କୋଲକତା, ୧୧।୭: ପଶ୍ଚିମବଙ୍ଗରେ କରୋନା ସଂକ୍ରମଣ ବଢ଼ିଚାଲିଛି। ଏହାକୁ ଦୃଷ୍ଟିରେ ରଖି ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସରକାର କୋଲକତାର ଲୋକପ୍ରିୟ କ୍ରିକେଟ ଷ୍ଟାଡ଼ିୟମ୍ରେ କରୋନା ଆକ୍ରାନ୍ତଙ୍କ ପାଇଁ ଇଡେନ୍ ଗାର୍ଡେନ୍ରେ କ୍ୱାରାଣ୍ଟାଇନ୍ ସେଣ୍ଟର କରିବାକୁ ଯୋଜନା କରିଛନ୍ତି। ଏନେଇ ପୋଲିସ ମୁଖ୍ୟାଳୟରେ ଏବେ ବୈଠକ ଅନୁଷ୍ଠିତ ହୋଇଛି। ଏଥିରେ କ୍ରିକେଟ ଆସୋସିଏଶନ୍ ଅପ୍ ବେଙ୍ଗାଲ(ସିଏବି)ର ସଭାପତି ଅଭିଷେକ ଡାଲମିଆ ଏବଂ ସମ୍ପାଦକ ସ୍ନେହାଶିଷ ଗାଙ୍ଗୁଲୀ ଉପସ୍ଥିତ ଥିଲେ। ଇଡେନ୍ ଗାର୍ଡେନ୍ର ୫ଟି ବ୍ଲକ୍ରେ କ୍ୱାରାଣ୍ଟାଇନ୍ ସେଣ୍ଟର କରାଯିବ ବୋଲି କୁହାଯାଉଛି। ଇ,ଏଫ୍, ଜି, ଏଚ୍ ବ୍ଲକ୍ରେ ପ୍ରାଥମିକ ଭାବେ କ୍ୱାରାଣ୍ଟାଇନ୍ ସେଣ୍ଟର ନିର୍ମାଣ କରାଯିବ। ଆକ୍ରାନ୍ତଙ୍କ ସଂଖ୍ୟା ବଢ଼ିଲେ ଜେ ବ୍ଲକ୍କୁ ମଧ୍ୟ ଏଥିରେ ସାମିଲ୍ କରାଯିବ। ଗ୍ରାଉଣ୍ଡ୍ସ ମ୍ୟାନ୍ ଏବଂ ଷ୍ଟାଡ଼ିୟମ୍ର ଅନ୍ୟ କର୍ମଚାରୀଙ୍କୁ ବି,ସି, କେ ଏବଂ ଏଲ୍ ବ୍ଲକ୍କୁ ସ୍ଥାନାନ୍ତର କରାଯିବ ବୋଲି ବୈଠକରେ ନିଷ୍ପତ୍ତି ଗ୍ରହଣ କରାଯାଇଛି।
