ଭୁବନେଶ୍ୱର, ୬।୮(ବ୍ୟୁରୋ): ପଣ୍ଡିତ ନୀଳକଣ୍ଠ ଦାସ ପ୍ରଜ୍ଞାର ଓଜସ୍ବିନୀ ସ୍ରୋତ ଥିଲେ। ଆଧୁନିକ ଓଡ଼ିଶା ନିର୍ମାଣରେ ତାଙ୍କର ଭୂମିକା ଅତୁଳନୀୟ ଥିଲା। ସେ ସବୁ କ୍ଷେତ୍ରରେ ସଫଳତାର ଶୀର୍ଷରେ ପହଞ୍ଚତ୍ଥିଲେ। ରାଜନୀତି, ସ୍ବାଧୀନତା ସଂଗ୍ରାମ, ସେବା, ଶିକ୍ଷା ଆଦି ଅନେକ କ୍ଷେତ୍ରରେ ସେ ଅନ୍ୟମାନଙ୍କ ପାଇଁ ଆଦର୍ଶ ଏବଂ ଏକ ମାନକ ସ୍ଥାପନ କରି ପାରିଥିଲେ ବୋଲି ରାଜ୍ୟପାଳ ପ୍ରଫେସର ଗଣେଶୀଲାଲ୍ କହିଛନ୍ତି। ଶୁକ୍ରବାର ପଣ୍ଡିତ ନୀଳକଣ୍ଠ ସ୍ମୃତି ସମିତି ପକ୍ଷରୁ ଭାରତୀୟ ବିଦ୍ୟାଭବନଠାରେ ନୀଳକଣ୍ଠଙ୍କ ୧୩୮ତମ ଜନ୍ମୋତ୍ସବ ପାଳିତ ହୋଇଥିଲା। ମୁଖ୍ୟ ଅତିଥି ଭାବେ ଯୋଗଦେଇ ରାଜ୍ୟପାଳ ପଣ୍ଡିତ ନୀଳକଣ୍ଠଙ୍କୁ ଭାରତରେ ପରିଚିତ କରାଇବା ପାଇଁ ତାଙ୍କ ସମ୍ପର୍କରେ ଡକ୍ୟୁମେଣ୍ଟାରୀ ବା ଚଳଚ୍ଚିତ୍ର ନିର୍ମାଣ କରାଯିବା ଆବଶ୍ୟକ। ଏହାଦ୍ୱାରା ଦେଶବାସୀ ତାଙ୍କ ଭଳି ଜଣେ ବିରଳ ବ୍ୟକ୍ତିତ୍ୱ ଓ ପ୍ରତିଭା ସମ୍ପର୍କରେ ଜାଣି ପାରିବେ ବୋଲି ମତ ପ୍ରକାଶ କରିଥିଲେ। ସମିତି ସଭାପତି ଅମୀୟଭୂଷଣ ତ୍ରିପାଠୀଙ୍କ ସଭାପତିତ୍ୱରେ ଆୟୋଜିତ ଏହି କାର୍ଯ୍ୟକ୍ରମରେ ନୀଳକଣ୍ଠଙ୍କ ରଚିତ ‘ଗୀତା ପ୍ରବେଶ’ର ଇଂଲିଶ ଅନୁବାଦ ‘ଅଣ୍ଡରଷ୍ଟାଣ୍ଡିଂ ଦି ଗୀତା’ ପୁସ୍ତକ ଲୋକାର୍ପିତ ହୋଇଥିଲା।
ଖଣ୍ଡପଡ଼ା ବିଧାୟକ ସୌମ୍ୟରଞ୍ଜନ ପଟ୍ଟନାୟକ ମୁଖ୍ୟବକ୍ତା ଭାବେ ଯୋଗଦେଇ ପଣ୍ଡିତ ନୀଳକଣ୍ଠ ଦାସଙ୍କ ଜୀବନୀର ବିଭିନ୍ନ ଦିଗ ଉପରେ ଆଲୋକପାତ କରିଥିଲେ। ନୀଳକଣ୍ଠ ସୁଭାଷ ଚନ୍ଦ୍ର ବୋଷଙ୍କର ଅନୁଜ ଏବଂ ଗୋପବନ୍ଧୁ ଦାସଙ୍କ ସହଯୋଗୀ ଥିଲେ। ଲୋକଙ୍କ ସେବା କରିବା ପାଇଁ ସେ ରାଜନୀତିରେ ସାମିଲ ହେବା ସହିତ ଓଡ଼ିଶା ବିଧାନସଭାର ବାଚସ୍ପତି ଭାବେ କାର୍ଯ୍ୟ କରିଥିଲେ। ସେହିପରି ସେ ଅନେକ ବିରୋଧ ଏବଂ ହିଂସାର ଶିକାର ହୋଇଥିଲେ। ଏପରିକି ମୁଖ୍ୟମନ୍ତ୍ରୀ ହେବାର ସୁଯୋଗ ପାଇ ମଧ୍ୟ ହାତଛଡ଼ା କରିଥିଲେ। ଲୋକାର୍ପିତ ହୋଇଥିବା ଏହି ପୁସ୍ତକ ନୀଳକଣ୍ଠଙ୍କୁ ନୂଆ ପାଠକଙ୍କ ପରିସରକୁ ନେଇଯିବ ଏବଂ ଅଧିକ ଲୋକ ତାଙ୍କ ବିଷୟରେ ଜାଣି ପାରିବେ ବୋଲି ପଟ୍ଟନାୟକ କହିଥିଲେ। ଅବସରପ୍ରାପ୍ତ ମୁଖ୍ୟଯନ୍ତ୍ରୀ କାଳିପ୍ରସାଦ ରଥ ଯୋଗଦେଇ ପଣ୍ଡିତ ନୀଳକଣ୍ଠ ଓଡ଼ିଶାର ସାରସ୍ବତ ଭଣ୍ଡାରକୁ ଋଦ୍ଧିମନ୍ତ କରିଛନ୍ତି ବୋଲି କହିଥିଲେ। ସମିତି ଉପସଭାପତି ଡ. ବିଜୟାନନ୍ଦ କର, ଯୁଗ୍ମ ସମ୍ପାଦକ ଡ. ତ୍ରିନାଥ ହୋତା, ସାଧାରଣ ସମ୍ପାଦକ ଡ. ପୂର୍ଣ୍ଣେନ୍ଦୁ କୁମାର ଦାସ ପ୍ରମୁଖ ଉପସ୍ଥିତ ଥିଲେ।