦରକାରୀ ହୋଇ ପଡିଛି। କିଛି ଛତୁଚାଷୀ ଯଦିଓ ନଡା କିଣୁଛନ୍ତି ତାହା ପର୍ଯ୍ୟାପ୍ତ ନୁହେଁ। ଘରେ ଗାଈଗୋରୁ ପରି ଗୃହପାଳିତ ପ୍ରାଣୀ ନ ଥିବାରୁ ଚାଷୀ ଆଉ ଖର୍ଚ୍ଚାନ୍ତ ହୋଇ ଘରକୁ ନଡା ଓପାଳ ଆଣୁନାହିଁ। ବିଲରେ ଧାନ ଅମଳଯନ୍ତ୍ରରେ ଧାନ ସଂଗ୍ରହ କରିବାପରେ ପାଳ ଓ ନଡାକୁ ବିଲରେ ପୋଡି ପକାଉଛି। ପ୍ରଥମତଃ ନଡା ଓ ପାଳ ପୋଡି ଯୋଗୁ ପରିବେଶ ପ୍ରଦୂଷିତ ହେଲା। ୨ୟରେ ଗାଈ ପରି ଗୃହପାଳିତ ପ୍ରାଣୀଙ୍କ ଅଭାବରୁ ଜମିରେ ଗୋବର ପରି ଜୈବିକସାର ଆଉ ପଡୁନି। ପୁଣି ଆଉ ଆଗଭଳି କ୍ଷୀର, ଦହି ଓ ଘିଅ ମିଳୁନି। ଆମେ କେବଳ ରୋଗ କିଣି ଚାଲିଛେ। ଏହାର ପରଣିତି ଆମେ ଭୋଗିଲେଣି। ଆଗକୁ ଆହୁରି ଭୟଙ୍କର ହେବ। ହେଲେ ଏଥି ନେଇ ସଚେତନତା ନାହିଁ। ଏନେଇ ବିଭିନ୍ନ ସମୟରେ କେନ୍ଦ୍ର ଓ ରାଜ୍ୟସରକାରଙ୍କୁ ଅବଗତ କରାଇଥିଲେ ମଧ୍ୟ ସୁଫଳ ମିଳୁନି ବୋଲି କହିଛନ୍ତି। ନୂଆଗାଁର ରମାକାନ୍ତ ପ୍ରଧାନ କୁହନ୍ତ, ଗାଁ ଗହଳିରେ ଗାଈ, ବଳଦ, ପୋଢ଼ଙ୍କ ସଂଖ୍ୟା କମିଚାଲିଛି। କିଛି ଆଦିବାସୀ ଗାଇ, ଗୋରୁ ରଖିଛନ୍ତି। ହେଲେ କିଛି ଅଣଚାଷୀ ନିଜକୁ ଚାଷୀ ଦର୍ଶାଇ ଗୁହାଳ ଯୋଜନାରେ ସହାୟତା ନେଉଛନ୍ତି। ଏପଟେ ସରକାର ଗୁହାଳ ଯୋଜନାରେ ସହାୟତା ଦେଉଛନ୍ତି ସେପଟେ ନଡା ଓପାଳ ପୋଡିର କାରଣ ଖୋଜୁନାହାନ୍ତି। ସରକାର ଏହାକୁ ଅଣଦେଖା କଲେ ପରିସ୍ଥିତି ଭୟାବହ ହେବାର ରହିଛି। ରଣପୁରର କିଶୋର ସ୍ବାଇଁ କୁହନ୍ତି, ଗାଈ, ବଳଦ ଓ ପୋଢ଼ଙ୍କ ସଂଖ୍ୟା କମିଗଲାଣି। ତେବେ ଯେଉଁଚାଷୀମାନେ ଦର୍ସି ଗାଈ, ମଇଁଷୀ ପାଳୁଛନ୍ତି ସେମାନଙ୍କୁ ୧ହଜାରରୁ ଆରମ୍ଭ କରି ସହାୟତା ଦେଲେ କିଛିଟା ସମସ୍ୟା ସମାଧାନ ହୋଇପାରନ୍ତା। ଗୋଡିପଡ଼ାର ଗଣେଶ୍ୱର ମିଶ୍ର କୁହନ୍ତି, ପୂର୍ବରୁ ଗାଁଗହଳିରେ ଚାଳ ଛପର ଘର ଥିଲା। ଏବେ ଚାଳ ଛପର ଘର ସ୍ଥାନରେ ଆଜବେଷ୍ଟସ ଓ ଛାତ ଘର ଦେଖିବାକୁ ମିଳୁଛି। ଚାଷୀ ଗାଈ ଓ ବଳଦ ରଖିଲାନି। ପୁଣି ଘରକୁ ନଡା ଛପର କରିଲାନି। ଏଣୁ ପାଳ ଓ ନଡାକୁ ବିଲରେ ଯଦି ନ ପୋଡିବ ତେବେ କଣ କରିବ। ଚାଷୀ କଣ କଲେ ଭଲ ହେବ ସରକାର ସଚେତନତା କରାଇବା ଦରକାର ବୋଲି କହିଛନ୍ତି। ପରିବେଶବିତ୍ ସଞ୍ଜୟ ସାହୁ କୁହନ୍ତି, ନଡା ଓ ପାଳ ପୋଡିର କାରଣ ସମସ୍ତେ ଜାଣନ୍ତି। ହେଲେ ଚାଷୀଙ୍କୁ ସଚେତନତା କରାଇଲେ ସେ ପାଳ ଓ ନଡାକୁ ନ ପୋଡି କଣ କରିଲେ ତାର ଲାଭ ହେବ ସେନେଇ ଉପାୟ ବତାଇବା ଦରକାର। ଅନ୍ୟପକ୍ଷେ ଛତୁ ଚାଷକୁ ପ୍ରୋସତ୍ାହନ ଦେବା ଦରକାର। ଏହା ଦ୍ୱାରା ଅଧିକ ସଂଖ୍ୟକ ନଡାର ଆବଶ୍ୟକ ପଡିବ। ପାଳକୁ କଣ କରାଯିବ ସେନେଇ ଉଦ୍ୟମ କରାଯିବା ଦରକାର। ଅନ୍ୟପକ୍ଷେ ନଡା ଓ ପାଳ ପୋଡି ବନ୍ଦ ପାଇଁ ପଦକ୍ଷେପ ନେବା ଜରୁରୀ ହୋଇ ପଡିଛି॥