ବେଙ୍ଗାଲୁରୁ,୧୫।୨: ଶିକ୍ଷାନୁଷ୍ଠାନଗୁଡ଼ିକରେ ହିଜାବ ବ୍ୟବହାର ନିଷେଧ କରିବା ପାଇଁ କୌଣସି ଆଇନ ନାହିଁ ବୋଲି କର୍ନାଟକ ହାଇକୋର୍ଟରେ ଛାତ୍ରୀମାନେ ଯୁକ୍ତି ବାଢ଼ିଛନ୍ତି। ହିଜାବ ପିନ୍ଧିଥିବାରୁ କଲେଜରେ ପ୍ରବେଶ ଅନୁମତି ମିଳି ନ ଥିବା ଛାତ୍ରୀମାନଙ୍କ ପକ୍ଷରୁ ବରିଷ୍ଠ ଆଇନଜୀବୀ ଦେବଦତ୍ତ କାମାତ୍ କହିଥିଲେ, ସମ୍ବିଧାନ ପ୍ରଦତ୍ତ ଧର୍ମୀୟ ସ୍ବାଧୀନତା ଦ୍ୱାରା ହିଜାବ ସୁରକ୍ଷିତ। କଲେଜ ଉନ୍ନୟନ କମିଟି ଏହାକୁ ବ୍ୟାନ୍ କରିପାରିବ ନାହିଁ ବୋଲି ସେ କହିଛନ୍ତି।
ହିଜାବକୁ ନେଇ ବିବାଦ ଲାଗି ରହିଥିବାବେଳେ ଗତ ସପ୍ତାହରେ ସରକାର ଏହା ଉପରେ କଲେଜ କର୍ତ୍ତୃପକ୍ଷ ନିଷ୍ପତ୍ତି ନେବାକୁ ଛାଡ଼ିଦେଇଥିଲେ। ସମ୍ବିଧାନର ଅନୁଚ୍ଛେଦ ୨୫ର ଦୁଇଟି ଧାରା ଉପରେ ଆଲୋଚନା କରି ମସ୍ତକ ଆବୃତ୍ତ କରୁଥିବା ବସ୍ତ୍ର ନିଷେଧ କରିବା ପାଇଁ ଆଇନ କେଉଁଠି ଅଛି ବୋଲି ବରିଷ୍ଠ ଆଇନଜୀବୀ ପ୍ରଶ୍ନ କରିଥିଲେ। ଅନୁଚ୍ଛେଦ ୨୫ ହିଜାବ ପିନ୍ଧିବାକୁ ସୁରକ୍ଷା ଦେଉନାହିଁ ସରକାର ଘୋଷଣା କରିବା ସମ୍ପୂର୍ଣ୍ଣ ତ୍ରୁଟିପୂର୍ଣ୍ଣ ବୋଲି ଆଇନଜୀବୀ କର୍ନାଟକ ହାଇକୋର୍ଟର ପୂର୍ଣ୍ଣାଙ୍ଗ ଖଣ୍ଡପୀଠ ଆଗରେ ଯୁକ୍ତି ବାଢ଼ିଛନ୍ତି। ଏପରିକି କେନ୍ଦ୍ରୀୟ ବିଦ୍ୟାଳୟରେ ୟୁନିଫର୍ମ ରଙ୍ଗର ହିଜାବକୁ ଅନୁମତି ଦିଆଯାଇଛି। ମୁସଲମାନ ଛାତ୍ରୀ ହିଜାବ ପିନ୍ଧିଲେ ଏହା କାହାକୁ ଆଘାତ ଦେଉନାହିଁ। ଏହା ଏକ ବିଶ୍ୱାସର କଥା ବୋଲି ଆଇନଜୀବୀ କହିଛନ୍ତି। କୋରାନରେ ହିଜାବକୁ ବାଧ୍ୟତାମୂଳକ କରାଯାଇଥିବାରୁ ଅନ୍ୟ କୌଣସି କର୍ତ୍ତୃପକ୍ଷଙ୍କ ପାଖକୁ ଯିବା ଆବଶ୍ୟକ ନାହଁ। ଏହା ଅନୁଚ୍ଛେଦ ୨୫ ଦ୍ୱାରା ସୁରକ୍ଷିତ ବୋଲି କାମାତ୍ କହିଥିଲେ।
ହିଜାବକୁ ଚ୍ୟାଲେଞ୍ଜ କରି ଦାଖଲ ହୋଇଥିବା ଏକାଧିକ ପିଟିଶନର ଶୁଣାଣି କରିବା ପରେ ମୁଖ୍ୟ ବିଚାରପତି ଋତୁରାଜ ଅଓ୍ବସ୍ତି, ଜଷ୍ଟିସ୍ କ୍ରିଷ୍ଣା ଏସ୍. ଦୀକ୍ଷିତ ଏବଂ ଜେ.ଏମ୍. ଖାଜି ମଙ୍ଗଳବାରକୁ ଶୁଣାଣି ସ୍ଥଗିତ ରଖିଛନ୍ତି।
