ନୂଆଦିଲ୍ଲୀ: କରୋନା ମହାମାରୀ ଦ୍ୱାରା କ୍ଷତିଗ୍ରସ୍ତ ଅର୍ଥ ବ୍ୟବସ୍ଥା ସମ୍ପୂର୍ଣ୍ଣ ଭାବେ ଅଣ୍ଟା ସଳଖି ଛିଡ଼ା ହୋଇନାହିଁ। ସରକାର ପୂର୍ବରୁ ୨୦ ଲକ୍ଷ କୋଟି ଟଙ୍କାର ଆର୍ଥତ୍କ ପ୍ୟାକେଜ ଘୋଷଣା କରିଥିଲେ। ଏହା ପରେ ପାର୍ବଣରେ ବଜାରର ଉତ୍ସାହ ବଢ଼ାଇବା ଲାଗି ସରକାରୀ କର୍ମଚାରୀଙ୍କ ଲାଗି ପ୍ରାୟ ୭୩ ହଜାର କୋଟି ଟଙ୍କାର ଆଉ ଏକ ପ୍ୟାକେଜ ଘୋଷଣା କରିଛନ୍ତି। ଏହାବାଦ୍ ଆଉ ଏକ ଆର୍ଥିକ ପ୍ୟାକେଜ କେନ୍ଦ୍ର ସରକାର ଆଣିବେ ବୋଲି ଜଣାପଡିଛି। ଏ ନେଇ କେନ୍ଦ୍ର ସରକାର କାର୍ଯ୍ୟପନ୍ଥା ହାତକୁ ନେଉଥିବା ଅର୍ଥ ସଚିବ ଅଜୟ ଭୂଷଣ ପାଣ୍ଡେ ରବିବାର ଆଭାସ ଦେଇଛନ୍ତି। ଏହି ପ୍ୟାକେଜ କେବେ ସୁଦ୍ଧା ଆସିବ ସେ ନେଇ ପାଣ୍ଡେ କୌଣସି ସ୍ପଷ୍ଟ ସୂଚନା ଦେଇନାହାନ୍ତି।
ସେ କହିଛନ୍ତି, ସରକାର ବଜାର ସ୍ଥିତି ଉପରେ ଧ୍ୟାନ ରଖିଛନ୍ତି। ଅର୍ଥ ବ୍ୟବସ୍ଥାର ବିଭିନ୍ନ କ୍ଷେତ୍ରର ସ୍ଥିତିକୁ ନିରନ୍ତର ଭିତ୍ତିରେ ତର୍ଜମା କରାଯାଉଛି। ଆବଶ୍ୟକତା ଅନୁସାରେ ବିଭିନ୍ନ ପଦକ୍ଷେପ ନିଆଯାଉଛି। ଦେଶର ବିଭିନ୍ନ ଶିଳ୍ପ ସଂଘ, ବାଣିଜି୍ୟକ ଆସୋସିଏଶନ, ମନ୍ତ୍ରଣାଳୟ ଏବଂ ଅଂଶୀଦାରଙ୍କଠାରୁ ମତାମତ ନିଆଯାଉଛି। ସେହି ଅନୁସାରେ ବିଭିନ୍ନ ଯୋଜନା ହାତକୁ ନିଆଯାଉଛି ବୋଲି ସେ ମତ ପ୍ରକାଶ କରିଛନ୍ତି। ଅର୍ଥ ବ୍ୟବସ୍ଥା ପୁଣି ଥରେ ଟ୍ରାକ୍କୁ ଫେରୁଥିବା ସେ ମତ ପ୍ରକାଶ କରିଛନ୍ତି।
ଆର୍ଥତ୍କ କାର୍ଯ୍ୟକଳାପରେ ଉନ୍ନତି ଆସୁଥିବାରୁ ଜିଏସ୍ଟି ସଂଗ୍ରହ କୋଭିଡ୍ ୍ପୂର୍ବବର୍ତ୍ତୀ ସ୍ତରକୁ ଫେରିଛି। ଏହାବାଦ୍ ଇ-ଓ୍ବେ ବିଲ୍ ଜେନେରେଶନରେ ଉନ୍ନତି, ବିଭିନ୍ନ ବର୍ଗଙ୍କୁ ସହାୟତା, ଜନଧନ ଆକାଉଣ୍ଟରେ ଡିବିଟି ଯୋଗେ ଅର୍ଥ ଯୋଗାଣ, ପିଏମ୍ କିଷାନ ଯୋଜନାରେ କୃଷକଙ୍କୁ ସହାୟତା, ଇପିଏଫ୍ ଯୋଗଦାନ, ଏମ୍ଏସ୍ଏମ୍ଇକୁ ନଗଦ ଯୋଗାଣ, ଟିକସ ରିଫଣ୍ଡ, ଏମ୍ଏସ୍ଏମ୍ଇ ଋଣ ମୋରାଟୋରିୟମ ଭଳି ବିଭିନ୍ନ ସୁବିଧା ଦ୍ୱାରା ଅର୍ଥ ବ୍ୟବସ୍ଥାରେ ଉନ୍ନତି ଆଣିବା ଲାଗି ସରକାର ଚେଷ୍ଟା ଜାରି ରଖିଥିବା ସେ ମତ ଦେଇଛନ୍ତି।