ନୂଆଦିଲ୍ଲୀ, ୨।୧୧: ନିର୍ଦ୍ଦିିଷ୍ଟ ଏବଂ ପର୍ଯ୍ୟାପ୍ତ ଅଭିଯୋଗ ନ ଥିଲେ କୌଣସି ଗଣମାଧ୍ୟମ ସଂସ୍ଥାର ମୁଖ୍ୟ ସମ୍ପାଦକ(ଏଡିଟର ଇନ୍ ଚିଫ୍)ଙ୍କ ବିରୋଧରେ ମାନହାନି ମାମଲା ରୁଜୁ ହୋଇପାରିବ ନାହିଁ ବୋଲି ସୁପ୍ରିମକୋର୍ଟ ସୋମବାର ଏକ ଗୁରୁତ୍ୱପୂର୍ଣ୍ଣ ରାୟ ଶୁଣାଇଛନ୍ତି। ୨୦୦୭ରେ ଇଣ୍ଡିଆ ଟୁଡେ ମାଗାଜିନ୍ରେ ଏକ ଲେଖା ପ୍ରକାଶିତ ହୋଇଥିଲା। ଉକ୍ତ ଲେଖାକୁ ନେଇ ଇଣ୍ଡିଆ ଟୁଡେ ପ୍ରତିଷ୍ଠାତା ତଥା ଏଡିଟର ଇନ୍ ଚିଫ୍ ଅରୁଣ ପୁରୀଙ୍କ ବିରୋଧରେ ହୋଇଥିବା ଆପରାଧିକ ମାନହାନି (କ୍ରିମିନାଲ ଡିଫାମେଶନ) ମାମଲା ବିରୋଧରେ ଆଗତ ଆବଦେନର ଶୁଣାଣି କରି ପ୍ରଧାନବିଚାରପତି ୟୁ ୟୁ ଲଲିତ ଏବଂ ବିଚାରପତି ବେଲା ଏମ୍ ତ୍ରିବେଦୀଙ୍କୁ ନେଇ ଗଠିତ ଖଣ୍ଡପୀଠ ଏହି ରାୟ ପ୍ରକାଶ କରିଛନ୍ତି। ପୁରୀଙ୍କ ବିରୋଧରେ ହୋଇଥିବା ମାନହାନି ମାମଲାକୁ ଖାରଜ କରିବା ସମୟରେ ଖଣ୍ଡପୀଠ କହିଥିଲେ ଯେ, ଆବେଦନକାରୀଙ୍କ ବିରୋଧରେ କୋଣସି ନିର୍ଦ୍ଦିଷ୍ଟ ଏବଂ ପଯର୍ର୍ୟାପ୍ତ ଅଭିଯୋଗ ନାହିଁ। କୌଣସି ଲେଖକଙ୍କ ପାଇଁ ଏଡିଟର ଇନ୍ ଚିଫ୍ଙ୍କୁ ଉତ୍ତରଦାୟୀ କରାଯାଇପାରିବ ନାହିଁ। ପ୍ରେସ୍ ଆଣ୍ଡ ରେଜିଷ୍ଟ୍ରେଶନ ଅଫ୍ ବୁକ୍ ଆକ୍ଟ-୧୮୬୭ର ଦଫା ୭ ଅନୁସାରେ ସମ୍ଭାବନା ଦୃଷ୍ଟିକୋଣରୁ କୌଣସି ଏଡିଟର ଇନ୍ ଚିଫ୍ଙ୍କ ବିରୋଧରେ ଏଭଳି ମାମଲା ରୁଜୁ କରାଯାଇ ପାରିବ ନାହିଁ। ତେବେ ଯେଉଁ ସାମ୍ବାଦିକ ଉକ୍ତ ଲେଖା ଲେଖିତ୍ଥିଲେ ତାଙ୍କ ଉପରୁ ମାମଲା ପ୍ରତ୍ୟାହାର କରାଯାଇ ନ ଥିବା ଖଣ୍ଡପୀଠ ସ୍ପଷ୍ଟ କରିଛନ୍ତି।
ବ୍ରିଟେନ୍ସ୍ଥିତ ଭାରତୀୟ ଦୂତାବାସରେ ଅବସ୍ଥାପିତ ୩ଜଣ ଭାରତୀୟ ବୈଦେଶିକ ଅଧିକାରୀଙ୍କ ବିରୋଧରେ ଇଣ୍ଡିଆ ଟୁଡେ ପତ୍ରିକାରେ ‘ମିଶନ୍ ମିସ୍କଣ୍ଡକ୍ଟ’ ଶୀର୍ଷକ ଏକ ଲେଖା ପ୍ରକାଶ ପାଇଥିଲା। ଯେଉଁଥିରେ ଉକ୍ତ ଅଧିକାରୀଙ୍କ ବିରୋଧରେ ଯୌନ ନିର୍ଯାତନା, ଭିଜା ପ୍ରଦାନରେ ଦୁର୍ନୀତି ଏବଂ ବେଆଇନ ଆପ୍ରବାସନକାରୀଙ୍କୁ ଭାରତୀୟ ପାସ୍ପୋର୍ଟ ପ୍ରଦାନ କରିବା ଅଭିଯୋଗରେ ସେମାନଙ୍କୁ ଦେଶକୁ ତୁରନ୍ତ ଫେରାଇ ଅଣାଯାଇଥିବା ସମ୍ପର୍କରେ ଉଲ୍ଲେଖ ରହିଥିଲା। ବିଶେଷକରି ଉକ୍ତ ଲେଖାରେ ୩ ଅଧିକାରୀଙ୍କ ମଧ୍ୟରୁ ଓ. ପି. ଭୋଲାଙ୍କ ନାମ ଉଲ୍ଲେଖ ହୋଇଥିଲା। ତେଣୁ ଭୋଲା ମାନହାନି ମାମଲା ରୁଜୁ କରିଥିଲେ। ଉକ୍ତ ମାନହାନି ମାମଲା ଅରୁଣ ପୁରୀଙ୍କ ସମେତ ଉକ୍ତ ଲେଖାର ଲେଖକ ସୌରଭ ଶୁକ୍ଳାଙ୍କ ବିରୋଧରେ ଆଇପିସି ଦଫା ୩୪, ୧୨୦(ବି), ୪୦୫, ୪୬୮, ୪୭୦, ୪୭୧, ୪୯୯, ୫୦୧ ଏବଂ ୫୦୨ରେ ରୁଜୁ ହୋଇଥିଲା।