ପୁରୀ,୩।୮(ଅଜିତ୍ ମହାନ୍ତି)ପୁରୀ ପୋଲିସକୁ ଏକ ସଫଳତା ମିଳିଛି। ଡକାୟତି କରିବା ପାଇଁ ଯୋଜନା କରୁଥିବାବେଳେ ସଦର ଥାନା ପୋଲିସ ୬ ଅଭିଯୁକ୍ତଙ୍କୁ ଗିରଫ କରି ବୁଧବାର କୋର୍ଟଚାଲାଣ କରିଛି। ସେମାନେ ହେଲେ ଉକ୍ତ ଥାନା ଅନ୍ତର୍ଗତ ବୀରହରେକୃଷ୍ଣପୁର ଗ୍ରାମର ଶ୍ରୀଧର ଜେନା ଓରଫ ରିଙ୍କୁ, ଗିରଳ ଗ୍ରାମର ଜିତେନ୍ଦ୍ର ରାଉତ ଓରଫ ଜିତୁ, ଗୋରୁଆଳ ନୂଆପାଟଣା ଗ୍ରାମର ପ୍ରଭାତ ବରାଳ, ଗୋରୁଆଳ ବାଲିପଡିଆ ଗ୍ରାମର ସଞ୍ଜୟ ସୁନ୍ଦରା, ନୀଳଚକ୍ର ନଗରର ସୌମ୍ୟରଞ୍ଜନ ପଣ୍ଡା ଓଫର ବିକି ଏବଂ ଗୋଲାସାହିରେ ରହୁଥିବା ନୟାଗଡ଼ ଜିଲା ରଣପୁର ଥାନା ଅଞ୍ଚଳର ଆଶୀର୍ବାଦ ବରାଡ଼। ସେମାନଙ୍କଠାରୁ ଗୋଟିଏ ଖଣ୍ଡା, ଗୋଟିଏ ଲୁହାରଡ୍, ଗୋଟିଏ କଟୁରି, ୨ଟି ବୋମା, ଗୋଟିଏ ପ୍ୟାକେଟ ଲଙ୍କାଗୁଣ୍ଡ ପାଉଡର, ୬ଟି ପ୍ଲାଷ୍ଟିକ ବୋତଲ ଏବଂ ଦୁଇଟି ସିଗାରେଟ୍ ପ୍ୟାକେଟ ଜବତ କରିଛି। ପୋଲିସ ଏ ନେଇ ନଂ.୧୪୫/୨୩ରେ ମାମଲା ରୁଜୁ କରି ତଦନ୍ତ ଚଳାଇଛି ବୋଲି ଖବରଦାତା ସମ୍ମିଳନୀରେ ପୁରୀ ସଦର ଏସ୍ଡିପିଓ ଆର୍.ଏନ୍. ଭଞ୍ଜ ସୂଚନା ଦେଇଛନ୍ତି। ସୂଚନା ଅନୁଯାୟୀ, ମଙ୍ଗଳବାର ମଧ୍ୟରାତ୍ରିରେ ସଦର ଥାନା ଏସ୍ଆଇ ସୌମ୍ୟରଞ୍ଜନ ବିଶ୍ୱାଳ ଏବଂ ପୋଲିସ କର୍ମଚାରୀ ଥାନା ଅଞ୍ଚଳରେ ପାଟ୍ରୋଲିଂ କରୁଥିଲେ। ତେବେ ପୁରୀ ମଙ୍ଗଳାଘାଟ ବାଇପାସ୍ ରୋଡ ଜଳଭଣ୍ଡାର ରୋଡଠାରେ ବିଭିନ୍ନ ମାରଣାସ୍ତ୍ର ସହ କେତେଜଣ ଯୁବକ ଏକାଠି ହୋଇ ଡକାୟତି ପାଇଁ ଯୋଜନା କରୁଥିବାନେଇ ବିଶେଷ ସୂତ୍ରରୁ ପୋଲିସକୁ ଖବର ମିଳିଥିଲା। ପୋଲିସ ସେଠାରେ ଚଢ଼ାଉ କରିବାବେଳେ କେତେଜଣ ଫେରାର ପାଇଁ ଚେଷ୍ଟା କରିଥିବାବେଳେ ସମସ୍ତ ୬ଜଣଙ୍କୁ ଗିରଫ କରି ଥାନାକୁ ଆଣିଥିଲା। ପଚରାଉଚରା ସମୟରେ ସେମାନେ ବଡ଼ଧରଣର ଡକାୟତି ପାଇଁ ଯୋଜନା କରୁଥିବା ସ୍ବୀକାର କରିଥିଲେ। ଗିରଫ ସମସ୍ତ ଅଭିଯୁକ୍ତଙ୍କ ନାମରେ ଏକାଧିକ ମାମଲା ଥିବା ଭଞ୍ଜ ସୂଚନା ଦେଇଛନ୍ତି। ପୁରୀ ସଦର ଏସ୍ଡିପିଓ ଭାବେ ନୂତନ କରି ଯୋଗଦେଇଥିବା ଭଞ୍ଜ ଏହି ଅବସରରେ କହିଛନ୍ତି, ପୁରୀ ହେଉଛି ମହାପ୍ରଭୁଙ୍କ ସ୍ଥାନ। ଏଠାରେ ଅପରାଧର କୌଣସି ସ୍ଥାନ ନାହିଁ। ପୁରୀକୁ ଅପରାଧମୁକ୍ତ କରିବା ପାଇଁ ଏସ୍ପି ସାର୍ ଏବଂ ଜିଲା ପୋଲିସର ମୁଖ୍ୟ ଲକ୍ଷ୍ୟ ରହିଛି। ଖବରଦାତା ସମ୍ମିଳନୀରେ ସଦର ଥାନା ଅଧିକାରୀ ଓ ଅନ୍ୟ କର୍ମଚାରୀମାନେ ଉପସ୍ଥିତ ଥିଲେ।
