କୋଟା, ୨୦।୨ : ରାଜସ୍ଥାନର କୋଟାରେ ରବିବାର ସକାଳେ ଚମ୍ବଲ ନଦୀରେ ଏକ ବରଯାତ୍ରୀ କାର ଖସିପଡିଛି। ଏହି ଦୁର୍ଘଟଣାରେ ବର ସମେତ ୯ ଜଣଙ୍କର ମୃତ୍ୟୁ ଘଟିଛି। କାର ବିଷୟରେ ସ୍ଥାନୀୟ ଲୋକ ତୁରନ୍ତ ପୋଲିସକୁ ସୂଚନା ଦେଇଥିଲେ। ଏହା ପରେ କ୍ରେନ ଏବଂ ଡଙ୍ଗା ସାହାଯ୍ୟରେ ଘଟଣାସ୍ଥଳରେ ପହଞ୍ଚିଥିବା ପୋଲିସ ଟିମ୍ କାରକୁ ନଦୀ ଭିତରୁ ଟାଣି ବାହାର କରିଥିଲେ।
କୋଟାର ନୟାପୁରା ଥାନା ଅଞ୍ଚଳରେ ଚମ୍ବଲର ଛୋଟ ପୋଲ ଉପରେ ଏହି ଦୁର୍ଘଟଣା ଘଟିଛି। ବରଯାତ୍ରୀ ବରଙ୍କ ସମେତ ଚୌଥ୍ର ବରଓ୍ବାଡ଼ାରୁ ଉଜ୍ଜୟନୀ ଯାଉଥିଲେ।
ମୃତଦେହଗୁଡ଼ିକୁ ଡାକ୍ତରଖାନାକୁ ପୋଷ୍ଟମର୍ଟମ ପାଇଁ ପଠାଇବା ସହିତ ଉଭୟ ପରିବାର ସଦସ୍ୟଙ୍କୁ ଏହି ଘଟଣା ସମ୍ପର୍କରେ ଅବଗତ କରାଯାଇଛି। ଏହି ଘଟଣାରେ ମୁଖ୍ୟମନ୍ତ୍ରୀ ଅଶୋକ ଗେହଲଟ ଟୁଇଟ୍ କରି ଦୁଃଖ ପ୍ରକାଶ କରିଛନ୍ତି।
ଡଙ୍ଗା ଓ କ୍ରେନ ସାହାଯ୍ୟରେ ବହୁ ପରିଶ୍ରମ ପରେ ପୋଲିସ କାରଟିକୁ ବାହାର କରିଦେଇଥିଲା । ଏହା ପରେ ମୃତଦେହ ଗୁଡ଼ିକୁ ଗୋଟିଏ ପରେ ଗୋଟିଏ ଟାଣି ବାହାର କରାଯାଇଥିଲା। ସେମାନଙ୍କୁ ଉଦ୍ଧାର କରାଯିବା ବେଳକୁ ବହୁତ ଡେରି ହୋଇଯାଇଥିଲା। କାରଟି ପାଣିରେ ବୁଡ଼ି ଯାଇଥିବାରୁ ଏଥିରେ ଥିବା ସମସ୍ତ ଯାତ୍ରୀଙ୍କର ଉଦ୍ଧାର ହେବା ପୂର୍ବରୁ ମୃତ୍ୟୁ ଘଟିଥିବା ପୋଲିସ ପକ୍ଷରୁ ସୂଚନା ପ୍ରଦାନ କରାଯାଇଛି।
