ନୟାଗଡ଼,୨୦।୧୧(ଲୋକନାଥ ମିଶ୍ର): କଟକ ଜିଲାର ସୁବଳୟା ଓ ନୟାଗଡ଼ ଜିଲା ଗଣିଆ ବ୍ଲକର ରାଉତପଡାକୁ ସଂଯୋଗ କରି ମହାନଦୀରେ ହେବ ରାଉତପଡା ବ୍ୟାରେଜ । ଏଥିପାଇଁ ୧୫୭୨ କୋଟି ଟଙ୍କା ମଞ୍ଜୁର କରିବାକୁ ରାଜ୍ୟ ସରକାରଙ୍କୁ ନୟାଗଡ଼ ଜିଲା ଜଳସମ୍ପଦ ବିଭାଗ ପକ୍ଷରୁ ପ୍ରସ୍ତାବ ଦିଆଯାଇଛି । ନୟାଗଡ଼ ଜିଲାର ପାନୀୟ ଜଳ ସମସ୍ୟାକୁ ଏଡାଇବା ପାଇଁ ଏହି ବ୍ୟାରେଜ ନିର୍ମାଣ କରିବାକୁ ଜଳସମ୍ପଦ ବିଭାଗ ନିଷ୍ପତ୍ତି ନେଇଛି। ଛତିଶଗଡ ସରକାର ଉପର ମୁଣ୍ଡରେ ବ୍ୟାରେଜ ନିର୍ମାଣ କରିଥ୍ତ୍ବାରୁ ମହାନଦୀରେ ଜଳ ଗତିପଥ ପରିବର୍ତ୍ତନ ହେଉଛି । ପୁଣି ଗ୍ରୀଷ୍ମ ଋତୁରେ ମହାନଦୀ ଶୁଖିଲା ପଡୁଛି । ନୟାଗଡ଼ ସହରରେ ଗତ ବର୍ଷ ପାନୀୟ ଜଳ ସମସ୍ୟା ଦେଖା ଦେଇଥିଲା । ଅନ୍ୟପକ୍ଷେ ଜଳସେଚନ ପାଇଁ ସେପରି କିଛି ବ୍ୟବସ୍ଥା ହୋଇନି । ପରେ ଏହା କରାଯାଇ ପାରେ ଅଥବା ନ କରାଯାଇ ପାରେ। ଜିଲା ପରିଷଦର ସ୍ବତନ୍ତ୍ର ବୈଠକରେ ନୟାଗଡ଼ ବିଧାୟକ ଅରୁଣ କୁମାର ସାହୁ ବ୍ୟାରେଜ ନିର୍ମାଣ ନେଇ ତଥ୍ୟ ରଖିଥିଲେ । ଜଳସମ୍ପଦ ଅଧିକାରୀ ପ୍ରୀତମ ପୋଥାଲ ମଧ୍ୟ ଏନେଇ ସୂଚନା ଦେଇଥିଲେ । ଜିଲା ପରିଷଦ ସଭ୍ୟ ମାନେ ବ୍ୟାରେଜ ନିର୍ମାଣ ନେଇ ଅଧିକ ଆଲୋଚନା କରିବା ପାଇଁ ଆଗ୍ରହ ପ୍ରକାଶ କରିଥିଲେ । ଏପରି କି ଜଳସେଚନରେ କାହିଁକି ଏହାର ଜଳ ବ୍ୟବହାର କରାଯାଇ ପାରିବନି ପଚାରିବାରୁ ପରବର୍ତ୍ତୀ ପର୍ଯ୍ୟାୟରେ ଚର୍ଚ୍ଚା ହେବ କୁହାଯାଇଥିଲା । କୃଷି ପାଇଁ ବ୍ୟବହାର କରାଗଲେ ଅସୁବିଧା ଅଛି କୁହାଯାଇଥିଲା । ଅନ୍ୟପକ୍ଷେ ମହାନଦୀର ପଦ୍ମାବତୀଠାରେ ବ୍ୟାରେଜ କରିବାକୁ ସରକାରଙ୍କର ପୂର୍ବରୁ ପ୍ରସ୍ତାବ ଥିଲା । କାହିଁକି କରାଗଲାନି ଜଣାପଡୁନି। ଏଠାରେ ବ୍ୟାରେଜ କରିବାକୁ ପ୍ରସ୍ତାବ ଦେବାକୁ ସଭ୍ୟ ରାମେଶ୍ୱର ଶତପଥୀ ମତ ରଖିଥିଲେ ।
ମେଗା ଲିଫ୍ଟ ଇରିଗେଶନ ପାଇଁ ପ୍ରସ୍ତାବ: ନୟାଗଡ଼ ଜିଲାର ଗଣିଆ, ଖଣ୍ଡପଡ଼ା ଓ ଭାପୁର ବ୍ଳକ ଦେଇ ମହାନଦୀ ପ୍ରବାହିତ ହୋଇଛି । ନଦୀ ପାଣି ନଦୀରେ ବହି ଯାଉଛି । ଏହାର ସୁଫଳ ଚାଷୀ ନେଇ ପାରୁନି । ଏଭଳିସ୍ଥଳେ ଜିଲାରେ ଜଳସେଚନ ୫୦ ପ୍ରତିଶତ ବି ହୋଇ ପାରୁନି । ମହାନଦୀରେ ମେଗା ଲିଫ୍ଟ ଇରିଗେଶନ କରିବା ପାଇଁ ସଭ୍ୟ ରାମଶ୍ୱେର ଶତପଥୀ ପ୍ରସ୍ତାବ ଦେଇଥିଲେ । ପଶ୍ଚିମାଞ୍ଚଳରେ ମେଗା ଲିଫ୍ଟ ଇରିଗେଶନ ପ୍ରକଳ୍ପ କରାଯାଇଛି । ନୟାଗଡ଼ ଜିଲାରେ କରିବାର ଅସୁବିଧା ନାହିଁ । ୮ ବର୍ଷ ତଳେ ଜଳସେଚନ ବିଭାଗର ଚିଫ୍ ଇଞ୍ଜିନିୟରଙ୍କୁ ଭେଟି ଦାବି ରଖିଥିଲେ । ଏବେ ପୁଣି ବର୍ତ୍ତମାନର ଜଳସେଚନ ବିଭାଗର ଚିଫ୍ ଇଞ୍ଜିନିୟରଙ୍କ ଚିନ୍ମୟ ରାଉତଙ୍କୁ ଭେଟି ଦାବି ରଖିଛନ୍ତି। ଏନେଇ ଗୃହରେ ଆଲୋଚନା ପରେ ଏହାର ରିଜୋଲେଶନ କରି ୱାଟର ରିସୋର୍ସ ଡିପାର୍ଟମେଣ୍ଟକୁ ପଠାଇବାକୁ ନୟାଗଡ଼ ବିଧାୟକ ଜିଲାପାଳ, ଜିଲା ପରିଷଦର ସଭାପତିଙ୍କୁ ପ୍ରସ୍ତାବ ଦେଇଥିଲେ । ଜିଲା ପରିଷଦରେ ଏନେଇ ପ୍ରସ୍ତାବ ରବିବାର ଗୃହୀତ ହୋଇଛି ।
ପୋତି ହେଉଛି ନଦୀ ଶଯ୍ୟା, ବଦଳୁଛି ଗତିପଥ: ନୟାଗଡ଼ ଜିଲାର ବିଭିନ୍ନ ନଦୀ ଶଯ୍ୟା ବିଭିନ୍ନ କାରଣରୁ ପୋତି ହେଉଛି । ଏପରି କି ନଦୀ ଶଯ୍ୟାରେ ଗଛ ଉଠି ନଦୀର ଗତିପଥ ପରିବର୍ତ୍ତନ ହେଉଛି । ଦଶପଲ୍ଲାର ଦୁର୍ଗାବଜାର, ମହିପୁର ଅଞ୍ଚଳକୁ ଉଦାହରଣ ନିଆଯାଇ ପାରେ । ଦଶପଲ୍ଲା ବିଧାୟକ ରମେଶ ଚନ୍ଦ୍ର ବେହେରା ଜିଲା ପରିଷଦର ସ୍ବତନ୍ତ୍ର ବୈଠକରେ ଅଲୋଚନା କରି ନଦୀଶଯ୍ୟାକୁ ଖନନ କରିବାକୁ ପ୍ରସ୍ତାବ ଦେଇଥିଲେ । ଏପରିକି ଫାର୍ମ ଲ୍ୟାଣ୍ଡ ବ୍ରିଜ କରିବାକୁ ମଧ୍ୟ ପ୍ରସ୍ତାବ ଦେଇଥିଲେ । ଡ୍ରେନେଜ ବିଭାଗ ଏ ଦିଗରେ ପଦକ୍ଷେପ ନେବାକୁ ପରାମର୍ଶ ଦେଇଥିଲେ । ଏନେଇ ସ୍ବତନ୍ତ୍ର ଭାବେ ଆଲୋଚନା କରିବାକୁ ପ୍ରସ୍ତାବ ରଖିଥିଲେ ।
ଛୁଟି ଦିବସରେ ବୈଠକ: ଜିଲା ପରିଷଦର ସ୍ବତନ୍ତ୍ର ବୈଠକ ରବିବାର ହୋଇଥିଲା । ପୁଣି ବିଶ୍ୱ କପ୍ କ୍ରିକେଟର ମ୍ୟାଚ୍ ବି ଥିଲା । ସରକାରୀ ଅଧିକାରୀ ଓ ଜିଲା ପରିଷଦ ସଭ୍ୟ ରବିବାର ବୈଠକ କରିବାକୁ ରାଜି ନ ଥିଲେ । ତେବେ ଜିଲା ପରିଷଦ ସଭାପତିଙ୍କ ରବିବାର ବୈଠକ କରବାକୁ ଆଗ୍ରହୀ ହୋଇଥିଲେ। ରବିବାର ବୈଠକରେ ଭାରତ ବିଶ୍ୱ କପ୍ ଜିତୁ ବୋଲି ସର୍ବସମ୍ମତି କ୍ରମେ ଆଲୋଚନା କରାଯାଇଥିଲା । ତେବେ ବୈଠକ ପରେ ସରକାରୀ ଅଧିକାରୀ ଓ କେତେଜଣ ରାଜନେତା କହିଥିଲେ ଛୁଟି ଦିବସରେ ବୈଠକ ହେଲା । ହେଲେ ଆଲୋଚନା ପାଇଁ ସମୟ ଅଭାବ ରହିଲା ।