ବାରିପଦା,୬ା୮(ନୀଳାଦ୍ରି ବିହାରୀ ଦଣ୍ଡପାଟ):ମୟୂରଭଞ୍ଜ ଜିଲା ବିଜେଡି ସଂଗଠନରେ ରୋଚକ ସ୍ଥିତି ଦେଖିବାକୁ ମିଳିଛି। ଆଗଧାଡ଼ିର ନେତାଙ୍କ ମଧ୍ୟରେ ତାଳମେଳ ରହୁ ନ ଥିବା ବେଳେ କର୍ମୀ ହତାଶ ହେବାରେ ଲାଗିଛନ୍ତି। କେହି ଦଳ ଛାଡ଼ି ଭାଜପା ଶିବିରକୁ ଲମ୍ଫ ଦେଇଥିବା ବେଳେ ଆଉ କେହି ବିଜେଡି ହାତ ଛାଡ଼ିବା ପାଇଁ ସଜବାଜ ହେଉଛନ୍ତି। ଏହାରି ମଧ୍ୟରେ ଦଳୀୟ ସଂଗଠନକୁ ସୁଦୃଢ଼ କରିବା ପାଇଁ ରାଜ୍ୟ ସଭାପତି ନିର୍ଦ୍ଦେଶ ଦେଇଛନ୍ତି। ଆଲୋଚନା ଓ ବୈଠକ ମାଧ୍ୟମରେ କେତେଜଣ ନେତା ଏକାଠି ହେଉଥିବା ବେଳେ ଛାମୁଆ ନେତା ଅନୁପସ୍ଥିତ ରହୁଛନ୍ତି। ପୁଣି ଛାମୁଆ ନେତା ଡାକିଥିବା ବୈଠକକୁ ଜିଲାର ଆଉ କେତେକ ନେତା ଯାଉନାହାନ୍ତି। ଏହାଦ୍ୱାରା ଦଳୀୟ କନ୍ଦଳ ସ୍ପଷ୍ଟ ହେବାରେ ଲାଗିଛି।
୨୦୨୪ ନିର୍ବାଚନରେ ଜିଲାରେ ବିଜେଡି ଧରାଶାୟୀ ହେବା ପରେ ଏବେ ସମସ୍ତଙ୍କୁ ସଙ୍ଗଠନ ସଜାଡ଼ିବା ଚିନ୍ତା ଘାରିଛି। ଏହି ପରିପ୍ରେକ୍ଷୀରେ ସୋମବାର ଜିଲା ବିଜେଡି କାର୍ଯ୍ୟାଳୟରେ ଏକ ବୈଠକ ଅନୁଷ୍ଠିତ ହୋଇଥିଲା। ଏଥିରେ ଜିଲା ବିଜେଡି ସଭାପତି ତଥା ପୂର୍ବତନ ମନ୍ତ୍ରୀ ସୁଦାମ ମାର୍ଣ୍ଡି ଓ ତାଙ୍କ ଅନୁଗତମାନଙ୍କୁ ଦେଖିବାକୁ ମିଳି ନ ଥିଲା। ଏ ସମ୍ପର୍କରେ ଦଳର ନେତା ମୁହଁ ଖୋଲୁ ନ ଥିବା ବେଳେ କର୍ମୀ ମହଲରେ ଜୋରଦାର ଆଲୋଚନା ହେଉଛି।
ଜିଲାର ୯ ବିଧାନସଭା ଓ ଗୋଟିଏ ଲୋକ ସଭା ଆସନ ଭାଜପା ହାତେଇବାର ୪୦ ଦିନ ପରେ ବିଜେଡି ରାଜ୍ୟ ସଭା ସଦସ୍ୟା ମମତା ମହାନ୍ତ ଦଳ ଓ ପଦରୁ ଇସ୍ତଫା ଦେଇଥିଲେ। ଏହି ଘଟଣାର ୨୪ ଘଣ୍ଟା ନ ପୂରୁଣୁ ସେ ଭାଜପା ଶିବିରରେ ଯୋଗଦେବା ପରେ ବିଜେଡି ଅନ୍ତଃକନ୍ଦଳ ପଦାକୁ ଆସିଛି। ବିଜେଡି ସଭାପତି ତଥା ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅଗଷ୍ଟ ୨ରେ ଭୁବନେଶ୍ୱର ଡାକି ଜିଲାର ନେତୃବୃନ୍ଦଙ୍କ ସହ ଆଲୋଚନା କରିଥିଲେ। ମମତାଙ୍କ ଇସ୍ତଫା ଦଳ ଉପରେ କୌଣସି ପ୍ରଭାବ ପକାଇବ ନାହିଁ ବୋଲି ଜିଲାର ନେତାମାନେ ସଭାପତିଙ୍କୁ ଜଣାଇଥିଲେ। ତେବେ ସୋମବାର ଜିଲା କାର୍ଯ୍ୟକାରୀ ସଭାପତି ଜିତେନ୍ଦ୍ର ମହାନ୍ତିଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ପୂର୍ବତନ ଉପବାଚସ୍ପତି ସାନନ୍ଦ ମାରାଣ୍ଡି, ଜିଲା ପରିଷଦ ଅଧ୍ୟକ୍ଷା ଭାରତୀ ହଁାସଦା, ବାରିପଦା ପୌରାଧ୍ୟକ୍ଷ କୃଷ୍ଣାନନ୍ଦ ମହାନ୍ତି, ସୁବ୍ରମଣ୍ୟମ ମହାନ୍ତି, ଦେବାଶିଷ ମହାନ୍ତି, ପୂର୍ବତନ ବିଧାୟକ ଗଣେଶ୍ୱର ପାତ୍ର, ରାଜକିଶୋର ଦାସ, ଶ୍ରୀନାଥ ସୋରେନ, ବିଧାୟକ ପ୍ରାର୍ଥୀ ରାଇସେନ ମୁର୍ମୁ, ଅନସୂୟା ପାତ୍ର, ପ୍ରୀତିନନ୍ଦା କାନୁନ୍ଗୋ, ଡା.ଦେବାଶିଷ ମାରାଣ୍ଡି ପ୍ରମୁଖ ଜିଲାସ୍ତରୀୟ ନେତୃୃବୃନ୍ଦ ଉପସ୍ଥିତ ରହି ଆଲୋଚନା କରିଥିଲେ। ହେଲେ ଏଥିରେ ପୂର୍ବତନ ମନ୍ତ୍ରୀ ତଥା ବିଜେଡିର ଜିଲା ସଭାପତି ସୁଦାମ ମାର୍ଣ୍ଡି, ବିଧାୟିକା ପ୍ରାର୍ଥିନୀ ରଞ୍ଜିତା ମାର୍ଣ୍ଡି, ଯଶିପୁର ବିଧାୟକ ପ୍ରାର୍ଥୀ ଚକ୍ରଧର ହେମ୍ବ୍ରମ ଓ କରଞ୍ଜିଆ ବିଧାୟିକା ପ୍ରାର୍ଥତ୍ନୀ ତଥା ପୂର୍ବତନ ମନ୍ତ୍ରୀ ବାସନ୍ତୀ ହେମ୍ବ୍ରମଙ୍କ ସମେତ ଅନୁଗତମାନେ ଯୋଗଦେଇ ନ ଥିଲେ। ଉଲ୍ଲେଖଯୋଗ୍ୟ, ଜୁଲାଇ ୩୦ ତାରିଖରେ ସୁଦାମ ଏକ ବୈଠକ ଡାକିଥିବା ବେଳେ ମୟୂରଭଞ୍ଜ ସାଂଗଠନିକ ଜିଲା-୧ର ମାତ୍ର ୨/୩ ଜଣଙ୍କ ବ୍ୟତୀତ ଅନ୍ୟ ଜିଲା ନେତୃବୃନ୍ଦଙ୍କୁ ସେଠାରେ ଦେଖିବାକୁ ମିଳି ନ ଥିଲା। ଏହାର ଠିକ୍ ୩ ଦିନ ପରେ ନବୀନ ନିବାସକୁ ଜିଲା ବିଜେଡି ନେତୃବୃନ୍ଦ ଯାଇଥିବା ବେଳେ ସେଠାରେ ମଧ୍ୟ ସୁଦାମଙ୍କ ଦେଖା ନ ଥିଲା। ସୋମବାର ଅନୁଷ୍ଠିତ ବିଜେଡି ବୈଠକକୁ ସୁଦାମ ଆସି ନ ଥିଲେ। ଏଥିରୁ ଦଳୀୟ ଗୋଷ୍ଠୀ କନ୍ଦଳ ସ୍ପଷ୍ଟ ହେବାରେ ଲାଗିଛି। ଆଗାମୀ ଦିନରେ ମୟୂରଭଞ୍ଜ ଜିଲାରେ ଦଳର ମଙ୍ଗ କିଏ ଧରିବେ ତାହାକୁ ନେଇ କଳ୍ପନାଜଳ୍ପନା ଆରମ୍ଭ ହୋଇଗଲାଣି।