ଭୁବନେଶ୍ୱର, ୨୩। ୭(ସୁନିତ୍ ମିଶ୍ର): କଂଗ୍ରେସ ବିଧାୟକ ଦଳ ବୈଠକ ସୋମବାର ବିଧାନସଭାର ୫୪ ନମ୍ବର ପ୍ରକୋଷ୍ଠରେ ଅନୁଷ୍ଠିତ ହୋଇଛି। ନୂତନ ଭାବେ ନିଯୁକ୍ତ ହୋଇଥିବା ବିଧାୟକ ଦଳ ନେତା ରାମଚନ୍ଦ୍ର କାଡାମଙ୍କ ନେତୃତ୍ୱରେ ଏହି ବୈଠକ ଅନୁଷ୍ଠିତ ହୋଇଥିବା ବେଳେ ଏଥିରେ ବରିଷ୍ଠ ବିଧାୟକ ତାରା ପ୍ରସାଦ ବାହିନୀପତି ସାମିଲ ହୋଇ ନାହାନ୍ତି। ତାଙ୍କ ବଦଳରେ ପଟ୍ଟାଙ୍ଗୀ ବିଧାୟକ ରାମଚନ୍ଦ୍ର କାଡ଼ାମଙ୍କୁ ବିଧାୟକ ଦଳ ନେତା କରାଯାଇଥିବାରୁ ତାରା ଅସନ୍ତୁଷ୍ଟ ହୋଇ ବୈଠକରେ ସାମିଲ ହୋଇ ନ ଥିବା ଚର୍ଚ୍ଚା ହେଉଛି। ତେବେ ବରିଷ୍ଠତା ଦୃଷ୍ଟିରୁ ତାଙ୍କୁ ଏହି ପଦ ମିଳିବ ବୋଲି କୁହାଯାଉଥିଲା। ଅନ୍ୟପକ୍ଷରେ ବିଧାୟକ ଦଳ ବୈଠକ ନେଇ ସେ କିଛି ଜାଣି ନ ଥିବା ଏବଂ ତାଙ୍କୁ କେହି ଡାକି ନ ଥିଲେ ବୋଲି ତାରା କହିଛନ୍ତି। ସେ କହିଛନ୍ତି, ଆଜି ବିଧାୟକ ଦଳ ବୈଠକ ବସିବ ବୋଲି ତାଙ୍କ ପାଖକୁ କୌଣସି ଫୋନ୍ ଆସି ନ ଥିଲା। ବୈଠକ ବସିବ ବୋଲି ତାଙ୍କୁ କୁହାଯାଇନି। ତେବେ ସାନଖେମୁଣ୍ଡି ବିଧାୟକ ରମେଶ ଜେନା ବିଳମ୍ବରେ ଆସି ବୈଠକରେ ଯୋଗ ଦେଇଥିଲେ। ହେଲେ ବିଧାନସଭା କାର୍ଯ୍ୟରେ ତାରାପ୍ରସାଦ ବାହିନୀପତି ସାମିଲ ହୋଇଥିଲେ। ଅନ୍ୟପଟେ କାଡାମଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ସରକାରଙ୍କୁ କାଉଣ୍ଟର କରିବା ପାଇଁ ଦଳ ନିଜର ରଣନୀତି ପ୍ରସ୍ତୁତ କରିଛି। ତେବେ ରାଜ୍ୟପାଳଙ୍କ ପୁଅ କାର୍ଯ୍ୟରତ ଏଏସ୍ଓଙ୍କୁ ଆକ୍ରମଣ କରିବା ଘଟଣାକୁ ନେଇ ଦଳ ପ୍ରଥମ ଦିନ ସରକାରକୁ ଘେରିବା ସହିତ କକ୍ଷତ୍ୟାଗ କରିବାକୁ ନିଷ୍ପତ୍ତି ନେଇଥିଲା। ସେହିକ୍ରମରେ ରାଜ୍ୟପାଳଙ୍କ ଅଭିଭାଷଣ ସମୟରେ କଂଗ୍ରେସ ବିଧାୟକମାନେ କକ୍ଷତ୍ୟାଗ କରିଥିଲେ। ଆଗକୁ କେଉଁ ପ୍ରସଙ୍ଗରେ ଦଳ ସରକାରଙ୍କୁ ଘେରିବ ସେନେଇ ମଙ୍ଗଳବାର ଅଧିବେଶନ ଆରମ୍ଭ ହେବାର ଘଣ୍ଟାଏ ପୂର୍ବରୁ ଆଉଥରେ ବିଧାୟକ ଦଳ ବୈଠକ କରି ନିଷ୍ପତ୍ତି ନେବ ବୋଲି ବିଧାୟକ ଦାଶରଥି ଗମାଙ୍ଗ ସୂଚନା ଦେଇଛନ୍ତି।
ସୂଚନାଯୋଗ୍ୟ, ପୂର୍ବରୁ ବିଧାୟକ ଦଳ ନେତା ପଦବୀକୁ ନେଇ କଂଗ୍ରେସ ନେତା ତାରାପ୍ରସାଦ ବାହିନୀପତି ଏବଂ ରାମଚନ୍ଦ୍ର କାଡାମଙ୍କ ନାଁ ଚର୍ଚ୍ଚାରେ ଥିଲା। ତାରା ୫ ଥର ବିଧାନସଭାକୁ ନିର୍ବାଚିତ ହୋଇଥିବା ବେଳେ କାଡାମ ୩ ଥର ବିଧାୟକ ଭାବେ ନିର୍ବାଚିତ ହୋଇଛନ୍ତି। ହେଲେ ଦଳ କାଡାମଙ୍କ ଉପରେ ଭରସା କରିଛି।