ଦାରିଙ୍ଗବାଡ଼ି/ବ୍ରାହ୍ମଣୀଗାଁ,୨୪ା୨(ଅରୁଣ ସାହୁ/ମନୋରଞ୍ଜନ ରଣା): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ବ୍ରାହ୍ମଣୀଗାଁ ଥାନା ଝିଞ୍ଜିରୀଗୁଡ଼ା ପଞ୍ଚାୟତ କୁଟୁଲାରୀଗାଁରେ ଗତ ଏକ ସପ୍ତାହ ହେଲା ପିଇବା ପାଣିର ସମସ୍ୟା ଦେଖାଦେଇଛି। ପାହାଡ଼ରୁ ଆସୁଥିବା ଝର ପାଣି ଶୁଖିଯାଇଥିବାରୁ ଆଉ ଗାଁ ଲୋକଙ୍କୁ ପାଣି ମିଳୁନି। ସେପଟେ ପ୍ରାୟ ୭ଟି ନଳକୂପ ରହିଥିବା ବେଳେ ଅଧାରୁ ଊର୍ଦ୍ଧ୍ୱ ନଳକୂପ ଅଚଳ ରହିଥିବା ଓ ଯେଉଁ ନଳକୂପରୁ ପାଣି ବାହାରୁଛି, ତାହା ମଧ୍ୟ ଗୋଳି ପାଣି।
ଏନେଇ ଧରିତ୍ରୀରେ ଖବର ପ୍ରକାଶ ପାଇବା ପରେ ସ୍ଥାନୀୟ ବିଡିଓ ଗଦାଧର ପାତ୍ରଙ୍କ ନିର୍ଦ୍ଦେଶ କ୍ରମେ ଗ୍ରାମୀଣ ଜଳ ଯୋଗାଣ ବିଭାଗର ଏକ ଟିମ୍ ନଳକୂପ ମରାମତି କରିବାକୁ କୁଟଲାରୀ ଗ୍ରାମରେ ପହଞ୍ଚିଛନ୍ତି। ତେବେ ଉକ୍ତ ମରାମତି ଟିମ୍ ସେଠାରେ ଚାଲୁ ରହିଥିବା ନଳକୂପରୁ ପାଣି ନମୁନା ସଂଗ୍ରହ କରି ନେଇଛନ୍ତି। ପରୀକ୍ଷା ପରେ ସୋମବାର ଯେଉଁ ନଳକୂପ ପାଣିର ମାନ ଭଲ ଥିବ ସେଗୁଡିକୁ ମରାମତି କରାଯିବ। ଯାହାର ମାନ ଖରାପ ଥିବ ଓ ଲୌହଯୁକ୍ତ ଥିବ ତାକୁ ମରାମତି କରାଯିବ ନାହିଁ ବୋଲି ବିଭାଗ ପକ୍ଷରୁ କୁହାଯାଇଛି। ସେହିପରି ଗାଁର ଥିବା ସମସ୍ୟାଗୁଡିକ ତଥା ପିଇବା ପାଣି, ସାହିକୁ ରାସ୍ତା ନିର୍ମାଣ, ଷ୍ଟ୍ରିଟ୍ଲାଇଟ୍ ବ୍ୟବସ୍ଥା ଚାଲୁ କରାଇବା ଆଦିର ସମାଧାନ କରାଯିବ ବୋଲି ଦାରିଙ୍ଗବାଡ଼ି ବିଡିଓ ଗଦାଧର ପାତ୍ର କହିଛନ୍ତି।