ସମ୍ବଲପୁର,୧୩।୫(ବ୍ୟୁରୋ):ସମ୍ବଲପୁର ହନୁମାନ ଜୟନ୍ତୀ ଉପଲକ୍ଷେ ବାଇକ୍ ଶୋଭାଯାତ୍ରା ଉପରେ ପଥର ମାଡ଼ ସାଙ୍ଗକୁ ପୋଡ଼ାଜଳା ଆକ୍ରମଣ ଭଳି ସାମ୍ପ୍ରଦାୟିକ ହିଂସା ଘଟଣାକୁ ଶୁକ୍ରବାର ଏକମାସ ପୂରିଛି। ହେଲେ ସେଦିନର ଦୃଶ୍ୟ ଲୋକଙ୍କ ମନରୁ ଲିଭି ନାହିଁ। ପରିସ୍ଥିତି ସ୍ବାଭାବିକ ହୋଇଥିଲେ ବି ପୀଡିତ ଓ ମୃତକ ପରିବାର ଆଜି ମଧ୍ୟ ଦୁଃଖରେ ରହିଛନ୍ତି ା ଅନେକ ଲୋକ ସହର ଛାଡି ବାହାରକୁ ଚାଲିଯାଇଛନ୍ତି। ଭୟରେ ସେମାନେ ଫେରୁ ନାହାନ୍ତି। ପୋଲିସ ଓ ଜିଲା ପ୍ରଶାସନ ସ୍ଥିତି ନିୟନ୍ତ୍ରଣ କରିବାରେ ସଫଳ ହୋଇଛି। ଅନ୍ୟପଟେ ଗିରଫ ସଂଖ୍ୟା ବୃଦ୍ଧି ପାଇଛି। ଏପ୍ରିଲ ୧୨ ଓ ୧୪ ତାରିଖ ଘଟଣାରେ ମୋଟ ୧୧୫ ଜଣଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିବା ଏସ୍ପି ବାତୁଳା ଗଙ୍ଗାଧର ସୂଚନା ଦେଇଛନ୍ତି।
ସେ କହିଛନ୍ତି, ପରିସ୍ଥିତି ନିୟନ୍ତ୍ରଣ ହୋଇଛି ା ହେଲେ ସାମାଜିକ ଗଣମାଧ୍ୟମରେ ଆଜି ମଧ୍ୟ କଟକଣା ରହିଛି ା ଘଟଣାକୁ ନେଇ ଉତ୍ତେଜନା ପୂର୍ଣ୍ଣ ମେସେଜ ପଠାଇବା କିମ୍ବା ପୋଷ୍ଟ କରିବା ଉପରେ ନଜର ରଖାଯାଇଛି। ପୂର୍ବରୁ ଅନେକ ଲୋକଙ୍କ ନାମରେ ମାମଲା ରୁଜୁ ସହ ଥାନାକୁ ଆଣି ଚୁକ୍ତିନାମା କରି ଛାଡି ଦିଆଯାଇଛି। ଏବେ ମଧ୍ୟ ପୋଲିସ ସ୍ବତନ୍ତ୍ର ଟିମ୍ କାମ କରୁଛନ୍ତି। ଗିରଫ ସଂଖ୍ୟା ଆହୁରି ବୃଦ୍ଧି ପାଇବ ା ସେମାନଙ୍କୁ ଚିହ୍ନଟ କରାଯାଇଛି ବୋଲି ସେ କହିଥିଲେ। ଅନ୍ୟପଟେ ଆସନ୍ତା ଶୀତଳଷଷ୍ଠୀ ଯାତ୍ରା ପାଇଁ ବିଭିନ୍ନ ଯାତ୍ରା କମିଟି ସହ ବୈଠକ ହୋଇଛି ା ସେମାନଙ୍କ ସହ ଆଲୋଚନା କରି ଯେଭଳି ଠିକ୍ ଭାବେ ଯାତ୍ରା ହେବ ସେ ନେଇ ପଦକ୍ଷେପ ଗ୍ରହଣ କରାଯାଇଛି ବୋଲି କହିଥିଲେ। ସୂଚନାଯୋଗ୍ୟ, ସମ୍ବଲପୁର ହନୁମାନ ଜୟନ୍ତୀ ପାଇଁ ଏପ୍ରିଲ ୧୨ରେ ବାଇକ୍ ଶୋଭାଯାତ୍ରା ଓ ୧୪ରେ ଜୟନ୍ତୀ ଶୋଭାଯାତ୍ରା ହୋଇଥିଲା। ସେ ସମୟରେ ସାମ୍ପ୍ରଦାୟିକ ହିଂସା ଘଟିଥିଲା। ପୋଲିସ ଦୁଇଟି ମାମଲା ରୁଜୁ କରି ସୁନାପାଲି ଅଞ୍ଚଳର କେତେଜଣଙ୍କ ଘରୁ ପେଟ୍ରୋଲ ବୋମା, ୧୮ ପ୍ଲାଷ୍ଟିକ ଟ୍ରେରେ ଥିବା ଧାରୁଆ ପଥର, ମାରଣାସ୍ତ୍ର ଜବତ କରିଥିଲା। ଶୋଭାଯାତ୍ରା ସମୟରେ ସାନସିଂହାରି ଗ୍ରାମର ଚନ୍ଦ୍ରଶେଖର ମିର୍ଦ୍ଧା ହତ୍ୟା ଘଟଣାରେ ପୋଲିସ ଏପର୍ଯ୍ୟନ୍ତ ୯ଜଣଙ୍କୁ ଗିରଫ କରିସାରିଛି ା ଜିଲାରେ କର୍ଫ୍ୟୁ ଲଗାଯିବା ସହ ନେଟ୍ ସେବା ବନ୍ଦ କରି ଦିଆଯାଇଥିଲା। ଏହାକୁ ନେଇ ଭାଜପା ସଂସଦୀୟ କମିଟି, ଜାତୀୟ ଏସ୍ଟି କମିଶନ, ରାଜ୍ୟ ମାନବାଧିକାର କମିଶନ ଉଦ୍ବେଗ ପ୍ରକାଶ କରିଥିଲେ। ଏହାକୁ ନେଇ ରାଜ୍ୟ ରାଜନୀତି ମଧ୍ୟ ସରଗରମ ହୋଇଥିଲା ା