ଭୁବନେଶ୍ୱର,୧୭।୭(ବ୍ୟୁରୋ): ରାୟଗଡ଼ା ଜିଲା କାଶୀପୁରରେ ଅଖାଦ୍ୟ ଖାଇ ଝାଡ଼ାବାନ୍ତିରେ ୭ ଜଣଙ୍କର ମୃତ୍ୟୁ ଘଟିଛି। ସେଠାକାର ଲୋକମାନେ ଆମ୍ବଟାକୁଆ ଖାଇ ଭୋକ ଉପାସରେ ମରୁଛନ୍ତି। ରାଜ୍ୟ ଓ କେନ୍ଦ୍ର ସରକାରଙ୍କ ଖାଦ୍ୟ ସୁରକ୍ଷା ଯୋଜନା ସମ୍ପୂର୍ଣ୍ଣ ଫେଲ୍ ମାରିଛି। ମୁଖ୍ୟମନ୍ତ୍ରୀ ବିଶ୍ୱ ଖାଦ୍ୟ କାର୍ଯ୍ୟକ୍ରମରେ ଯୋଗଦେବାକୁ ବିଦେଶ ଯାଉଛନ୍ତି। ରାୟଗଡ଼ାର କାଶୀପୁର ନିଜେ ବୁଲି ଦେଖିବା ପରେ କାର୍ଯ୍ୟକ୍ରମରେ ଯୋଗ ଦେଇଥିଲେ ଭଲ ହୋଇଥାଆନ୍ତା। ସେହି ଲୋକମାନଙ୍କର ବଞ୍ଚତ୍ବାର ଅଧିକାରକୁ ଛଡ଼ାଇ ନିଆଯାଇଛି। ମୁଖ୍ୟମନ୍ତ୍ରୀ ଏ ନେଇ ତୁରନ୍ତ ଗୃହରେ ବିବୃତି ଦିଅନ୍ତୁ। ରାୟଗଡ଼ା ଜିଲାରେ ହେଉଥିବା ମୃତ୍ୟୁକୁ ନେଇ କଂଗ୍ରେସ ରାଜ୍ୟ ସରକାରଙ୍କଠାରୁ କୈଫିୟତ ତଲବ କରିଛି।
ଶନିବାର ଶୂନ୍ୟକାଳରେ ଏହି ପ୍ରସଙ୍ଗ ଉଠାଇ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର କହିଛନ୍ତି ଯେ, କାଶୀପୁରରେ ଲୋକମାନେ ଅଖାଦ୍ୟ ଖାଇ ମରୁଛନ୍ତି। ସେମାନଙ୍କ ପାଖରେ ଖାଦ୍ୟ ପହଞ୍ଚୁ ନାହିଁ। ବାଧ୍ୟ ହୋଇ ଆମ୍ବଟାକୁଆ ଭଳି ଅଖାଦ୍ୟ ଖାଉଛନ୍ତି। ସେମାନଙ୍କ ଚାଉଳ ବାଟମାରଣା ହେଉଛି। ଯଦି ସେମାନେ ଚାଉଳ ପାଇଥାଆନ୍ତେ, ତେବେ ଏ ଅବସ୍ଥା ହୋଇ ନ ଥା’ନ୍ତା। ଏହା ଅତ୍ୟନ୍ତ ଗୁରୁତର ବିଷୟ। ମୁଖ୍ୟମନ୍ତ୍ରୀ ଏହାର ଜବାବ ଦେବା ଦରକାର। ଗୃହକୁ ଆସି ବିବୃତି ଦିଅନ୍ତୁ ବୋଲି ନରସିଂହ ଦାବି କରିଛନ୍ତି। କଂଗ୍ରେସ ସଭ୍ୟ ତାରା ପ୍ରସାଦ ବାହିନୀପତି କହିଛନ୍ତି ଯେ, ସ୍ବାଧୀନତାର ୭୫ ବର୍ଷ ଏବଂ ବିଜେଡି ସରକାରର ୨୨ ପରେ ମଧ୍ୟ ଲୋକମାନେ ଅନାହାରରେ ମରୁଛନ୍ତି। ଭୋକରେ କେହି ମରିବେନି ବୋଲି ଜାତୀୟ ଖାଦ୍ୟ ସୁରକ୍ଷା ଯୋଜନା କରାଯାଇଛି। ଗତ ୨୩ ବର୍ଷ ମଧ୍ୟରେ କାଶୀପୁରରେ ଅନେକ ଶହ ଲୋକଙ୍କର ମୃତ୍ୟୁ ହୋଇଛି। ଗଣମାଧ୍ୟମରେ ଏ ନେଇ ଖବର ପ୍ରକାଶ ପାଉଛି। ମୁଖ୍ୟମନ୍ତ୍ରୀ ତୁରନ୍ତ ଗୃହରେ ବିବୃତି ଦିଅନ୍ତୁ ବୋଲି ସେ ଦାବି କରିଛନ୍ତି।
ରାୟଗଡ଼ା ସ୍ବାଧୀନ ବିଧାୟକ ମକରନ୍ଦ ମୁଦୁଲି କହିଲେ, ଗତ ଦୁଇ ତିନି ଦିନ ହେବ ରାୟଗଡ଼ା ଜିଲାର ତିଖିଡ଼ିରେ ୩ ଜଣଙ୍କର ମୃତ୍ୟୁ ହୋଇଛି। ସେଠାରେ ଥିବା ସ୍ବାସ୍ଥ୍ୟକେନ୍ଦ୍ରରେ ୨୦ ଜଣ ଭର୍ତ୍ତି ହୋଇଛନ୍ତି। କାଶୀପୁର ସ୍ବାସ୍ଥ୍ୟକେନ୍ଦ୍ରରେ ୭ ଜଣ ଭର୍ତ୍ତି ହୋଇଛନ୍ତି। ଏହାର କିପରି ଆଶୁ ସମାଧାନ ହୋଇପାରିବ, ସେ ନେଇ ସରକାର ବ୍ୟବସ୍ଥା କରନ୍ତୁ। ରାଜ୍ୟସ୍ତରରେ ଏକ ସ୍ବତନ୍ତ୍ର ମେଡିକାଲ ଟିମ ସେହି ଅଞ୍ଚଳକୁ ପଠାଯାଇ ପରିସ୍ଥିତି ଉପରେ ନଜର ରଖିବାକୁ ସେ ଦାବି କରିଛନ୍ତି।
ଏହି ପ୍ରସଙ୍ଗକୁ ନେଇ କଂଗ୍ରେସ ସଦସ୍ୟମାନେ ଗୃହର ମଧ୍ୟଭାଗକୁ ଆସି ମୁଖ୍ୟମନ୍ତ୍ରୀଙ୍କ ବିବୃତି ଦାବିରେ ହଟ୍ଟଗୋଳ କରିଥିଲେ। ମୁଖ୍ୟମନ୍ତ୍ରୀ ଷ୍ଟେଟ୍ମେଣ୍ଟ ଆମର ଦାବି… ଆମର ଦାବି… ସ୍ଲୋଗାନ ଦେଇ ହୋ ହଲ୍ଲା କରିଥିଲେ। ବାଚସ୍ପତି ଗୃହକାର୍ଯ୍ୟରେ ସହଯୋଗ କରିବାକୁ ବାରମ୍ବାର କହିଥିଲେ ମଧ୍ୟ କଂଗ୍ରେସ ସଭ୍ୟମାନେ ତାଙ୍କ ଜିଦ୍ରେ ଅଡ଼ି ବସିଥିଲେ। ବାଚସ୍ପତି ବାଧ୍ୟ ହୋଇ ଗୃହକୁ ମଧ୍ୟାହ୍ନ ୧୨ଟାରୁ ୧୨ଟା ୩୦ ମିନିଟ୍ଯାଏ ମୁଲତବୀ ଘୋଷଣା କରିଥିଲେ। ଗୃହକାର୍ଯ୍ୟ ଆରମ୍ଭ ହେବା ପୂର୍ବରୁ ବାଚସ୍ପତି କାଶୀପୁର ମୃତ୍ୟୁ ସମ୍ପର୍କରେ ବିଧାନସଭାରେ ଆସନ୍ତା ସୋମବାର ବିବୃତି ଦେବାକୁ ସଂସଦୀୟ ବ୍ୟାପାର ମନ୍ତ୍ରୀଙ୍କୁ ନିର୍ଦ୍ଦେଶ ଦେଇଛନ୍ତି।