ପୁରୀ ଅଫିସ, ୨୯ା୧୧: ପୁରୀ ଜିଲା ମୁଖ୍ୟ ଚିକିତ୍ସାଳୟରେ ଥାଲାସେମିଆ ପିଡ଼ିତ ଶିଶୁଙ୍କ ମାଗଣାରେ ଅସ୍ଥିମଜା ପ୍ରତିରୋପଣ ଅସ୍ତ୍ରୋପଚାର (ବୋନ ମ୍ୟାରୋ ଟ୍ରାନ୍ସପ୍ଲାଣ୍ଟ ଅପରେଶନ) ସହ ଅନ୍ୟ ସୁବିଧା ଯୋଗାଇବା ଦାବିରେ ସୋମବାର ରୋଗୀ ଓ ସେମାନଙ୍କ ସମ୍ପର୍କୀୟମାନେ ପଦଯାତ୍ରାରେ ଆସି ଜିଲାପାଳଙ୍କ କାର୍ଯ୍ୟାଳୟ ଘେରାଉ କରିବା ସହ ଦାବିପତ୍ର ଦେଇଛନ୍ତି। ଅଖିଳ ଭାରତ ହିନ୍ଦୁ ମହାସଭାର ପୁରୀ ଜିଲା ସଭାପତି ଜୟପ୍ରକାଶ ସେଠୀଙ୍କ ନେତୃତ୍ୱରେ ଏହି ଆନ୍ଦୋଳନ ହୋଇଥିଲା। ପୁରୀ ଜିଲାରେ ୪୦୦ରୁ ଊର୍ଦ୍ଧ୍ୱ ଥାଲାସେମିଆ ପିଡ଼ିତ ରହିଛନ୍ତି। ଜିଲା ମୁଖ୍ୟ ଚିକିତ୍ସାଳୟରେ ଥାଲାମେସିଆ ପିଡ଼ିତ ଶିଶୁଙ୍କ ଚିକିତ୍ସା ବ୍ୟବସ୍ଥା ନାହିଁ। ଫଳରେ ସେମାନେ ସମସ୍ୟାର ସମ୍ମୁଖୀନ ହେଉଛନ୍ତି। ତୁରନ୍ତ ଏହି ରୋଗୀଙ୍କୁ ମାଗଣା ଆଇରନ ପରୀକ୍ଷା ମାପ, ରକ୍ତବଣ୍ଟନ, ଆଣ୍ଟି ଆଇରନ ମେଡିସିନ ସହ ଅନ୍ୟାନ୍ୟ ମେଡିସିନ ଯୋଗାଇଦେବା, ହେମାଟୋଲୋଜି ପାଇଁ ସ୍ବତନ୍ତ୍ର ଓଟି ଓ୍ବାର୍ଡ ସହ ଫ୍ରି ବୋନ ମ୍ୟାରୋ ଟ୍ରାନ୍ସପ୍ଲାଣ୍ଟ ଅପରେଶନ ବ୍ୟବସ୍ଥା କରାଯିବାକୁ ଦାବି କରାଯାଇଛି। ଏ ନେଇ ଜିଲାପାଳ ସମର୍ଥ ବର୍ମା ଅଭିଯୋଗକାରୀ ଏବଂ ମେଡିକାଲ ସୁପରିଣ୍ଟେଣ୍ଡେଣ୍ଟଙ୍କ ସହ ଆଲୋଚନା କରିଥିଲେ। ଆବଶ୍ୟକ ପଦକ୍ଷେପ ନିଆଯିିବ ବୋଲି ସେ କହିଛନ୍ତି। ସେହିପରି ରକ୍ତ ମିଳୁ ନ ଥିବା ଅଭିଯୋଗ ଉପରେ ଅନୁଧ୍ୟାନ କରାଯିବ ବୋଲି ଜିଲାପାଳ ବର୍ମା କହିଛନ୍ତି।