ଚେନ୍ନାଇ, ୨୧।୮ : ସୁପ୍ରିମକୋର୍ଟଙ୍କ ନିର୍ଦ୍ଦେଶରେ ଗଠିତ ଏମ୍ସ ପ୍ୟାନେଲ ତାମିଲନାଡୁର ପୂର୍ବତନ ମୁଖ୍ୟମନ୍ତ୍ରୀ ଜୟଲଳିତାଙ୍କ ଚିକିତ୍ସାରେ କୌଣସି ଅବହେଳା ହୋଇ ନଥିବା କହିଛନ୍ତି। ଏମ୍ସ ଡାକ୍ତରମାନେ କହିଛନ୍ତି ଯେ ଡାକ୍ତରଖାନାରେ ଭର୍ତ୍ତି ହେବା ପୂର୍ବରୁ ଜୟଲଳିତା ଡାଇବେଟିସ, ମୁଣ୍ଡ ବୁଲାଇବା, ଦେହ ହାତ ଫୁଲିଯିବା, ଚିଡ଼ିଚିଡ଼ାପଣ , ହାଇପୋଥାଇରଏଡାଇଜିମ ଏବଂ କ୍ରୋନିକ ବ୍ରୋଙ୍କାଇଟିସ ଭଳି ବହୁ ଶାରୀରିକ ସମସ୍ୟାରେ ପୀଡିତ ଥିଲେ।
ଜୟଲଳିତା ଅସୁସ୍ଥ ହେବା ପରେ ଚେନ୍ନାଇର ଆପୋଲୋ ହସ୍ପିଟାଲରେ ଭର୍ତ୍ତି ହୋଇଥିଲେ। ଏଠାରେ ତାଙ୍କର ମୃତ୍ୟୁ ଘଟିଥିଲା। ୩୦ ନଭେମ୍ବର ୨୦୨୧ ରେ ଜୟଲଳିତାଙ୍କ ମୃତ୍ୟୁର କାରଣ ଜାଣିବା ପାଇଁ ଜଷ୍ଟିସ ଅରୁମୁଗାସାମି କମିଶନଙ୍କୁ ସାହାଯ୍ୟ କରିବା ପାଇଁ ଏକ ୬ ଜଣିଆ ପ୍ୟାନେଲ ଗଠନ କରାଯାଇଥିଲା।
କାର୍ଡିଓଲୋଜିଷ୍ଟ ଡାକ୍ତର ସନ୍ଦୀପ ସେଠଙ୍କ ନେତୃତ୍ୱରେ ଏହି ପ୍ୟାନେଲ ଆପୋଲୋ ହସ୍ପିଟାଲର ଡାକ୍ତରୀ ରେକର୍ଡ ଯାଞ୍ଚ କରିଥିଲା। ଏହା ସହିତ ରେଡିଓଲୋଜି ସମ୍ବନ୍ଧୀୟ ଅନୁସନ୍ଧାନର ରେକର୍ଡ ମଧ୍ୟ ଖୋଜା ଯାଇଥିଲା । ପ୍ୟାନେଲ ରିପୋର୍ଟ ଅନୁଯାୟୀ, ଜୟଲଳିତା ଡାକ୍ତରଖାନାରେ ଭର୍ତ୍ତି ହେବା ପୂର୍ବରୁ ଅଙ୍ଗୁର, କେକ୍ ଏବଂ ମିଠା ଖାଉଥିଲେ। ଡାକ୍ତର ଶିବକୁମାର ୧୯ ସେପ୍ଟେମ୍ବର ୨୦୧୬ ରେ ଜୟଲଳିତାଙ୍କୁ ପରୀକ୍ଷା କରିଥିଲେ।
ରିପୋର୍ଟରେ କୁହାଯାଇଛି ଯେ ୨୨ ସେପ୍ଟେମ୍ବର ୨୦୧୬ରେ ମୁଖ୍ୟମନ୍ତ୍ରୀଙ୍କ ବାସଭବନକୁ ଆମ୍ବୁଲାନ୍ସ ଡକାଯାଇଥିଲା। ଡାକ୍ତରଖାନାରେ ଭର୍ତ୍ତି ହେବା ପୂର୍ବରୁ ଡାକ୍ତରମାନେ ଜାଣିବାକୁ ପାଇଲେ ଯେ ଜୟଲଳିତାଙ୍କର ଚେତା ନାହିଁ। ତାଙ୍କର ରକ୍ତଚାପ ଏବଂ ନାଡି ମଧ୍ୟ ଅସ୍ଥିର ଥିଲା। ତାଙ୍କୁ ମୃତ ଘୋଷଣା କରାଯାଇଥିଲା।
ପ୍ୟାନେଲର ରିପୋର୍ଟରେ କୁହାଯାଇଛି ଯେ ଜୟଜଲିତାଙ୍କର ଆପୋଲୋ ହସ୍ପିଟାଲରେ ଉପଯୁକ୍ତ ଚିକିତ୍ସା କରାଯାଉଥିଲା। ୪ ଡିସେମ୍ବର ୨୦୧୬ ରେ ସେ ହୃଦଘାତର ଶିକାର ହୋଇଥିଲେ। ଏହା ପରେ, ଡିସେମ୍ବର ୫ରେ ଆପୋଲୋ ଏବଂ ଏମ୍ସ ଡାକ୍ତରଙ୍କ ଟିମ ତାଙ୍କୁ ମୃତ ଘୋଷଣା କରିଥିଲେ।
ପରେ ତାଙ୍କ ମୃତ୍ୟୁକୁ ନେଇ ନାନା ପ୍ରଶ୍ନ ଉଠିଥିଲା। ଚିକିତ୍ସାରେ ଅବହେଳା ଯୋଗୁ ତାଙ୍କର ମୃତ୍ୟୁ ଘଟିଥିବା ଅଭିଯୋଗ ହେବାରୁ ସୁପ୍ରିମ୍କୋର୍ଟ ଏକ ପ୍ୟାନେଲ ଗଠନ କରିବାକୁ ନିର୍ଦ୍ଦେଶ ଦେଇଥିଲେ।