ପ୍ରୀତିପୁର,୧୯ା୧୨(ଡି.ଏନ୍.ଏ):ଯାଜପୁର ଜିଲା ବିଞ୍ଝାରପୁର ବ୍ଲକ ହଳଦିଡିହ ପଞ୍ଚାୟତ ଗଠନର ୨୦ ବର୍ଷ ପରେ ମଧ୍ୟ ଏଠାରେ ଅଫିସ ଗୃହ ନିର୍ମାଣ ହୋଇ ପାରିନାହିଁ। ରାଜସ୍ବ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀଙ୍କ ନିର୍ବାଚନ ମଣ୍ଡଳୀରେ ଏଭଳି ଅବହେଳାକୁ ଲୋକେ ସହଜେ ଗ୍ରହଣ କରି ପାରିନାହାନ୍ତି। ୨୦୦୨ରେ ଆଉଁରୀ ପଞ୍ଚାୟତରୁ ପୃଥକ୍ ହୋଇ ହଲଦିଡିହ ଏକ ନୂତନ ପଞ୍ଚାୟତ ଭାବେ ମାନ୍ୟତା ପାଇଥିଲା। ଇତି ମଧ୍ୟରେ ୨୦୦୨, ୨୦୦୭, ୨୦୧୨, ୨୦୧୭ ଏବଂ ୨୦୨୨ରେ ପଞ୍ଚାୟତ ନିର୍ବାଚନ ଅନୁଷ୍ଠିତ ହେବା ସହିତ ସରପଞ୍ଚ ଓ ସମିତିସଭ୍ୟମାନେ ନିର୍ବାଚିତ ହୋଇଛନ୍ତି। ହଳଦିଡିହ, ଫଳପୁର, ଚମ୍ପାପାଳ, ଗୁହାଳୀ, ଅଣ୍ଢାଳ ଆଦି ରାଜସ୍ବ ଗ୍ରାମକୁ ନେଇ ଏହି ପଞ୍ଚାୟତ ଗଠିତ ହୋଇଛି। ପ୍ରାୟ ୬ ହଜାରରୁ ଊର୍ଦ୍ଧ୍ୱ ଜନସାଧାରଣ ବସବାସ କରୁଥିବା ଏହି ପଞ୍ଚାୟତଟି ସର୍ବଦା ବନ୍ୟା ଦ୍ୱାରା ପ୍ରଭାବିତ ହୋଇଥାଏ । ଚାଷ ଓ ଗୋପାଳନ ନିମନ୍ତେ ନିର୍ଭରଶୀଳ ଉକ୍ତ ପଞ୍ଚାୟତର ଜନସାଧାରଣ ପ୍ରତି ବର୍ଷ ଖରସ୍ରୋତାର ଶାଖାନଦୀ ନୂଆମାହାରାର ବନ୍ୟାଜଳ ଦ୍ୱାରା କ୍ଷତିଗ୍ରସ୍ତ ହୋଇଥାନ୍ତି। ଫଳରେ ବନ୍ୟା ସମୟରେ ରିଲିଫ୍ ସାମଗ୍ରୀଠାରୁ ଆରମ୍ଭ ଭତ୍ତା ଓ ଅନ୍ୟାନ୍ୟ ସରକାରୀ ଯୋଜନାରେ ଆବେଦନ କରିବାକୁ ପଞ୍ଚୟତ କାର୍ଯ୍ୟାଳୟକୁ ଯିବାକୁ ପଡିଥାଏ। ମାତ୍ର ଏଠାରେ ପଞ୍ଚାୟତ କାର୍ଯ୍ୟାଳୟ ନ ଥିବା ଯୋଗୁ ଜନସାଧାରଣ ନାହିନାହିଁ ନ ଥିବା ଅସୁବିଧାରେ ସମ୍ମୁଖୀନ ହେଉଛନ୍ତି। ଯେଉଁମାନେ ସରପଞ୍ଚ ନିର୍ବାଚିତ ହେଉଛନ୍ତି ସେମାନ ନିଜ ଘରେ କାର୍ଯ୍ୟାଳୟ ଚଳାଇବାକୁ ବାଧ୍ୟ ହେଉଛନ୍ତି। ପ୍ରଶାସନ ପକ୍ଷରୁ ପ୍ରାୟ ୨ ବର୍ଷ ତଳେ ଫଳପୁର ଗ୍ରାମଠାରେ ପଞ୍ଚାୟତ କାର୍ଯ୍ୟାଳୟ ନିର୍ମାଣ ଆରମ୍ଭ ହୋଇଥିଲା ା ହେଲେ କୌଣସି ବାଦବିବାଦ ଯୋଗୁ ଅର୍ଦ୍ଦନିର୍ମିତ ଅବସ୍ଥାରେ ପଡିରହିଛି। ଏ ସଂକ୍ରାନ୍ତରେ ସରପଞ୍ଚ ଅନୂପମା ନାୟକଙ୍କୁ ପଚାରିବାରୁ ଜମି ଚିହ୍ନଟ ବିବାଦ ଯୋଗୁ ପଞ୍ଚାୟତ କାର୍ଯ୍ୟାଳୟ ଅଧପନ୍ତରିଆ ଭାବେ ପଡିରହିଛି। ଖୁବ୍ ଶୀଘ୍ର ଏହାର ସମାଧାନ ହେବ ବୋଲି ସେ କହିଥିଲେ।