ବେଗୁନିଆ,୧୦।୧୧(ହର ପ୍ରସନ୍ନ ପଣ୍ଡା): ଚାଷୀ ଓ ଚାଷର ଉନ୍ନତି ପାଇଁ ସରକାର ବହୁ ଯୋଜନା କାର୍ଯ୍ୟକାରୀ କରୁଛନ୍ତି। ହେଲେ ଚାଷଜମିକୁ ଜଳସେଚନ ପାଇଁ ପ୍ରଶାସନିକସ୍ତରରେ ଉପଯୁକ୍ତ ପଦକ୍ଷେପ ନିଆଯାଇ ନ ଥିବାରୁ ଚାଷୀ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏଭଳି ଦୃଶ୍ୟ ଖୋର୍ଦ୍ଧା ଜିଲା ବେଗୁନିଆ ବ୍ଲକ ଅଞ୍ଚଳରେ ଦେଖିବାକୁ ମିଳିଛି। ସରକାରଙ୍କ ଧାର୍ଯ୍ୟ ନିୟମ ଅନୁଯାୟୀ ଏହି ବ୍ଲକ ଅଞ୍ଚଳର ଚାଷୀଙ୍କ ହିତରେ ୩୩% ଜମିରେ ଜଳସେଚନ ବ୍ୟବସ୍ଥା ରହିବା ପରିବର୍ତ୍ତେ ଏବେ ୧୬.୧୩% ହୋଇଛି। ଯେତିକି ହୋଇଛି ତାହା ମଧ୍ୟ ବହୁ ଚାଷୀଙ୍କ ହିତରେ ଲାଗୁନି। ଫଳରେ ଚାଷୀମାନଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ଅନ୍ୟପକ୍ଷରେ ନିଅଣ୍ଟିଆ ବର୍ଷା ଯୋଗୁ ଚଳିତବର୍ଷ ଖରିଫ ଚାଷ ବାଧାପ୍ରାପ୍ତ ହୋଇଛି। ଜମିରେ ପାଣି ନ ଥିବାରୁ ଧାନ ଫସଲ ଉଜୁଡି ଯାଉଥିବା ବେଳେ ଆଗକୁ ରବି ଫସଲକୁ ନେଇ ଆଶଙ୍କା ଦେଖାଯାଇଛି।
ସୂଚନାଥାଉ କି, ଚଳିତବର୍ଷ ଖରିଫ ଚାଷ କାମ ଆରମ୍ଭରୁ ଆବଶ୍ୟକତାଠାରୁ ୧୬ ପ୍ରତିଶତ କମ୍ ବର୍ଷା ହୋଇଥିଲା। ବିଳମ୍ବରେ ହେଲେ ମଧ୍ୟ ଭାଦ୍ରବ ମାସରେ ସ୍ବାଭାବିକ ବର୍ଷା ହେବାରୁ ଧାନଚାଷ ଆଗେଇଥିଲା। ପୁଣି ଆଶ୍ୱିନ ମାସ ଆରମ୍ଭରୁ ବର୍ଷା ହେଉନାହିଁ। ଜଳସେଚନର ସୁବିଧା ନ ଥିବା ଓ ବର୍ଷା ଅଭାବରୁ ୮୦% ଜମିରେ ଧାନଥୋଡ଼ ଶୁଖିଗଲାଣି। ଫଳରେ ମରୁଡ଼ି ପରିସ୍ଥିତି ଉପୁଜିଛି। ଅନ୍ୟପଟେ ବେଗୁନିଆ ବ୍ଲକ ଅଞ୍ଚଳକୁ ମରୁଡ଼ି ଘୋଷଣା ଦାବିରେ କିଛିଦିନ ପୂର୍ବେ ଜିଲାପାଳ, ବିଭାଗୀୟ ଅଧିକାରୀଙ୍କୁ ଚାଷୀମାନେ ଦାବିପତ୍ର ପ୍ରଦାନ କରିଛନ୍ତି। ଏପରିକି ସ୍ଥାୟୀ ଜଳସେଚନର ବ୍ୟବସ୍ଥା ଥିଲେ ଫସଲ ନଷ୍ଟ ହୋଇ ନ ଥା’ନ୍ତା ବୋଲି ଚାଷୀଙ୍କ ପକ୍ଷରୁ କୁହାଯାଇଛି। ଗତ ଅଗଷ୍ଟ ୨୨ରେ ୫-ଟି ଅଧ୍ୟକ୍ଷ ଭି.କେ. ପାଣ୍ଡିଆନ ବେଗୁନିଆକୁ ଆସିଥିବା ବେଳେ ଚାଷୀଙ୍କ ହିତରେ ଜଳସେଚନ ଯୋଜନା ପ୍ରତି ଗୁରୁତ୍ୱ ଦେବାକୁ ସ୍ଥାନୀୟ ବିଧାୟକ ଓ ୨୧ ପଞ୍ଚାୟତର ସରପଞ୍ଚଙ୍କ ଦସ୍ତଖତ ଥାଇ ଏକ ନିବେଦନପତ୍ର ପ୍ରଦାନ କରାଯାଇଥିଲା। ଏହାପରେ ଜଳସେଚନ ବ୍ୟବସ୍ଥାକୁ ତ୍ୱରାନ୍ବିତ କରିବା ପାଇଁ ଜିଲାପାଳ ଓ ବିଭାଗୀୟ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲେ। ତେବେ କୌଣସି ପଦକ୍ଷେପ ନ ନିଆଯିବାରୁ ଚାଷୀ ଦିନବନ୍ଧୁ ବିଶ୍ବାଳ, ରାମଚନ୍ଦ୍ର ବେହେରା, ବଳରାମ ନାୟକଙ୍କ ସମେତ ବହୁ ଚାଷୀ ସଙ୍ଗଠନ ପକ୍ଷରୁ ଅସନ୍ତୋଷ ଦେଖାଦେଇଛି। ପ୍ରକାଶ ଯେ, ଏହି ବ୍ଲକର ୮୦% ଲୋକେ ଚାଷ ଉପରେ ନିର୍ଭର କରନ୍ତି। ଧାନ ଓ ରବି ଫସଲକୁ ଗୁରୁତ୍ୱ ଦିଆଯାଇଥାଏ। ଜଳସେଚନର ସେଭଳି ସୁବିଧା ନ ଥିବାରୁ ଚାଷୀମାନେ ବର୍ଷା ଉପରେ ନିର୍ଭର କରିଥା’ନ୍ତି। ଏହି ବ୍ଲକ ଅଞ୍ଚଳର ସରକାରଙ୍କ ପକ୍ଷରୁ ଚାଷୀଙ୍କ ହିତରେ ୬୨ଟି କେନାଲ,୨୪୨ ଲିଫ୍ଟ ପଏଣ୍ଟ, ଡଗ୍ ଓ୍ବେଲ ୧୧୮ଟି ଏବଂ ଅନ୍ୟାନ୍ୟ ୨୬ଟି ସେଚକେନ୍ଦ୍ରର ବ୍ୟବସ୍ଥା ହୋଇଛି। ସେହିପରି ବେସରକାରୀ ସେଚ ପ୍ରକଳ୍ପ ୩୧ଟି, ଲିଫ୍ଟ ପଏଣ୍ଟ ୧୬୯ଟି ବ୍ୟବସ୍ଥା କରାଯାଇଛି। ଏହାକୁ ନେଇ ସରକାରଙ୍କ ଧାର୍ଯ୍ୟ ୩୩ ଶତକଡା ହେବାକୁ ଥିବା ବେଳେ ଏପର୍ଯ୍ୟନ୍ତ ୧୬.୩% ବାସ୍ତବରେ ହେଉଛି। ଅନ୍ୟପକ୍ଷରେ ବିଭିନ୍ନ ସ୍ଥାନରେ ବିଭାଗୀୟ ପରିଚାଳନା ତ୍ରୁଟି ଯୋଗୁ ସେଚ ପଏଣ୍ଟ ଅଚଳ ହୋଇପଡିଛି।