ଓ୍ବାଶିଂଟନ୍,୨୯।୧: ଦୁଇ ବର୍ଷ ମଧ୍ୟରେ ଚାଇନା ଏବଂ ଆମେରିକା ମଧ୍ୟରେ ମହାଯୁଦ୍ଧ ହେବାର ସମ୍ଭାବନା ଅଛି। ଆମେରିକାର ବାୟୁସେନାର ବରିଷ୍ଠ ଜେନେରାଲଙ୍କ ଦାବି ପରେ ବିଶ୍ୱ ଚକିତ ହୋଇଯାଇଛି। ଜେନେରାଲ ମାଇକ ମିନିହାନ କହିଛନ୍ତି, ୨୦୨୫ରେ ଆମେରିକା ଏବଂ ଚୀନ ମଧ୍ୟରେ ମହାଯୁଦ୍ଧ ଆରମ୍ଭ ହୋଇପାରେ। ଏଥିପାଇଁ ସେ ବରିଷ୍ଠ ଅଧିକାରୀଙ୍କ ନିକଟକୁ ଏକ ମେମୋ ପଠାଇଛନ୍ତି ଏବଂ କହିଛନ୍ତି ଯେ, ଚାଇନାର ଏକଛତ୍ରବାଦୀ ଶାସନ ଯେପରି ବଢୁଛି, ଯେକୌଣସି ସମୟରେ ଯୁଦ୍ଧ ଆରମ୍ଭ ହୋଇପାରେ। ସେ ଯୁଦ୍ଧ ପାଇଁ ପ୍ରସ୍ତୁତି ଆରମ୍ଭ କରିବାକୁ ସେନା ଅଧିକାରୀଙ୍କୁ କହିଛନ୍ତି।
ଏୟାର ମୋବିଲିଟି କମାଣ୍ଡର ମୁଖ୍ୟ ଜେନେରାଲ ମାଇକ ମିନିହାନ କହିଛନ୍ତି, ମୁଁ ଆଶା କରୁଛି ଯେ ମୁଁ ଯାହା ଭାବୁଛି ତାହା ଭୁଲ ପ୍ରମାଣିତ ହେଛ। ଜଗତର ମଙ୍ଗଳ ପାଇଁ ମୋର ଆଶଙ୍କା ଭୁଲ ହେଉ। ମୋର ଅନ୍ତନିର୍ହିତ ଆତ୍ମା କହୁଛି ଯେ. ମୁଁ ୨୦୨୫ରେ ଯୁଦ୍ଧକ୍ଷେତ୍ରରେ ଲଢିବି।
ଜେନେରାଲଙ୍କ ମତ ପେଣ୍ଟାଗନ୍ର ପ୍ରତିନିଧିତ୍ୱ କରୁ ନ ଥିବାବେଳେ ତାଇୱାନ ଉପରେ ନିୟନ୍ତ୍ରଣ ସ୍ଥାପନ କରିବାକୁ ଚାଇନାର ଏକ ସମ୍ଭାବ୍ୟ ପ୍ରୟାସକୁ ଏଡ଼ାଇ ଦିଆଯାଇପାରିବ ନାହିଁ। ଜେନେରାଲ ମିନିହାନ ଆହୁରି ଲେଖିଛନ୍ତି ଯେ, ଉଭୟ ଆମେରିକା ଏବଂ ତାଇୱାନ ୨୦୨୪ରେ ରାଷ୍ଟ୍ରପତି ନିର୍ବାାଚନ କରିବେ ଏବଂ ଏହି ସମୟ ମଧ୍ୟରେ ଚାଇନା ଏହାର ସୁଯୋଗ ନେଇ ତାଇୱାନ ବିରୋଧରେ ସାମରିକ କାର୍ଯ୍ୟାନୁଷ୍ଠାନ ଗ୍ରହଣ କରିପାରିବ। ଏହା ପରେ ପରିସ୍ଥିତି ଏପରି ହୋଇପାରେ ୨୦୨୫ରେ ଆମେରିକା ଏବଂ ଚାଇନା ମଧ୍ୟରେ ଯୁଦ୍ଧ ହେବାର ସମ୍ଭାବନା ବଢିବ।
ଅଗଷ୍ଟ ୨୦୨୨ରେ ଆମେରିକାର ସ୍ପିକର ନାନସୀ ପେଲୋସି ତାଇୱାନ ଗସ୍ତରେ ଆସିବା ପରେ ଚାଇନା ଏବଂ ଆମେରିକା ମଧ୍ୟରେ ତିକ୍ତତା ଆହୁରି ବଢିଯାଇଥିଲା। ପେଲୋସିଙ୍କ ତାଇୱାନ ଗସ୍ତକୁ ଚାଇନା ଦୃଢ ବିରୋଧ କରିଥିଲା।
