ଭୁବନେଶ୍ୱର,୨୬ା୩(ବ୍ୟୁରୋ): ଚିଲିକା ବିଧାୟକ ପ୍ରଶାନ୍ତ ଜଗଦ୍ଦେବଙ୍କ ଗିରଫଦାରି ସମ୍ପର୍କରେ ବାଚସ୍ପତି ସୂର୍ଯ୍ୟନାରାୟଣ ପାତ୍ର ଗୃହକୁ ସୂଚନା ଦେଇଛନ୍ତି। ଖୋର୍ଦ୍ଧା ଏସ୍ପିଙ୍କ ଏ ସଂକ୍ରାନ୍ତ ଚିଠି ବିଧାନସଭାକୁ ପ୍ରାପ୍ତ ହୋଇଥିବା ବାଚସ୍ପତି ଶୁକ୍ରବାର ଅପରାହ୍ନ ଅଧିବେଶନରେ ଅବଗତ କରାଇଥିଲେ। ସେ କହିଥିଲେ, ଗତ ୨୨ ତାରିଖରେ ବିଧାୟକଙ୍କୁ ପୋଲିସ ଭୁବନେଶ୍ୱରରୁ ଗିରଫ କରିଛି। ବାଣପୁର ଥାନାରେ ରୁଜୁ ହୋଇଥିବା ମାମଲା ଆଧାରରେ ଜଗଦ୍ଦେବଙ୍କୁ ଗିରଫ କରାଯାଇ ବାଣପୁର ଉପକାରାଗାରକୁ ପଠାଇ ଦିଆଯାଇଥିବା ଖୋର୍ଦ୍ଧା ଏସ୍ପି ୨୩ ତାରିଖରେ ଚିଠି ମାଧ୍ୟମରେ ଜଣାଇଛନ୍ତି। ତେବେ ଉକ୍ତ ଚିଠି ବିଧାନସଭା ପକ୍ଷରୁ କେଉଁ ତାରିଖରେ ଗ୍ରହଣ କରାଯାଇଛି ବୋଲି ବାଚସ୍ପତିଙ୍କଠାରୁ ସ୍ପଷ୍ଟୀକରଣ ଲୋଡ଼ିଥିଲେ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର। ସେ କହିଥିଲେ, ଯଦି ଉକ୍ତ ଚିଠି ୨୩ ତାରିଖ ପରିବର୍ତ୍ତେ ୨୫ ତାରିଖରେ ବିଧାନସଭାକୁ ପ୍ରାପ୍ତ ହୋଇଥିବ, ତା’ହେଲେ ଏହା ଗୃହର ସ୍ବାଧିକାର ଭଙ୍ଗ ବୋଲି ଧରାଯିବ। ଏହାର ଅନୁଧ୍ୟାନ କରିବାକୁ ସେ ଦାବି କରିଥିଲେ। ଏଥିସହ ବିଧାୟକ ଜଗଦ୍ଦେବ ବିଜେଡି ଦଳରୁ ନିଲମ୍ବିତ ହେବା ସଂକ୍ରାନ୍ତରେ ଯେଉଁ ଖବର ବିଭିନ୍ନ ଖବରକାଗଜରେ ପ୍ରକାଶ ପାଇଛି, ତା’ର ଘୋଷଣା ଗୃହରେ ବାଚସ୍ପତି କରିଛନ୍ତି କି ବୋଲି ପଚାରିଥିଲେ। ବାଚସ୍ପତି ସ୍ପଷ୍ଟୀକରଣ ରଖି କହିଥିଲେ, ଗିରଫଦାରି ଚିଠିଟି ୨୩ ତାରିଖରେ ଟାଇପ ହୋଇଛି ଏବଂ ୨୫ ତାରିଖରେ ବିଧାନସଭା ସଚିବଙ୍କ ଦ୍ୱାରା ପ୍ରାପ୍ତ ହୋଇଛି। ବିଧାୟକ ଜଗଦ୍ଦେବଙ୍କ ନିଲମ୍ବନ ସମ୍ପର୍କରେ କୌଣସି ଚିଠି ଆମ ପାଖକୁ ଆସିନାହିଁ ବୋଲି ବାଚସ୍ପତି କହିଛନ୍ତି।