ଦୁବାଇ,୨୭।୮(ପି.ଟି.): ୟୁନାଇଟେଡ ଆରବ ଏମିରେଟ୍ସ (ୟୁଏଇ)ରେ ଆୟୋଜନ ହେବାକୁ ଥିବା ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ୩ ମାସ ମଧ୍ୟରେ ୨୦ ହଜାରରୁ ଅଧିକ କୋଭିଡ୍-୧୯ ଟେଷ୍ଟ କରାଯିବ। ଏଥିପାଇଁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଭି.ପି.ଏସ୍. ହେଲ୍ଥ କେୟାରକୁ ନିଯୁକ୍ତି ଦେବ ବୋଲି କହିଛି। ଫ୍ରାଞ୍ଚାଇଜ୍ଗୁଡିକର ସବୁ ଖେଳାଳି, ସପୋର୍ଟ ଷ୍ଟାଫ୍, ବିସିସିଆଇ ଅଫିସିଆଲ ଓ ଆଇପିଏଲ୍ ସମ୍ପର୍କିତ ସବୁ ବ୍ୟକ୍ତିଙ୍କର କୋଭିଡ୍ ଟେଷ୍ଟ କରାଯିବ କୁହାଯାଇଛି।
ଏଥିସହିତ ଟୁର୍ନାମେଣ୍ଟ ପରିଚାଳନା ପାଇଁ ସବୁ ସ୍ବ୍ୟାସ୍ଥ୍ୟଗତ ପ୍ରକାର ସୁବିଧା ସୁଯୋଗ ଯୋଗାଇଦେବା ପାଇଁ ବିସିସିଆଇ ସହିତ ଆଲୋଚନା କରାଯାଉଛି ବୋଲି ଭି.ପି.ଏସ୍. ହେଲ୍ଥ କେୟାର ତରଫରୁ ଜାରି କରାଯାଇଥିବା ଏକ ପ୍ରେସ୍ ବିଜ୍ଞପ୍ତିରେ କୁହାଯାଇଛି। ପ୍ରଥମ, ତୃତୀୟ ଓ ଷଷ୍ଠ ଦିବସରେ ସବୁ ଖେଳାଳି ଓ ଷ୍ଟାଫ୍ ସଦସ୍ୟଙ୍କର ଟେଷ୍ଟ କରାଯିବ। ଏହାପରେ ସେମାନ ଜୈବ ସୁରକ୍ଷିତ ପରିବେଶ ତଥା ବାୟୋ ବବୁଲ୍ରେ ପ୍ରବେଶ କରିବେ। ଏହାପରେ ପ୍ରତ୍ୟେକ ୫ ଦିନରେ ସବୁ ଖେଳାଳି ଓ ଅନ୍ୟମାନଙ୍କର ଟେଷ୍ଟ କାରଯିବ। ସାରା ଟୁର୍ନାମେଣ୍ଟରେ ଏହି ପ୍ରକ୍ରିୟା ଜାରି ରହିବ ବୋଲି କୁହାଯାଇଛି।