ନୂଆଗାଁ,୨୩।୬(ଧନେଶ୍ୱର ସାହୁ ): ନୟାଗଡ଼ ଜିଲା ନୂଆଗାଁ ବ୍ଲକ ନୂଆଗାଁ ସ୍ବାସ୍ଥ୍ୟ କେନ୍ଦ୍ରରେ ଦୀର୍ଘ ବର୍ଷ ହେଲା ଡାକ୍ତର ନାହାନ୍ତି। ଫଳରେ ସାଧାରଣ ଚିକିତ୍ସା ପାଇଁ ନୟାଗଡ଼ ମୁଖ୍ୟ ଚିକିତ୍ସାଳୟକୁ ଯିବାକୁ ପଡୁଛି। ତେଣୁ ତୁରନ୍ତ ନୂଆଗାଁ ଡାକ୍ତରଖାନାରେ ସ୍ଥାୟୀ ଡାକ୍ତର ନିଯୁକ୍ତି କରିବା ସହ ସମସ୍ତ ପଦବୀ ପୂରଣ କରାଯାଉ ବୋଲି ଦାବି କରିଛନ୍ତି ନୂଆଗାଁ କୃଷକ ବିକାଶ ମଞ୍ଚ ଓ ଅଞ୍ଚଳବାସୀ।
ମହିପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧୀନରେ ରହିଛି ନୂଆଗାଁ ସ୍ବାସ୍ଥ୍ୟକେନ୍ଦ୍ର, ବାହାଡାଝୋଲା ସ୍ବାସ୍ଥ୍ୟକେନ୍ଦ୍ର, ଡିମିରିପଲି ସ୍ବାସ୍ଥ୍ୟକେନ୍ଦ୍ର ଓ ଜଗନ୍ନାଥପ୍ରସାଦ ସ୍ବାସ୍ଥ୍ୟକେନ୍ଦ୍ର। ପ୍ରତି ସ୍ବାସ୍ଥ୍ୟ କେନ୍ଦ୍ରରେ ଜଣେ ଲେଖାଏ ଏମ୍ବିବିଏସ୍ ଡାକ୍ତର, ଆୟୁଷ ଡାକ୍ତର, ଫାର୍ମାସିଷ୍ଟ , ଏଏନ୍ଏମ୍ , ଦୁଇ ଜଣ ଆଟେଣ୍ଟାଣ୍ଟ, ଜଣେ ଲାବୋରେଟୋରି ଆସିଷ୍ଟାଣ୍ଟ, ଦୁଇ ଜଣ ଝାଡୁଦାର ରହିବାର ବ୍ୟବସ୍ଥା ରହିଛି। କିନ୍ତୁ କୌଣସି ଡାକ୍ତରଖାନାରେ ସମସ୍ତ କର୍ମଚାରୀ ନାହାନ୍ତି। କେବଳ ଡିମିରିପଲି ସ୍ବାସ୍ଥ୍ୟ କେନ୍ଦ୍ରରେ ଜଣେ ଏମ୍ବିବିଏସ୍ ଡାକ୍ତର ଥିବା ବେଳେ ଅନ୍ୟ ଡାକ୍ତରଖାନାରେ ସେହି ପଦବୀ ଖାଲି ପଡିଛି। କୋରଡା , ସୋରଡା, ସିକ୍ରିଡା, ଉଦୟପୁର, ନୂଆଗାଁ, ମାଇଛେଳି ଆଦି ପଞ୍ଚାୟତର ୧ହଜାରରୁ ଊର୍ଦ୍ଧ୍ୱ ଲୋକ ନୂଆଗାଁ ଡାକ୍ତରଖାନା ଉପରେ ନିର୍ଭର କରୁଥିଲେ ମଧ୍ୟ ଦୀର୍ଘ ବର୍ଷ ହେଲା ଏମ୍ବିବିଏସ୍ ଡାକ୍ତର ରହୁନାହାନ୍ତି। ଜଣେ ଆୟୁଷ ଡାକ୍ତରଙ୍କୁ ସପ୍ତାହରେ ଦୁଇ ଦିନ ପାଇଁ ଡେପୁଟେଶନରେ ଦିଆଯାଇଛି। ନୂଆଗାଁରେ ନିଯୁକ୍ତି ପାଇଥିବା ଲାବୋରେଟୋରି ଆସିଷ୍ଟାଣ୍ଟଙ୍କୁ ବାହାଡାଝୋଲା ଡେପୁଟେଶନରେ ଦିଆଯାଇଛି। ଜଣେ ଫାର୍ମାସିଷ୍ଟ ରୋଗୀଙ୍କ ସେବା କରିବାକୁ ବାଧ୍ୟ ହେଉଛନ୍ତି। ୬୭ ଲକ୍ଷ ଟଙ୍କା ବ୍ୟୟରେ ଡାକ୍ତରଖାନାର ନୂତନ ଗୃହ ନିର୍ମାଣ କରାଯାଇଥିଲେ ମଧ୍ୟ ସ୍ଥାୟୀ ଡାକ୍ତର ନ ଥିବାରୁ ରୋଗୀମାନଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ତେଣୁ ପ୍ରଥମେ ନୂଆଗାଁ ସ୍ବାସ୍ଥ୍ୟ କେନ୍ଦ୍ରରେ ସ୍ଥାୟୀ ଡାକ୍ତର ନିଯୁକ୍ତି ସହ ଖାଲି ଥିବା ସମସ୍ତ ପଦବୀ ପୂରଣ କରି ତା’ପରେ ନୂତନ ଗୃହକୁ ଉଦ୍ଘାଟନ କରାଯାଉ ବୋଲି ନୂଆଗାଁ ବ୍ଲକ କୃଷକ ବିକାଶ ମଞ୍ଚର ଆବାହକ ତଥା ନୂଆଗାଁ ପୂର୍ବତନ ସରପଞ୍ଚ ଶରତ ଚନ୍ଦ୍ର ସ୍ବାଇଁଙ୍କ ସମେତ ଅନ୍ୟମାନେ ଦାବି କରିଛନ୍ତି। ନୂଆଗାଁ ଡାକ୍ତରଖାନା ଖୋର୍ଦ୍ଧା-ବଲାଙ୍ଗୀର ୫୭ନଂ. ଜାତୀୟ ରାଜପଥ କଡରେ ଥିବାରୁ ନୂଆଗାଁରେ ସ୍ଥାୟୀ ଡାକ୍ତର ନିଯୁକ୍ତି ସହ ୨୪ ଘଣ୍ଟିଆ ସ୍ବାସ୍ଥ୍ୟ ସେବା ନିହାତି ଆବଶ୍ୟକ ବୋଲି ନୂଆଗାଁ ପୂର୍ବତନ ସମିତି ସଭ୍ୟ ରମେଶ ଚନ୍ଦ୍ର ପ୍ରଧାନ, ପୂର୍ବତନ ସରପଞ୍ଚ ଗଜେନ୍ଦ୍ର ନାଥ ପ୍ରଧାନ, ପୂର୍ବତନ ସମିତି ସଭ୍ୟ ଗୋପବନ୍ଧୁ ଖଣ୍ଡୁଆଳ ପ୍ରମୁଖ କହିଛନ୍ତି। ତେବେ ସ୍ଥାୟୀ ଡାକ୍ତର ନିଯୁକ୍ତି ବାବଦରେ ମହିପୁର ଗୋଷ୍ଠୀ କେନ୍ଦ୍ର ଅଧିକାରୀ ଡା. ସତିଶ ନିବେଦନଙ୍କୁ ପଚାରିବାରେ ସ୍ଥାୟୀ ଡାକ୍ତର ନିଯୁକ୍ତି କରିବାର ବ୍ୟବସ୍ଥା କରିଛୁ। କିଛି ଦିନ ମଧ୍ୟରେ ଡାକ୍ତର ଯୋଗ ଦେବେ ବୋଲି ସେ କହିଛନ୍ତି।