କେନ୍ଦୁଝର,୨୯।୧(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଜିଲା ଝୁମ୍ପୁରା ବ୍ଲକ୍ ମାଲଦା ପଞ୍ଚାୟତ ଅନ୍ତର୍ଗତ ବଣଜଙ୍ଗଲ ପାହାଡ଼ ପର୍ବତଘେରା ଜମିରିଡ଼ିହି ଗ୍ରାମବାସୀ ମୌଳିକ ସୁବିଧାରୁ ବଞ୍ଚିତ ରହିଛନ୍ତି। ରାଜ୍ୟ ସରକାର ବିଭିନ୍ନ ଯୋଜନାରେ ସ୍କୁଲ, ପର୍ଯ୍ୟଟନସ୍ଥଳ, ସହରଠାରୁ ଗାଁର ଉନ୍ନତୀକରଣ କରୁଛନ୍ତି। ମାତ୍ର ଆଜି ପର୍ଯ୍ୟନ୍ତ ଉକ୍ତ ଗାଁକୁ ଭଲ ରାସ୍ତାଟିଏ ନାହିଁ। ଗ୍ରାମର ଅନେକେ ଭତ୍ତା, ଆବାସ ଘରରୁ ମଧ୍ୟ ବଞ୍ଚତ୍ତ ରହିଛନ୍ତି। ବ୍ଲକ୍ର ଶେଷ ସୀମାରେ ଗ୍ରାମ ରହିଥିବାରୁ ବିକାଶର ଆଲୋକ ପହଞ୍ଚତ୍ ପାରୁନାହିଁ। ଅଭିଯୋଗ କଲେ ମଧ୍ୟ ପ୍ରଶାସନ ଅଣଦେଖା କରୁଛିି ବୋଲି ସ୍ଥାନୀୟ ବାସିନ୍ଦା କହିଛନ୍ତି।
କେନ୍ଦୁଝର ଜିଲା ମୁଖ୍ୟାଳୟରୁ ପ୍ରାୟ ୪୦ କି.ମି. ଓ ପଞ୍ଚାୟତଠାରୁ ୧୮ କି.ମି. ବ୍ୟବଧାନରେ ଉକ୍ତ ଗ୍ରାମ ଅବସ୍ଥିତ। ଗ୍ରାମରେ ୫୩ ଭୂୟାଁ ଓ ୬୦ ମୁଣ୍ଡା ଆଦିବାସୀ ସମ୍ପ୍ରଦାୟର ପରିବାର ବସବାସ କରିଆସୁଛନ୍ତି। ଗ୍ରାମକୁ ଗମନାଗମନର ସୁବିଧା ନାହିଁ। ଏଣୁ ପିଡିଏସ୍ ଚାଉଳ, ଭତ୍ତା ଓ ବିଭିନ୍ନ କାମରେ ପଞ୍ଚାୟତକୁ ଯିବା ପାଇଁ ବହୁ ଅସୁବିଧାର ସମ୍ମୁଖୀନ ହୋଇଥାନ୍ତି। ବହୁ ଆଦିବାସୀଙ୍କ ବୟସ ୬୦ରୁ ଊଦ୍ଧର୍ବ ହୋଇଥିଲେ ହେଁ ଭତ୍ତା ପାଇବାରୁ ବଞ୍ଚତ୍ତ ଅଛନ୍ତି। ସେହିପରି ଅନେକ ଆବାସ ଯୋଜନାରେ ଘର ଖଣ୍ଡେ ପାଇ ନ ଥିବାରୁ ଭଙ୍ଗା ଦଦରା ଘରେ ବର୍ଷା, ଶୀତ କାକରରେ ଭାଗ୍ୟକୁ ଆଦରି ପଡ଼ି ରହିଛନ୍ତି। ଜଙ୍ଗଲରୁ ସଂଗୃହୀତ କାଠି, ପତ୍ର ଓ ଅନ୍ୟାନ୍ୟ ସାମଗ୍ରୀ ବିକି ଚଳନ୍ତି। ଅନେକ ଓଳିଏ ଖାଇ ଓଳିଏ ଉପବାସରେ ଜୀବନ ଅତିବାହିତ କରୁଥିବା ଗ୍ରାମର ଶିବ ଦେହୁରୀ, ମୁକୁନ୍ଦ ମୁଣ୍ଡା, ଚୈତନ୍ୟ ନାୟକ ପ୍ରମୁଖ କହିଛନ୍ତି। ଏଣୁ ତୁରନ୍ତ ପିଡିଏସ୍ ସାମଗ୍ରୀ ନିମନ୍ତେ ଏହି ଗ୍ରାମରେ ବ୍ୟବସ୍ଥା କରିବା ସହିତ ଭତ୍ତା, ଚାଉଳ ଓ ମୋ କୁଡ଼ିଆ, ବିଜୁ ପକ୍କା ଘର, ପ୍ରଧାନମନ୍ତ୍ରୀ ଆବାସ ଆଦି ଯୋଜନାରେ ସାମିଲ କରି ଉକ୍ତ ଗ୍ରାମର ଗରିବ ପରିବାରକୁ ସହାୟତା କରିବାକୁ ସ୍ଥାନୀୟ ଅଞ୍ଚଳର ଲୋକେ ଜିଲା ପ୍ରଶାସନ ପାଖରେ ଅନୁରୋଧ କରିଛନ୍ତି। ଏ ନେଇ ଉକ୍ତ ଗ୍ରାମର ସମସ୍ୟା ଅନୁଧ୍ୟାନ କରି ସାମାଜିକ କର୍ମୀ ରଞ୍ଜନ ବେହେରା, ଜୟକୃଷ୍ଣ ନାୟକ ଜିଲା ପ୍ରଶାସନଙ୍କୁ ସହାୟତା ଦେବାକୁ ନିବେଦନ କରିଛନ୍ତି।