ୱାଶିଂଟନ,୧୧।୮: ଅନ୍ତର୍ଜାତୀୟ ସ୍ପେସ ଷ୍ଟେସନକୁ ପିଜା ନେଇ ଏକ ରକେଟ ଯାତ୍ରା କରିଛି। ଏଥିରେ ୭ ଜଣ ମହାକାଶଚାରୀଙ୍କ ପାଇଁ ଆବଶ୍ୟକ ଖାଦ୍ୟ ସାମଗ୍ରୀ ରହିଛି। ଏବେ ସ୍ପେସ୍ ଷ୍ଟେଶନ୍ରେ ମହାକାଶଚାରୀ ପିଜା ପାର୍ଟି କରିବାର ସୁଯୋଗ ପାଇବେ। ନର୍ଥ୍ରୋପ ଗ୍ରୁମ୍ୟାନ କମ୍ପାନୀର ରକେଟ ପିଜା ସହିତ ସ୍ପେସ ଷ୍ଟେସନ ଅଭିମୁଖେ ଯାତ୍ରା କରିଛି। ମଙ୍ଗଳବାର କମ୍ପାନୀର ସାଇଗ୍ନସ କାର୍ଗୋ ସ୍ପେସ୍ ଶିପ୍ ଭର୍ଜିନିଆର ପୂର୍ବ ଉପକୂଳରୁ ଯାତ୍ରା କରିଛି। ଗୁରୁବାର ସୁଦ୍ଧା ଏହା ଅନ୍ତର୍ଜାତୀୟ ସ୍ପେସ ଷ୍ଟେସନରେ ପହଞ୍ଚିବ।
ପାଖାପାଖି ୩,୭୦୦ କିଲୋଗ୍ରାମ୍ର ଶିପ୍ମେଣ୍ଟ୍ରେ ଷ୍ଟେସନରେ ଥିବା ୭ ଜଣ ମହାକାଶଚାରୀଙ୍କ ପାଇଁ ଏକ ପିଜା କିଟ ଏବଂ ତାଜା ଆପଲ, ଟମାଟୋ, କିୱି, ପନିର ବଟର ଆଦି ପଠାଯାଇଛି। ନାସା ପାଇଁ ଏହାକୁ ମିଶାଇ ନର୍ଥ୍ରୋପ ଗ୍ରୁମ୍ୟାନ କମ୍ପାନୀ ପକ୍ଷରୁ ୧୬ ଥର ଅତ୍ୟାବଶ୍ୟକ ସାମଗ୍ରୀ ବୋହିନେବା କାର୍ଯ୍ୟ ସମ୍ପନ୍ନ ହୋଇଛି। ନାସାର ୱାଲପ୍ସ ଫ୍ଲାଇଟ ସୁବିଧା ଦ୍ୱାରା କମ୍ପାନୀର ଆଣ୍ଟାରେସ ରକେଟରୁ ଏହି ଖାଦ୍ୟ ବୋହି ନେଇଥିବା କ୍ୟାପସୁଲକୁ ଲଞ୍ଚ କରାଯାଇଥିଲା। ଏହି କ୍ୟାପସୁଲକୁ ହାୱାଇସ୍ ଓନିଜୁକା ଭାବେ ନାମିତ କରାଯାଇଛି। ଓନିଜୁକା ମହାକାଶରେ ପ୍ରଥମ ଏସୀୟ ଆମେରିକୀୟ। ୧୯୮୬ ଚ୍ୟାଲେଞ୍ଜର୍ ଲଞ୍ଚ ଦୁର୍ଘଟଣାରେ ତାଙ୍କର ମୃତ୍ୟୁ ଘଟିଥିଲା। ନାସାର ଦ୍ୱିତୀୟ ସ୍ପେସ୍ ଶିପ୍ ସ୍ପେସ-ଏକ୍ସ, କିଛି ସପ୍ତାହ ମଧ୍ୟରେ କେତେକ ଆବଶ୍ୟକ ସାମଗ୍ରୀ ନେଇ ଯାତ୍ରା ଆରମ୍ଭ କରିବ। ଏହି ସ୍ପେସ ଷ୍ଟେସନରେ ବର୍ତ୍ତମାନ ୩ ଜଣ ଆମେରିକୀୟ, ୨ ଜଣ ରୁଷ୍, ଜଣେ ଫରାସୀ ଏବଂ ଜଣେ ଜାପାନୀ ମହାକାଶଚାରୀ ରହିଛନ୍ତି। ଅତୀତରେ, ମହାକାଶଚାରୀମାନେ ମହାକାଶରେ ’ସ୍ପେସ ଗେମ’ ମଧ୍ୟ ଖେଳୁଥିଲେ। ମହାକାଶଚାରୀମାନେ ନୋ-ହ୍ୟାଣ୍ଡବଲ, ସିଙ୍କ୍ରୋନାଇଜଡ ଫ୍ଲୋଟିଂ ଭଳି ଖେଳ ଖେଳିଥିଲେ। ଟିମ୍ ଡ୍ରାଗନ୍ରେ ନାସା ମହାକାଶଚାରୀ ସଚିନ କିମ୍ବ୍ରୋ ଏବଂ ମେଗାନ ମାକାଥର୍, ଜାକ୍ସା ମହାକାଶଚାରୀ ଆକିହିକୋ ହୋଶାଇଡ ଏବଂ ଇଏସଏ ମହାକାଶଚାରୀ ଥୋମାସ ପେସ୍କେଟ ସାମିଲ୍ ଥିଲେ। ଏହି ମହାକାଶଚାରୀମାନେ ସ୍ପେସ ଏକ୍ସ କ୍ରୁ ଡ୍ରାଗନ ମହାକାଶଯାନରୁ ଆଇଏସ୍ଏସ୍କୁ ଆସିଥିଲେ। ଟିମ ସୋୟୁଜ ମହାକାଶଚାରୀ ମାର୍କ ଭାଣ୍ଡେ ହେ, ଓଲେଗ ନୋଭିଟସ୍କି ଏବଂ ରସ୍କୋସ୍ମୋସର ପାତ୍ରୋ ଡବରୋଓ୍ବ ସାମିଲ୍ ଥିଲେ। ସ୍ପେସ-ଏକ୍ସର କ୍ରୁ ଡ୍ରାଗନ ମହାକାଶଯାନ ଏବଂ ସୋୟୁଜ ଏପ୍ରିଲ ୨୦୨୧ରେ ଆଇଏସ୍ଏସରେ ପହଞ୍ଚିଥିଲେ ।