ଭୁଜ୍,୨୮ା୮: ପ୍ରବାସୀ ଭାରତୀୟ କିଷନ ହାଲାଇ ଓ ତାଙ୍କର ୨୫ ବର୍ଷୀୟା ଭାବୀ ସ୍ତ୍ରୀ ରୁପାଲ ଭେକରିଆ ରବିବାର ମୁମ୍ବାଇରୁ ବିମାନ ଯୋଗେ ନାଇରୋବି ଯିବାର ଥିଲା। ହେଲେ ଭାଗ୍ୟ କିଛି ଅଲଗା ଚାହୁଁଥିଲା। ଏୟାରଲାଇନ୍ସ କର୍ତ୍ତୃପକ୍ଷ ବିମାନ ଛାଡ଼ିବା ସମୟରେ ପରିବର୍ତ୍ତନ କରିବାରୁ ଏହି ଯୋଡ଼ି ସାନ୍ତାକ୍ରୁଜ୍ସ୍ଥିତ ଗାଲାକ୍ସି ହୋଟେଲରେ ରହିଥିଲେ। ଉକ୍ତ ହୋଟେଲରେ ସେମାନଙ୍କ ପାଇଁ ମୃତ୍ୟୁ ଯେପରି ଛକି ରହିଥିଲା। ରବିବାର ଅପରାହ୍ନରେ ହୋଟେଲରେ ନିଆଁ ଲାଗିଯିବାରୁ କିଷନ(୨୮), ରୁପାଲ ଏବଂ କାନ୍ତିଲାଲ୍ ଭାରା(୫୦) ନାମକ ଅନ୍ୟ ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଥିଲା। ରୁପାଲଙ୍କ ମାଆ ମଞ୍ଜୁଳାବେନ୍(୪୯), ଭଉଣୀ ଆଲ୍ଫା (୧୯) ଏବଂ ଆସଲାମ ଶେଖ୍ (୪୮) ନାମକ ଅନ୍ୟ ଜଣେ ବ୍ୟକ୍ତି ନିଆଁରେ ପୋଡ଼ିହୋଇ ଆହତ ହୋଇଛନ୍ତି। କିଷନ ଏବଂ ରୁପାଲ ବହୁବର୍ଷ ହେଲା ନାଇରୋବିରେ ରହୁଥିଲେ। ସେମାନଙ୍କ ପୈତୃକ ଘର ଗୁଜରାଟର ରାମ୍ପାର ଗ୍ରାମରେ ଏବେ ବି ରହିଛି।