ଅମରପାଲି,୩ା୩(ଡି.ଏନ.ଏ): ସୁବର୍ଣ୍ଣପୁର ଜିଲା ବୀରମହାରାଜପୁର ଅଞ୍ଚଳରେ ପଲିଥିନ ନିଷିଦ୍ଧ ପ୍ରହସନ ପାଲଟିଛି। ୨୦୧୯ ଅକ୍ଟୋବର ୨ତାରିଖ ଗାନ୍ଧୀ ଜୟନ୍ତୀରୁ ଓଡ଼ିଶା ସରକାର ପଲିଥିନ ବିକ୍ରି ଓ ବ୍ୟବହାର ଉପରେ ଅଙ୍କୁଶ ଲଗାଇଛନ୍ତି। କିନ୍ତୁ ସରକାରଙ୍କ ଏହି ନିର୍ଦ୍ଦେଶନାମା ସୁବର୍ଣ୍ଣପୁର ଜିଲା ବୀରମହାରାଜପୁର ଅଞ୍ଚଳରେ ପ୍ରହସନ ପାଲଟିଛି। ବିଭିନ୍ନ ଦୋକାନ, ବଜାରରେ ପଲିଥନ ଖୁଲମଖୁଲା ବିକ୍ରି ଚାଲିଛି।
ରାଜ୍ୟରେ ପଲିଥିନ ବିକ୍ରି ଉପରେ କଟକଣା ଲଗାଇବା ପରେ ବୀରମହାରାଜପୁରରେ ମଧ୍ୟ ଉପଜିଲାପାଳଙ୍କ ନେତୃତ୍ୱରେ ଲୋକଙ୍କୁ ସଚେତନତ କରାଯାଇଥିଲା। ଅଞ୍ଚଳରେ ପଲିଥିନ ବ୍ୟବହାର ନିଷିଦ୍ଧ ସହ ପ୍ଲାଷ୍ଟିକ ଥାଳି, ଚାମଚ, ଗିନା, କପ, ପ୍ଲେଟ, ଗ୍ଲାସ ଆଦି ମଧ୍ୟ ବ୍ୟବହାର ହୋଇପାରିବନାହିଁ ବୋଲି କଟକଣା ଲାଗିଲା। ଯେଉଁ ପଲିନର ସ୍ଥୂଳତା ୫୦ ମାଇକ୍ରନ ତଳକୁ ଥିବ ତାହା ବ୍ୟବହାର ଉପଯୋଗୀ ନୁହେଁ। କେବଳ କ୍ଷୀର କିମ୍ବା ଅନ୍ୟ ଔଷଧୀୟ ସାମଗ୍ରୀ ରଖିବାକୁ ଉପଯୁକ୍ତମାନର ପଲିଥନ ବ୍ୟବହାର କରାଯାଇପାରେ। ରାଜ୍ୟ ସରକାରଙ୍କ ଏହି ନିର୍ଦ୍ଦେଶନାମା ତୁରନ୍ତ କାର୍ଯ୍ୟକାରୀ କରିବା ପାଇଁ କୁହାଯାଇଥିଲେ ସୁଦ୍ଧା ବୀରମହାରାଜପୁର ଅଞ୍ଚଳରେ ଏହା ପାଳନ କରାଯାଉନାହିଁ। ମୁଖ୍ୟାଳୟ ସମେତ ଗାଁ ଗହଳିରେ ପଲିଥିନର ବହୁଳ ବ୍ୟବହାର ହେଉଥିଲେ ମଧ୍ୟ ଆଦୌ ଚଢାଉ କରାଯାଉନାହିଁ। ରାଜ୍ୟ ଜଙ୍ଗଲ ଓ ପରିବେଶ ବିଭାଗ ପକ୍ଷରୁ ୨୦୧୯ ସେପ୍ଟେମ୍ବର ୩୦ରେ ଏ ସଂକ୍ରାନ୍ତରେ ବିଜ୍ଞପ୍ତି ଜାରି କରାଯାଇଥିଲା। ଏଥିରେ ଉଲ୍ଲେଖ ଥିଲା ଯେଉଁ ପଲିଥନଗୁୁଡିକ ଠିକ ଭାବେ ନଷ୍ଟ ଅର୍ଥାତ୍ ମାଟିରେ ମିଶିପାରୁଛି ସେଗୁଡିକ ବ୍ୟବହାର ଉପଯୋଗୀ । ଅବଶିଷ୍ଟ ବ୍ୟବହାର ଅନୁପଯୋଗୀ ବୋଲି କୁହାଯାଇଛି। ତେଣୁ ସେହି ପ୍ରକାର ପଲିଥିନ ଉତ୍ପାଦନ ମଧ୍ୟ ହୋଇପାରିବ ନାହିଁ। ଏହି ରକମର ପଲିଥିନ ଉପରେ କଟକଣା ଲଗାଯାଇଥିଲା। ମାତ୍ର ସରକାରଙ୍କ ଉକ୍ତ ନିୟମ ମାନୁଛି କିଏ ବୋଲି ପ୍ରଶ୍ନ କରିଛନ୍ତି ସ୍ବେଚ୍ଛାସେବୀ ଦିଲୀପ ପ୍ରଧାନ। ପାନ ଦୋକାନଠାରୁ, ରାଶନ, ଷ୍ଟେଶନାରୀ ଓ ଜଳଖିଆ ଆଦି ପ୍ରାୟ ଦୋକାନରେ ପଲିଥନ ଖୋଲା ଖୋଲି କାରବାର ଚାଲିଛି। ବୀରମହାରାଜପୁର ଅଞ୍ଚଳରେ ପଲିଥନ ଉତ୍ପାଦନ ହେଉନାହିଁ। ତଥାପି ଏତେ ମାତ୍ରାରେ ପଲିଥିନ ବାହାରୁ ଆସୁଥିଲେ ମଧ୍ୟ ପ୍ରଶାସନ ସବୁଜାଣି ଚୁପ ରହିଛି। ପଲିଥିନ ବ୍ୟବହାରରେ ରୋକ ଲଗାଇବାରେ ପ୍ରଶାସନ ବିଫଳ ହେଉଥିବା ପରିବେଶପ୍ରେମୀ ପ୍ରେମାନନ୍ଦ ନାଏକ ପ୍ରକାଶ କରିଛନ୍ତି। ପଲିଥନ ବନ୍ଦ ପାଇଁ ଏନଫୋସର୍ର୍ମେଣ୍ଟ କମିଟି ଗଠନ କରାଯାଇଥିଲା। କିନ୍ତୁ କମିଟି ଆଶାନୁରୂପ ଚଢାଉ କରାଯାଉ ନ ଥିବାରୁ ପଲିଥିନ ପୂର୍ବପରି ବ୍ୟବହୃତ ହେଉଛି। ପଲିଥିନ ବ୍ୟବହାର ଉପରେ କଟକଣା ଲଗାଇବାକୁ ସାଧାରଣରେ ଦାବି ହେଉଛି।