ଜଗତ୍ସିଂହପୁର ଅଫିସ, ୨୧ା୧୧: କେନ୍ଦ୍ର ହେଉ କି ରାଜ୍ୟ ସରକାର ଯୋଜନା ପରେ ଯୋଜନା କରି ଚାଲିଛନ୍ତି। କିନ୍ତୁ ଏସବୁ ଯୋଜନା ବାଟବଣା ହେଉଛି। ପ୍ରକୃତ ହିତାଧିକାରୀ ଏଥିରୁ ବଞ୍ଚତ୍ତ ହେଉଛନ୍ତି। ଏଭଳି ସଙ୍ଗିନ ଅଭିଯୋଗ କରିଛନ୍ତି ଜଗତ୍ସିଂହପୁର ବ୍ଲକ ସାଳଜଙ୍ଗ ପଞ୍ଚାୟତ ଅନ୍ତର୍ଗତ ଜୋତ ଗ୍ରାମର କିଛି ଲୋକ। ସେମାନଙ୍କ କହିବାନୁଯାୟୀ, ଏହି ଗ୍ରାମର ଶେଖ ମହମ୍ମଦ ଅବୁ ବକରଙ୍କ ଭଳି ଅନେକ ଲୋକ ଦାରିଦ୍ର୍ୟ ସୀମାରେଖା ତଳେ ରହିଛନ୍ତି। ମାତ୍ର ସେମାନେ ଆବାସିକ ଯୋଜନାରୁ ବଞ୍ଚତ୍ତ ହୋଇଛନ୍ତି। ଅବୁ ବକରଙ୍କ କହିବା କଥା ହେଲା, ସ୍ତ୍ରୀ ଓ ୨ ପୁଅକୁ ନେଇ ତାଙ୍କ ପରିବାର । ପ୍ରତ୍ୟହ ମଜୁରି ନ ଲାଗିଲେ ୪ ପ୍ରାଣୀ କୁଟୁମ୍ବଙ୍କୁ ଚଳାଇବା କଷ୍ଟକର। ଏଣେ ରୋଜଗାର ଚିନ୍ତା ତ ଅନ୍ୟପଟେ ମୁଣ୍ଡ ଗୁଞ୍ଜିବାକୁ ପକ୍କା ଘରଟିଏ ନାହିଁ। ଦୀର୍ଘ ବର୍ଷ ହେବ ଜରି ପଡ଼ିଥିବା ଘରେ କଷ୍ଟେମଷ୍ଟେ ଦିନ କାଟୁଛନ୍ତି ଏହି ଘରେ ରାତିରେ ତାରା ଓ ଦିନରେ ଖରା ଦେଖିବାକୁ ପଡୁଛି। ବର୍ଷା ହୋଇଗଲେ ପଡୋଶୀଙ୍କ ଘରେ ଆଶ୍ରା ନେବାକୁ ବାଧ୍ୟ ହେଉଛନ୍ତି । ଅନେକ ସମୟରେ ସାପ ଆଦି ଯନ୍ତୁ ଘରେ ପଶି ଯାଉଛନ୍ତି। ପ୍ରତ୍ୟେକ ଦିନ ବିପଦରେ କାଳାତିପାତ କରିବାକୁ ପଡୁଛି । ପକ୍କା ଘର ଖଣ୍ଡେ ପାଇଁ ସେ ସରପଞ୍ଚଙ୍କଠାରୁ ଆରମ୍ଭ କରି ବ୍ଲକ କାର୍ଯ୍ୟାଳୟ ପର୍ଯ୍ୟନ୍ତ ଯାଇ ନିରାଶ ହୋଇଛନ୍ତି। ଏ ପରିସ୍ଥିତିରେ ଭାଗ୍ୟକୁ ଆଦରି ରହିବା ଛଡା ତାଙ୍କ ପାଖରେ ଆଉ କିଛି ଉପାୟ ନାହିଁ ବୋଲି ସେ କ୍ଷୋଭର ସହ କହିଛନ୍ତି। ଏସମ୍ପର୍କରେ ବିଡିଓ ସାଗର ନନ୍ଦଙ୍କୁ ମୋବାଇଲ୍ରେ ଯୋଗାଯୋଗ କରାଯାଇଥିଲା, ମାତ୍ର ସେ ଫୋନ ଉଠାଇ ନ ଥିଲେ।
