ମହାକାଳପଡ଼ା, ୩ା୧୧(ଡି.ଏନ.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଅଞ୍ଚଳରେ ଧାନ କ୍ଷେତରେ ପାଣି ନାହିଁ। ଫଳରେ ଥୋଡ ଧାନ ବା ଫୁଲ ବାହାରିବା ସମୟରେ ଗଛ ମୂଳରେ ପାଣି ନ ଥିବାରୁ ଭଲ ଅମଳ ହେବନାହିଁ ବୋଲି ଚାଷୀ କହିଛନ୍ତି। ଫଳରେ ଶୁଖିଲା ଧାନ କ୍ଷେତକୁ ବହୁ ସ୍ଥାନରେ ଚାଷୀମାନେ ପାଣି ପମ୍ପ, ସେଣାରେ ନିକଟ ଖାଲ ଓ ଗହୀର ପାଟରେ ଗଚ୍ଛିତ ଥିବା ପାଣି ଜମିକୁ ମଡାଉଥିବା ଦେଖିବାକୁ ମିଳିଛି। ଉପରମୁଣ୍ଡରୁ କେନାଲ ଜଳ ଆସିବା ବିଳମ୍ବ ହେଉଛି। ଏଥିଯୋଗୁ ବ୍ଲକର ମୁଖ୍ୟ ଜମ୍ବୁ-ମାର୍ଶାଘାଇ କେନାଲରେ ପାଣି ଅଭାବ ରହିବା ଓ କଟକି ଦଳ ଭର୍ତ୍ତି ହେବା ଯୋଗୁ ଜଳସେଚନ ବାଧାପ୍ରାପ୍ତ ହେଉଛି ବୋଲି ଚାଷୀମାନେ କହିଛନ୍ତି।
ବ୍ଲକର ୨୮ ହଜାର ହେକ୍ଟରରୁ ଅଧିକ ଚାଷ ଜମି ରହିଛି। ସେଥିମଧ୍ୟରୁ ୭,୫୦୦ ହେକ୍ଟର ଜମିରେ ଜଳ ସେଚନ ସୁବିଧା ରହିଥିଲେ ମଧ୍ୟ କେନାଲ ଜଳ ଆସିବା ପରେ ଜମିର ଶେଷ ପର୍ଯ୍ୟନ୍ତ ପହଞ୍ଚତ୍ ପାରୁନି ବୋଲି ଚାଷୀମାନେ କହିଛନ୍ତି। ବ୍ଲକର ଅନେକ ଅଞ୍ଚଳରେ ଅଣ ଜଳସେଚିତ ଜମିରେ କେନାଲ ଜଳ ପ୍ରବେଶ ସୁବିଧା ନାହିଁ। ଫଳରେ ଚାଷୀମାନେ ବାଧ୍ୟ ହୋଇ ଜମିରେ ବିଭିନ୍ନ ଉପାୟ ଅବଲମ୍ବନ କରି ପାଣି ମଡାଉଛନ୍ତି। ବ୍ଲକର ତେରଗଁା, ରୋମିତ, ଟିକର ପଙ୍ଗା, ଖୁରୁଶିଆ, ପାଟଳୀପଙ୍କ, ତିଖିରି, ଯଦୁପୁର, ରାଜଗଡ, ଅଳାଇଲୋ, ବିଜୟନଗର, ବଡିଢ଼ି, କେବୀଦାଣ୍ଡୁଆ, ସୁନିତି, ଗୋଗୁଆ, ନାଞ୍ଜୁରା, ଜମ୍ବୁ, ଦେଉଳପଡ଼ା, ମଙ୍ଗଳପୁର, ବରକନ୍ଧା, ପେଟଚ୍ଛେଲା ଆଦି ପଞ୍ଚାୟତ ସମେତ ବିଭିନ୍ନ ଅଞ୍ଚଳରେ କେନାଲ ଜଳ ସେଚନ ସୁବିଧା ନାହିଁ। ଫଳରେ ଚଳିତବର୍ଷ ଖରିଫ୍ ଧାନ ଫସଲ ଉତ୍ପାଦନ ପ୍ରଭାବିତ ହେବ ବୋଲି ହରି ଗୋଚ୍ଛାୟତ, ଦୀନବନ୍ଧୁ ରାଉତ, ହରି ଦାସଙ୍କ ସମେତ ବହୁ ଚାଷୀ ଅଭିଯୋଗ କରିଛନ୍ତି। ପୂର୍ବତନ ସରପଞ୍ଚ ନାଥ କୁମାର ଭୋଳ କହିବା କଥା ବହୁ ଚାଷୀ ଅଧିକ ଖର୍ଚ୍ଚାନ୍ତ ହୋଇ ହଳ, ମଜୁରୀ, ସାର, ଔଷଧ ପକାଇ ବହୁ ଅର୍ଥ ବ୍ୟୟ କରି ହାଇବ୍ରିଡ ଧାନ ଫସଲ କରିଛନ୍ତି। ଜମିରେ ଧାନ ବାହାରିବା ବେଳକୁ ପାଣି ନ ଥିବାରୁ ଫସଲ ଅମଳ କମିବ ବୋଲି ସେ କହିଛନ୍ତି। ଉପର ମୁଣ୍ଡରୁ କେନାଲ ଜଳ ଯୋଗାଇ ଦେବାକୁ ଚାଷୀମାନେ ଦାବି କରିଛନ୍ତି।
