ବଲାଙ୍ଗୀର ଅଫିସ, ୨୦।୪ – ଅଢ଼େଇ ଦଶନ୍ଧିରୁ ଉର୍ଦ୍ଧ୍ୱ ସମୟ ଧରି ବଲାଙ୍ଗୀର ଜିଲାର ତାପମାତ୍ରା ବୃଦ୍ଧି ରାଜ୍ୟ ତଥା ଦେଶରେ ଆଲୋଚନାର ବିଷୟ ହୋଇଛି। ଟିଟିଲାଗଡ ସମେତ ଜିଲା ସଦର ମହକୁମା ବଲାଙ୍ଗୀର, ପାଟଣାଗଡ, କଣ୍ଟାବାଞ୍ଜି, ତୁଷରା ସହରାଞ୍ଚଳ ଏବଂ ଗ୍ରାମାଞ୍ଚଳରେ ତାପମାତ୍ରା ୪୫ ଡିଗ୍ରୀ ଟପିଯାଉଥିବା ରେକର୍ଡ କରାଯାଉଛି। ମଙ୍ଗଳବାର ବଲାଙ୍ଗୀରରେ ସର୍ବାଧିକ ତାପମାତ୍ରା ୪୪.୩ ଡିଗ୍ରୀ ରେକର୍ଡ କରାଯାଇଛି। ଏହା ଜିଲାରେ ଚଳିତବର୍ଷର ସର୍ବଧିକ ତାପମାତ୍ରା। ଟିଟିଲାଗଡରେ ସର୍ବାଧିକ ତାପମାତ୍ରା ୪୩.୫ ଡିଗ୍ରୀ ରହିଛି। ପୂର୍ବାହ୍ନ ୧୦ଟା ପରେ ଲୋକେ ଘରୁ ବାହାରି ପାରୁ ନାହାନ୍ତି। ପ୍ରଚଣ୍ଡ ଗରମ ସାଙ୍ଗକୁ ବିଦ୍ୟୁତ୍ ବିଭ୍ରାଟ୍ ସଙ୍ଗୀନ ପରିସ୍ଥିତି ସୃଷ୍ଟି କରିଛି। ଗ୍ରାମାଞ୍ଚଳରେ ଏହି ସମସ୍ୟା ଆହୁରି ଉତ୍କଟ ହୋଇଛି।
ଏପ୍ରିଲ ମାସରୁ ଅନେକ ସ୍ଥାନରେ ଉତ୍କଟ ଜଳାଭାବ ଦେଖାଦେଲାଣି। ଜଳାଶୟଗୁଡିକର ଜଳସ୍ତର କମିଗଲାଣି। ଫଳରେ ଲେକେ ସ୍ନାନଶୌଚ ପାଇଁ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଲୋକଙ୍କ କହିବା କଥା ଚଳିତବର୍ଷ ମାର୍ଚ୍ଚ ମାସରୁ ଖରା ବାଧିଲାଣି। ଝାଞ୍ଜି ପବନରେ ମୁହଁ ପୋଡି ଯାଉଛି। ଶ୍ରମଜୀବୀ ଶ୍ରେଣୀର ଲୋକେ ବିଶେଷ ଅସୁବିଧାର ସମ୍ମୁଖୀନ ହେଉଛନ୍ତି। ଏଭଳି ସମୟରେ ଅଂଶୁଘାତ ଆଶଙ୍କା ବୃଦ୍ଧି ପାଉଛି।