ଅସ୍ତରଙ୍ଗ,୮।୧୦(ପ୍ରଦୀପ୍ତ ଦୀକ୍ଷିତ୍)ବିଦ୍ୟାଳୟ ଅଛି ହେଲେ ସେଠାକୁ ରାସ୍ତା ନାହିଁ। ପିଲାମାନେ ଚାଷ ଜମି ହିଡ଼ ଉପର ଦେଇ ଯାତାୟାତ କରୁଛନ୍ତି। ପୁରୀ ଜିଲା ଅସ୍ତରଙ୍ଗ ମଣ୍ଡଳ ଶିକ୍ଷାଧିକାରୀ ଅଧୀନ ଶିଶୁଅ ପଞ୍ଚାୟତରେ ଏପରି ଘଟଣା ଦେଖିବାକୁ ମିଳିଛି। ଛେନୁଅଁ ପ୍ରାଥମିକ ବିଦ୍ୟାଳୟ ୧୯୬୦ମସିହାରେ ସ୍ଥାପିତ ହୋଇଥିଲେ ମଧ୍ୟ ଏପର୍ଯ୍ୟନ୍ତ ବିଦ୍ୟାଳୟକୁ ଯିବାକୁ ଭଲ ରାସ୍ତା ଖଣ୍ଡିଏ ନାହିଁ। ବିଦ୍ୟାଳୟ ଚତୁଃପାର୍ଶ୍ୱ ଧାନବିଲ ଥିବାବେଳେ ପିଲାମାନେ ବିଲ ହିଡ଼ରେ ଯାତାୟାତ କରୁଛନ୍ତି। ମୁଖ୍ୟରାସ୍ତାରୁ ବିଦ୍ୟାଳୟର ଦୂରତା ୨୦୦ ମିଟରରୁ ଊର୍ଦ୍ଧ୍ୱ ହେବ। ବିଦ୍ୟାଳୟରେ ୧ମରୁ ୫ମ ଶ୍ରେଣୀ ପର୍ଯ୍ୟନ୍ତ ଥିବାବେଳେ ମୋଟ ୩୫ ଜଣ ପିଲା ପଢୁଛନ୍ତି। ସେମାନଙ୍କୁ ବିଦ୍ୟାଳୟ ପ୍ରଧାନ ଶିକ୍ଷକ ବୃନ୍ଦାବନ ଜେନା ଓ ସହକାରୀ ଶିକ୍ଷକ ଅଶୋକ ପ୍ରଧାନ ଶିକ୍ଷାଦାନ କରୁଛନ୍ତି। ଖରାଦିନେ ବିଦ୍ୟାଳୟକୁ ଯା’ ଆସ କରିହେଉଥିଲାବେଳେ ବର୍ଷା ହେଲେ ବିଲ ଦେଇ ଯିବା ପିଲାଙ୍କ ପାଇଁ କଷ୍ଟକର ହୋଇପଡୁଛି। ଏମିତି ହେଲେ ପିଲା ସେତିକି ଦିନ ସ୍କୁଲ ଆସନ୍ତିନି। ବିଦ୍ୟାଳୟଟି ସମ୍ପୂର୍ଣ ଭାବରେ ସମୁଦ୍ର ନିକଟବର୍ତ୍ତୀ ଥିବାରୁ ବିଦ୍ୟାଳୟ ପରିସରରେ ଥିବା ନଳକୂପରୁ ଭଲ ପାନୀୟ ଜଳ ମିଳୁନି। ବିଦ୍ୟାଳୟରେ ଏପରି ସମସ୍ୟା ବାବଦରେ ଗ୍ରାମବାସୀ ଓ ଅଭିଭାବକ ବାରମ୍ବାର ସରପଞ୍ଚଙ୍କୁ ଜଣାଇଥିଲେ ମଧ୍ୟ କୌଣସି ସୁଫଳ ମିଳିପାରିନାହିଁ। ଏ ବିଷୟରେ ଅତିରିକ୍ତ ଶିକ୍ଷାଧିକାରିଣୀ ମମତା ମଞ୍ଜରୀ ଦେଈଙ୍କୁ ପଚାରିବାରେ, ମୁଖ୍ୟ ରାସ୍ତାରୁ ବିଦ୍ୟାଳୟ ପର୍ଯ୍ୟନ୍ତ କିଛି ବ୍ୟକ୍ତିବିଶେଷଙ୍କ ନିଜସ୍ବ ଜାଗା ଥିବାରୁ ଏଭଳି ସମସ୍ୟା ଉପୁଜୁଛି। ବିଦ୍ୟାଳୟକୁ ରାସ୍ତା କରିବାକୁ ଉପରିସ୍ଥ ଅଧିକାରୀଙ୍କୁ ଜଣାଇ ଦିଆଯାଇଥିବା ସେ କହିଛନ୍ତି।