କେନ୍ଦୁଝର,୯ା୧୨:ସାନ୍ତାଳମାନଙ୍କର ଲୋକନୃତ୍ୟ ଲୋକଙ୍କ ମନକୁ ଛୁଉଁଥିବା ବେଳେ ବିଭିନ୍ନ କାର୍ଯ୍ୟକ୍ରମରେ ନୃତ୍ୟ ଦେଖିବାକୁ ମିଳେ। ଆଧୁନିକତାର ଚାକଚକ୍ୟରେ ଏହି ଲୋକନୃତ୍ୟ ଏବେ ସଂଘର୍ଷ କରୁଛି। ସରକାରୀସ୍ତରରେ ପ୍ରୋତ୍ସାହନର ଅଭାବ ଯୋଗୁ ଆକର୍ଷଣ ହରାଇବାରେ ଲାଗିଛି। ପୂର୍ବରୁ ସାନ୍ତାଳୀ ବେଶଭୂଷାରେ ଏହି ନୃତ୍ୟ ପରିବେଷଣ କରାଯାଉଥିଲା। ବର୍ତ୍ତମାନ ସାନ୍ତାଳୀ ଲୋକନୃତ୍ୟ ପରିବେଷଣ କରୁଥିବା ଭଉଣୀଭାଇମାନେ ନୃତ୍ୟକୁ ସରସସୁନ୍ଦର କରିବା ପାଇଁ ପୋଷାକ ବଦଳାଇଛନ୍ତି। ଲୋକନୃତ୍ୟକୁ ବଞ୍ଚାଇ ରଖିବାକୁ କେନ୍ଦୁଝର ଲୋକନୃତ୍ୟ ମାନ୍ୟତା ପ୍ରଦାନ କରିବାକୁ କେନ୍ଦୁଝର ପୌରପାଳିକାର ପୂର୍ବତନ ନଗରପାଳ ମୀନାକ୍ଷୀ ମାଝୀ ଦାବି କରିଛନ୍ତି। କେନ୍ଦୁଝର ଜିଲାର ସୁନାରିପଶି, ମାଛଗଡ଼, ଘଟଗାଁ ନିକଟବର୍ତ୍ତୀ ମୁଦ୍ରାବେଡ଼ା ଆଦି କେତେକ ଗ୍ରାମରେ ନୃତ୍ୟ ପରିବେଷଣ ପାଇଁ ଭିନ୍ନ ଭିନ୍ନ ଦଳମାନେ ବେଶ୍ ସୁନାମ ଅର୍ଜନ କରିପାରିଛନ୍ତି। ରାଜ୍ୟ ସରକାରଙ୍କ ପକ୍ଷରୁ କଳାସଂସ୍କୃତିର ପ୍ରଚାର ଓ ପ୍ରସାର ପାଇଁ ଲକ୍ଷ ଲକ୍ଷ ଟଙ୍କା ଅନୁଦାନ ଦିଆଯାଉଛି। କେନ୍ଦୁଝର ଜିଲାର ବିଭିନ୍ନ ସମ୍ପ୍ରଦାୟ ବିଶେଷକରି ଆଦିବାସୀ ଗେଁାଣ୍ଡ ସମ୍ପ୍ରଦାୟର ପାରମ୍ପରିକ ଯୁଦ୍ଧକଳା ନୃତ୍ୟ, ସାନ୍ତାଳୀ ନୃତ୍ୟ, କୁଡୁମୀଙ୍କ ଝୁମର, ମାଝୀ ନାଚ, ମୁଣ୍ଡା ନାଚ, ରାମତାମସା ଆଦି ଲୋକନୃତ୍ୟ ଦଳଗୁଡ଼ିକୁ କଳାସଂସ୍କୃତି ଯୋଜନାରେ ପ୍ରଚାର ପ୍ରସାର ପାଇଁ ଅନୁଦାନ ଯୋଗାଇ ଦିଆଗଲେ ଆଦିବାସୀ ଲୋକନୃତ୍ୟ ମଧ୍ୟ ପ୍ରଚାର ପ୍ରସାର ସହ ପୁନଃଜୀବନ ଲାଭକରନ୍ତା ବୋଲି ମତପ୍ରକାଶ ପାଇଛି।
ଦୀପକ ମିଶ୍ର