ମହାକାଳପଡ଼ା, ୩।୯ (ଡି.ଏନ୍.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଅଞ୍ଚଳରେ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନା (ଏମ୍ଜିଏନ୍ଆର୍ଇଜିଏସ୍)ରେ ରାସ୍ତାପାର୍ଶ୍ୱରେ ବୃକ୍ଷ ରୋପଣ କରାଯାଇଥିବା କାଗଜ ପତ୍ରରେ ଦର୍ଶାଯାଇଛି। କେବଳ ସୂଚନା ଫଳକରେ ବୃକ୍ଷ ରୋପଣ ସୀମିତ ରହିଛି। ବ୍ଲକର ବଉଳକଣି ପଞ୍ଚାୟତରେ ୨ ବୃକ୍ଷରୋପଣ ପ୍ରକଳ୍ପ ନାଁରେ ୯ ଲକ୍ଷ ଟଙ୍କା ଚଳୁ କରାଯାଇଥିବା ଅଭିଯୋଗ ହେଉଛି। ଏହି ପ୍ରକଳ୍ପରେ ଗୋଟିଏ ବି ଗଛ ଦେଖିବାକୁ ମିଳୁନାହିଁ।
ମିଳିଥିବା ସୂଚନା ଅନୁସାରେ, ପଞ୍ଚାୟତର ଟାଙ୍କିବେଲାରି ଗ୍ରାମଠାରୁ ବଡମଠ ଗାଁ ପର୍ଯ୍ୟନ୍ତ ଓ ଜମ୍ବୁ-ମାର୍ଶାଘାଇ ମୁଖ୍ୟ କେନାଲ ବନ୍ଧ ସରୁମୁହଁ ଗାଁକୁ ଯାଇଥିବା ଶାଖା କେନାଲ ବନ୍ଧର ହରି ମଣ୍ଡଳଙ୍କ ଘରଠାରୁ ଲୁଣାଘେରି ଗାଁ ପର୍ଯ୍ୟନ୍ତ ଚଳିତବର୍ଷ ଚାରା ରୋପଣ କରାଯାଇଥିଲା। ରକ୍ଷଣାବେକ୍ଷଣ ଅଭାବରୁ ଚାରା ନଷ୍ଟ ହୋଇଥିବା କୁହାଯାଉଛି। ତେବେ ଏହି ଦୁଇ ପ୍ରକଳ୍ପରେ କେବଳ ସୂଚନା ଫଳକ ଦେଖିବାକୁ ମିଳୁଛି। ହେଲେ ଗଛ ଗୋଟିଏ ହେଲେ ବି ନାହିଁ। ତେବେ ଏହି ଦୁଇ ପ୍ରକଳ୍ପ ଲାଗି ଅନୁଦାନ ଆକାରରେ ପୃଥକ୍ ଭାବେ ୪ ଲକ୍ଷ ୫୭ ହଜାର ଲେଖାଏ ମୋଟ ୯ ଲକ୍ଷ ୧୪ ହଜାର ଟଙ୍କାକୁ ଉଠାଯାଇଛି। ଏହା ବିଭାଗୀୟ ଅଧିକାରୀ ଓ ଭେଣ୍ଡରଙ୍କ ମଧ୍ୟରେ ସଲାସୁତରା ଭାଗ ବଣ୍ଟା ହୋଇଛି ବୋଲି ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ଏଠାରେ ପ୍ରଶ୍ନ ଉଠୁଛି ଏହି ପ୍ରକଳ୍ପ ପାଇଁ ସରକାର ଏତେ ଟଙ୍କା ବ୍ୟୟ କରୁଥିଲେ ମଧ୍ୟ ତୃଣମୂଳ ସ୍ତରରେ ବିଭାଗୀୟ ଅଧିକାରୀ ଏହି ଅର୍ଥକୁ ଲୁଟ୍ ପାଟ କରୁଥିବା କୁହାଯାଇଛି। କେତେଜଣ ଅସାଧୁ ଅଧିକାରୀଙ୍କ ଅର୍ଥ ଲୁଟ୍କୁ ନେଇ ସ୍ଥାନୀୟ ବୁଦ୍ଧିଜୀବୀ ମହଲରେ ଅସନ୍ତୋଷ ପ୍ରକାଶ ପାଇଛି। ଏ ନେଇ ବୁଦ୍ଧିଜୀବୀମାନେ ଜିଲାପାଳଙ୍କୁ ଭେଟି ଦୁଇ ପ୍ରକଳ୍ପ ବାବଦରେ ଅର୍ଥ ଲୁଟ୍ ହୋଇଥିବା ନେଇ ତଦନ୍ତ କରିବାକୁ ଅଭିଯୋଗ ପତ୍ର ଦେବା ନେଇ ସ୍ଥାନୀୟ ଅଞ୍ଚଳରେ ଚର୍ଚ୍ଚା ଜୋର ଧରିଛି। ସେହିପରି ବ୍ଲକର ବିଭିନ୍ନ ଅଞ୍ଚଳରେ ବୃକ୍ଷ ରୋପଣ ପ୍ରକଳ୍ପ ନାଁରେ ବିପୁଳ ଅର୍ଥ ଚଳୁ କରାଯାଇଛି ବୋଲି ଅଭିଯୋଗ ହେଉଛି। ଅପରପକ୍ଷ ଏହି ଦୁଇ ପ୍ରକଳ୍ପରେ ନିୟୋଜିତ କେତେଜଣ ଶ୍ରମିକଙ୍କ ଜବ୍କାର୍ଡକୁ ନେଇ କାଗଜପତ୍ରରେ ଏମାନଙ୍କ ଟଙ୍କାକୁ ହଡ଼ପ କରାଯାଉଥିବା ଅଭିଯୋଗ ହେଉଛି। ଏ ସମ୍ପର୍କରେ ବ୍ଲକ ସହକାରୀ ଯନ୍ତ୍ରୀ ପରମାନନ୍ଦ ନାୟକଙ୍କୁ ପଚାରିବାରେ ୨ଟି ବୃକ୍ଷ ରୋପଣ ପ୍ରକଳ୍ପରେ ଚାରାଗୁଡିକ ନଷ୍ଟ ହୋଇଯାଇଛି। ପୁଣି ଚାରାରୋପଣ କରାଯିବ ବୋଲି ଦାୟିତ୍ୱରେ ଥିବା ପଞ୍ଚାୟତ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି।